យោធាខ្មែរក្រហម
(ក្រចេះ) បាន ច័ន្ទថូ ភេទស្រី អាយុ៦៩ឆ្នាំ មានទីកន្លែងកំណើតនៅឃុំកងតាណឹង ស្រុកកងមាស ខេត្តកំពង់ចាម។ បច្ចុប្បន្ន ច័ន្ទថូ រស់នៅភូមិដារ ឃុំដារ ស្រុកចិត្របុរី ខេត្តក្រចេះ។
នៅក្នុងឆ្នាំ១៩៧០ ក្រោយពីមានការធ្វើរដ្ឋប្រហារទម្លាក់ សម្ដេចព្រះ នរោត្តម សីហនុ ពីអំណាច ប្រទេសជាតិចាប់ផ្តើមច្របូកច្របល់។ នៅឆ្នាំ១៩៧២ ក្នុងតំបន់មួយចំនួននៅខេត្តកំពង់ចាម មានការទម្លាក់គ្រាប់បែក ហើយពេលនោះ ក៏ចាប់ផ្ដើមមានចលនាខ្មែរក្រហមចូលគ្រប់គ្រង់នៅតំបន់មួយចំនួនដែរ។ ច័ន្ទថូ រស់នៅជួបជុំជាមួយនឹងគ្រួសារធម្មតាក្នុងអំឡុងពេលចលាចលនេះ។ ឈានចូលដល់ខែតុលា ឆ្នាំ១៩៧៤ ប្រធានភូមិរបស់ច័ន្ទថូ ចាប់ផ្ដើមកេណ្ឌយុវជន-យុវនារី ឲ្យចូលរួមបដិវត្តន៍ ត្រៀមផ្ដួលរំលំរបប លន់ នល់ នៅទីក្រុងភ្នំពេញ។ ដំបូងឡើយ ច័ន្ទថូ ត្រូវហាត់លុតដំខ្លួនជាយោធានៅទំនប់ជើងព្រៃ។ បន្ទាប់ពីគាត់ហាត់បានមួយរយៈ មានការបែងចែកយុវជន-យុវនារីជាកង ហើយ បញ្ជូនទៅវាយរំដោះទីក្រុងភ្នំពេញនៅឆ្នាំ១៩៧៥។
បន្ទាប់ពីយោធាខ្មែរក្រហម បានវាយឈ្នះ និងកាន់កាប់ទីក្រុងភ្នំពេញនៅថ្ងៃទី១៧ ខែមេសា ឆ្នាំ១៩៧៥ ខ្មែរក្រហមចាប់ផ្ដើមជម្លៀសប្រជាជនចេញពីទីក្រុងភ្នំពេញទាំងអស់ ដើម្បីធ្វើការបោសសម្អាតខ្មាំង។ កន្លងបានរយៈពេល២ខែ គឺនៅខែមិថុនា ឆ្នាំ១៩៧៥ ខ្មែរក្រហមបានជម្លៀសកងពលរបស់ ច័ន្ទថូ ទៅកាន់ខេត្តមណ្ឌលគិរី។ ពេលនោះ ច័ន្ទថូ ធ្វើជាយោធានៅក្នុងកងវរសេនាតូចលេខ៩២០ មានសមាជិកចំនួន៣០០នាក់។ នៅពេលដែលទៅដល់ខេត្តមណ្ឌលគិរី ច័ន្ទថូ ត្រូវបានចាត់តាំងឲ្យធ្វើការងារធម្មតា ដូចជា ធ្វើស្រែ, លើកភ្លឺស្រែ និងកាប់រានព្រៃដើម្បីធ្វើស្រែចម្ការ។ ការធ្វើកសិកម្មនៅអំឡុងពេលនោះ គឺធ្វើដោយដៃ គ្មានគ្រឿងយន្ត ឬគោក្របីជាជំនួយឡើយ។
នៅឆ្នាំ១៩៧៦ ច័ន្ទថូ ត្រូវធ្វើការងារបន្ថែមនៅពេលយប់។ ការងារបន្ថែមនោះ គឺគាស់គល់ឫស្សីព្រេច ដោយត្រូវចាប់ផ្តើមធ្វើតាំងពីហូបអាហារពេលល្ងាចរួច រហូតដល់ម៉ោង១២យប់ទើបគាត់បានសម្រាក។ ច័ន្ទថូ បាននិយាយថា នៅក្នុងឆ្នាំ១៩៧៦ របបអាហារ មានសភាពគ្រប់គ្រាន់ ព្រោះពេលនោះកងរបស់គាត់ស្ថិតក្រោមការគ្រប់គ្រងរបស់ ឈិន និង សយ។ ជាធម្មតានៅក្នុងកងពលនីមួយៗតែងតែមានច្បាប់ទម្លាប់ និងភាពតឹងរឹងច្បាស់លាស់។ នៅក្នុងកងពលរបស់ ច័ន្ទថូ ធ្វើការក៏ដូចគ្នាដែរ ប៉ុន្តែរឿងម្យ៉ាងដែលខុសគ្នានោះគឺ កងពលរបស់គាត់មានអាហារហូបគ្រប់គ្រាន់។ ក្រោយមកមិនបានប៉ុន្មាន កងពលរបស់គាត់ត្រូវបានចោទប្រកាន់ថាក្បត់ជាមួយនឹងអង្គការ។ ដូច្នេះ លេខា និងអនុលេខាកងពល ត្រូវបានចាប់ខ្លួន ហើយជំនួសដោយលេខាកងពលថ្មី។ បន្ទាប់ពីមានការផ្លាស់ប្ដូរប្រធានកងពលថ្មី របបអាហារដែលធ្លាប់តែហូបគ្រប់គ្រាន់ប្រែមកជាខ្វះខាត។ បាយ១ឆ្នាំងតូចត្រូវហូបគ្នា៧នាក់។
ម្តាយមីងរបស់ច័ន្ទថូ ចំនួនពីររួមជាមួយសមាជិកគ្រួសាររបស់គាត់ទាំងអស់ បានបាត់ដំណឹងសូន្យសុង។ មុនពេលរបបខ្មែរក្រហមចូលកាន់អំណាច គ្រួសាររបស់ម្ដាយមីងទាំងពីររបស់គាត់ បានរើទៅរស់នៅទីក្រុងភ្នំពេញ រួចក៏បាត់ដំណឹងបន្ទាប់ពីការជម្លៀសប្រជាជនចេញពីភ្នំពេញធ្វើឡើងដោយខ្មែរក្រហម។ ច័ន្ទថូ ពុំបានដឹងថាការបាត់ខ្លួននេះ គឺដោយសារគាត់ស្លាប់បាត់បង់ជីវិត ឬគ្រាន់តែត្រូវផ្លាស់ប្ដូរកន្លែងរស់នៅថ្មីនោះទេ ពោលគឺគ្មានដំណឹងអ្វីពីគាត់ទាំងអស់។
ច័ន្ទថូ ត្រូវបានអង្គការរៀបចំឲ្យមានគ្រួសារនៅឆ្នាំ១៩៧៧ ហើយប្ដីរបស់គាត់មានតួនាទីជាប្រធានកងអនុសេនាធំ។ ការរៀបចំនៅពេលនោះគឺមើលទៅលើឋានៈ និងតួនាទី ហើយមូលហេតុដែលគាត់មានប្ដីជាប្រធានកងអនុសេនាធំ ព្រោះពេលនោះគាត់មានតួនាទីជាប្រធានក្រុម។ គាត់ និងស្វាមី មិនបានរួមរស់ជាមួយគ្នាបានយូរនោះទេក្រោយរៀបការ។ គាត់បានសម្រេចចិត្តបែកគ្នាវិញ ព្រោះតែមិនបានស្រឡាញ់គ្នា ហើយម្យ៉ាងវិញទៀតអតីតប្ដីរបស់គាត់ បានចេញទៅព្រៃដើម្បីវាយប្រយុទ្ធជាមួយនឹងទាហានវៀតណាមនៅអំឡុងឆ្នាំ១៩៧៨។ ការប្រយុទ្ធនោះ បានបណ្ដាលឲ្យអតីតប្ដីរបស់គាត់ស្លាប់បាត់បង់ជីវិតនៅសមរភូមិ។ បន្ទាប់របបខ្មែរក្រហមបានបញ្ចប់ នៅឆ្នាំ១៩៨៧ គាត់បានរៀបការម្ដងទៀតជាមួយនឹងប្ដីក្រោយរបស់គាត់ និងមានកូន៣នាក់។ ក្រោយមក គាត់និងក្រុមគ្រួសារបានផ្លាស់ប្ដូរទីលំនៅទៅខេត្តក្រចេះ និងរស់នៅទីនេះរហូតមកដល់សព្វថ្ងៃ៕
សម្ភាសន៍ដោយ៖ គ្រី រស្មី ថ្ងៃទី១២ ខែកញ្ញា ឆ្នាំ២០២៤
អត្ថបទដោយ៖ នេន ស្រីមុំ ថ្ងៃទី៣០ ខែមករា ឆ្នាំ២០២៥