(ខេត្តព្រៃវែង) ឃុត នួន អាយុ៦៤ឆ្នាំ មានស្រុកកំណើតនៅក្នុងភូមិពាយនាយ ឃុំក្រាំងស្វាយ ស្រុកព្រះស្ដេច ខេត្តព្រៃវែង។ នួន បច្ចុប្បន្នរស់នៅជាមួយចៅកំព្រាអាយុ១០ឆ្នាំម្នាក់។ កាលពីកុមារភាព នួន រៀនបានត្រឹមថ្នាក់ទី៣ (សង្គមចាស់)។ នួន បានរៀបរាប់រឿងរ៉ាវដែលបានជួបប្រទះ ក្នុងសម័យខ្មែរក្រហមដូច្នេះថា៖

កាលពីអំឡុងរបបខ្មែរក្រហម គាត់ធ្វើការស្ទើរគ្មានពេលសម្រាកប៉ុន្តែមិនទទួលបានរបបអាហារហូបចុកគ្រប់គ្រាន់។ កាលនោះ នួន មានអាយុប្រហែល១៤ឆ្នាំ ត្រូវរស់នៅក្នុងកងកុមារ ដោយសារតែគាត់មានមាឌល្អិតតូចជាងគេ។ អង្គការបានឲ្យគាត់រៀនសូត្របានតិចតួច១​ម៉ោង ទៅ២ម៉ោង នៅពេលព្រឹក ហើយពេលថ្ងៃត្រូវជួយការងារធ្វើជី ដែលលាយដីដំបូក, លាមកមនុស្ស និងលាមកសត្វយកទៅដាក់ស្រែ។ នៅរដូវវស្សា កងឈ្លបតម្រូវឲ្យនួនទៅស្ទូងស្រូវដោយកំណត់មួយថ្ងៃចំនួនមួយផ្លូន។ ប្រសិនបើគាត់ស្ទូងមិនបានគ្រប់ចំនួនទេនោះ កងឈ្លបមិនឲ្យឡើងពីស្រែនោះទេ។ នួន និយាយថា «នៅថ្ងៃខ្លះ ខ្ញុំត្រូវស្ទូងសំណាបរហូតដល់យប់ជ្រៅ។ ខ្ញុំស្ទូងបណ្តើរយំបណ្ដើរ ដោយនឹករឭកដល់ម្តាយឪពុក»។ របបអាហាររបស់នួន មានត្រឹមបបរ១ចាន និងសម្ល១កូនឆ្នាំងសម្រាប់ហូបមនុស្ស៤នាក់។ របបអាហារនេះ នួនហូបមិនឆ្អែតទេ គាត់ត្រូវដើរបេះស្លឹកឈើ និងបន្លែក្នុងព្រៃហូបបន្ថែមដើម្បីបំបាត់សេចក្តីស្រេកឃ្លាន។ នៅខែច្រូតស្រូវ កងឈ្លបតម្រូវឲ្យនួនច្រូតតាំងពីទៀបភ្លឺម៉ោង ៥ រហូតដល់យប់។ ក្រៅពីការងារនេះ នួន ក៏ត្រូវអង្គការប្រើឲ្យឃ្វាលគោ-ក្របី។ នៅថ្ងៃមួយ គោបានស៊ីស្រូវ ហើយកងឈ្លបបានហៅគាត់ទៅអប់រំ និងធ្វើកិច្ចសន្យា​ឈប់ប្រព្រឹត្តកំហុសនេះម្តងទៀត។

នៅក្នុងរបបខ្មែរក្រហម នួន បានដឹងថានៅភូមិពាយនាយ មានមន្ទីរពេទ្យមួយកន្លែងស្ថិតនៅក្នុងបរិវេណវត្តក្រាំងស្វាយ។ ការព្យាបាលមានតែថ្នាំបុរាណ ដែលសូនពីសម្បករុក្ខជាតិជាគ្រាប់តូចៗ មានរាងដូចអាចម៍ទន្សាយ។ អ្នកជំងឺស្រាលអាចព្យាបាលបានជាសះស្បើយ ចំណែកអ្នកជំងឺធ្ងន់ ត្រូវស្លាប់។ រី​ឯ​សាលារៀន​គោកសំពៅ ត្រូវបានខ្មែរក្រហមប្រែក្លាយទៅជាកន្លែងធ្វើជីសម្រាប់សហករណ៍ក្រាំងស្វាយ។

នៅឆ្នាំ១៩៧៨ កងឈ្លបខ្មែរក្រហមបានជម្លៀស នួន ទៅតំបន់ពោធិ៍លាស់។ នៅទីនោះ មានឈ្មោះ សួគ៍, គន់ និងយង់ ជាអ្នកគ្រប់គ្រង លើការងារប្រចាំថ្ងៃរបស់នួន ដូចជាធ្វើជី និងចិញ្ច្រាំដើមទន្ទ្រានខែត្រ។ នួន ក៏ត្រូវបានអ្នកគ្រប់គ្រងប្រើឲ្យជីក និងរែកដីបាតទន្លេ យកមកធ្វើជីដាក់ស្រែដែរ។ នៅឆ្នាំ១៩៧៩ តំបន់ពោធិ៍លាស់ ពេលថ្ងៃត្រង់ នួន បានឃើញយន្តហោះមកទម្លាក់សំបុត្រប្រាប់ថា របបខ្មែរក្រហមត្រូវបានរំដោះ។ នួន បានធ្វើដំណើរដោយថ្មើរជើងត្រលប់មករស់នៅស្រុកកំណើត និងរស់នៅទីនេះរហូតដល់បច្ចុប្បន្ន។ ចំពោះបញ្ហាសុខភាព នួន មានជំងឺឈឺក្រពះ និងរោគស្ត្រីរុំារ៉ៃ មិនអាចធ្វើការងារធ្ងន់បាន។ គាត់តែងទទួលការព្យាបាល នៅមណ្ឌលសុខភាពកអណ្ដើក, កំពង់ត្របែក និងមណ្ឌលសុខភាពក្រាំងស្វាយ៕

អត្ថបទដោយ អេង សុខម៉េង

សម្ភាសន៍ដោយ ជួន រក្សា ថ្ងៃទី២១ ខែមករា ឆ្នាំ២០២៤