ប្រែង អោក ភេទប្រុស អាយុ៤៥ឆ្នាំ (ពេលស្លាប់) ដែលជាលេខាស្រុកចន្ទ្រាត្រូវបានចាប់ខ្លួន និងសម្លាប់នៅគុកទួលស្លែង។ បុគ្គលិកមជ្ឈមណ្ឌលឯកសារកម្ពុជា បានជួបសម្ភាសជាមួយឈ្មោះ ប្រែង ទូច ជាប្អូនស្រីរបស់ ប្រែង អោក រស់នៅភូមិព្រៃអង្រ្កង ឃុំជ្រៃធំ ស្រុករមាសហែក ខេត្តស្វាយរៀង​​។ ខាងក្រោមនេះគឺជាការបញ្ជាក់របស់ប្អូនស្រីអោក មុនពេលបងប្រុសបាត់ខ្លួនក្នុងរបបខ្មែរក្រហម៖

អោក មានស្រុកកំណើតនៅភូមិ អង្រ្កង ឃុំជ្រៃធំ ស្រុករមាសហែក ខេត្តស្វាយរៀង និងមានឪពុកឈ្មោះ ប្រែង ហេង និងម្តាយឈ្មោះ ម៉ម ម៉ុម។ អោក ជាកូនទី៣ ក្នុងគ្រួសារដែលមានបងប្អូនចំនួន៩នាក់ (បាត់ខ្លួនក្នុងរបបខ្មែរក្រហមអស់ចំនួន៧នាក់)។ កាលពីកុមារភាព អោក បួសរៀននៅវត្តជ្រៃចំនួន៣វស្សា បានសឹក និងប្រកបរបបធ្វើល្អីលក់។ ក្រោយមក អោក បានរៀបការប្រពន្ធជាមួយនារី ឈ្មោះ ម៉ម ធៀម ដែលរស់នៅក្នុងភូមិជាមួយគ្នា និងមានកូនចំនួន៤នាក់ (ស្លាប់ក្នុងរបបខ្មែរក្រហម៣នាក់)។ នៅថ្ងៃទី១៨មីនា ឆ្នាំ១៩៧០ ប្រទេសជាតិមានរដ្ឋប្រហាររបស់ឧត្តមសេនីយ៍ លន់ នល់ ទម្លាក់សម្តេចព្រះ នរោត្តម សីហនុ ជាហេតុនាំឲ្យកើតមានសង្រ្គាម​។ នៅឆ្នាំ១៩៧១ អោក និងយុវជន-យុវនារី នៅក្នុង​ភូមិ​អង្រ្កង បានរត់ចូលព្រៃទៅចូលរួមជាមួយកម្លាំងចលនាតស៊ូខ្មែរក្រហម ដើម្បីប្រយុទ្ធជាមួយទាហាន លន់ នល់។

នៅឆ្នាំ១៩៧៥ ពេលរបបខែ្មរក្រហមឡើងកាន់អំណាច អោក ត្រូវបានខ្មែរក្រហមតែងតាំងធ្វើជាលេខាស្រុកចន្រ្ទា តំបន់២៣ ភូមិភាគបូព៌ា​។ នៅពេលនោះ ទូច ធ្លាប់ឮសំឡេងរបស់ អោក ដែលជាបងប្រុសផ្សាយតាមវិទ្យុ និយាយលើកសរសើរពីរបបខ្មែរក្រហម។ ក្រោយៗមក ទូច លែងបានឮសំឡេង​បងប្រុសទៀត។ នៅឆ្នាំ១៩៧៨ អ្នកធ្លាប់ធ្វើបដិវត្តន៍ជាមួយបងប្រុសបានប្រាប់ ទូច ថា អោក ត្រូវបានអង្គការចាប់ខ្លួន។  នៅឆ្នាំដដែល ក្នុងសហករណ៍របស់ ទូច រស់នៅ មានកម្មាភិបាលខ្មែរក្រហមជាច្រើននាក់ត្រូវបានអង្គការចាប់ខ្លួន។ នៅឆ្នាំ១៩៧៩ ទូច បានរង់ចាំ អោក ត្រលប់​មកស្រុកកំណើតវិញ ប៉ុន្តែបានបាត់ដំណឹងបងប្រុសរហូតដល់សព្វថ្ងៃ។

បើយោងតាមឯកសារK00594 និង TSL2701 ដែលតម្កល់នៅមជ្ឈមណ្ឌលឯកសារកម្ពុជា សរសេរថា “ប្រែង អោក, ភេទប្រុស, មានអាយុ៤៥ឆ្នាំ, មានឪពុកឈ្មោះ ប្រែង ហេង, ម្តាយឈ្មោះម៉ប ប៉ុម និងមានប្រពន្ធឈ្មោះ ម៉ប ធៀប ត្រូវបានរបបខ្មែក្រហមចាប់ឃុំខ្លួននៅក្នុងផ្ទះ១១ បន្ទប់ធំ៥, តូច៩, មន្ទីរសន្តិសុខ​ ស-២១ គុកទួលស្លែង និងសម្លាប់នៅថ្ងៃទី២៨ ខែមីនា ឆ្នាំ១៩៧៨”។ ឯកសារសរសេរទៀតថា មុនពេលចាប់ខ្លួន អោក គឺជាលេខាស្រុកចន្ទ្រា​៕

អត្ថបទដោយ អេង សុខម៉េង ថ្ងៃទី២០ ខែកុម្ភៈ ឆ្នាំ២០២៥

សម្ភាសន៍ដោយ ផាន់ សុជា ថ្ងៃទី៣០ ខែសីហា ឆ្នាំ២០០៥