(ក្រចេះ)៖ ចាប សាត អាយុ៧៥ឆ្នាំ មានស្រុកកំណើតនៅភូមិអង្កាញ់ ឃុំអង្កាញ់ ស្រុកទ្រាំង ខេត្តក្រចេះ។ បច្ចុប្បន្នសាត រស់នៅភូមិអូរឫស្សី២ សង្កាត់អូរឫស្សី ក្រុងក្រចេះ ខេត្តក្រចេះ។

នៅអំឡុងពេលខ្មែរក្រហមកាន់កាប់អំណាច ទ្រព្យសម្បត្តិរបស់ប្រជាជនដែលមានទាំងប៉ុន្មាន ត្រូវប្រមូលដាក់រួមជាសមូហភាព មិនថាជាផ្ទះសំបែង សត្វពាហនៈ និងដំណាំជុំវិញផ្ទះ។ ជាក់ស្ដែងផ្ទះរបស់ សាត ត្រូវអង្គការរុះរើចោល។ ក្រោយពីបញ្ចូលរបស់ទាំងអស់នោះចូលជាទ្រព្យ​សមូហភាពរួចហើយ ប្រជាជនទាំងអស់មិនមានសិទ្ធិលើទ្រព្យសម្បត្តិទាំងអស់នោះទៀតហើយ សិទ្ធិនៃការប្រើប្រាស់ និងបែងចែកគឺនៅលើអង្គការជាអ្នកសម្រេច។

នៅក្នុងរបបខ្មែរក្រហម ប្រជាជនត្រូវបានអង្គការចាត់តាំងឲ្យធ្វើការងារទាំងយប់ទាំងថ្ងៃ មិនមានពេលសម្រាកគ្រប់គ្រាន់ បណ្ដាលឲ្យប្រជាជនមួយចំនួនធ្លាក់ខ្លួនឈឺ។ សាត ត្រូវអង្គការចាត់តាំងឲ្យ ធ្វើការងារនៅក្នុងកងចល័ត ដែលការងារទាំងនោះរួមមាន ជីកប្រឡាយ, លើកទំនប់, ស្ទូងស្រូវ, ច្រូតស្រូវ, លើកភ្លឺស្រែ និងការងារមួយចំនួនផ្សេងទៀត។ នៅពេលនោះ សាត មិនត្រឹមតែធ្វើការងារគ្មានពេលសម្រាកនោះទេ សូម្បីតែរបបអាហារដែលគាត់ទទួលបានក៏មិនគ្រប់គ្រាន់ដូចគ្នា។ របបអាហារដែលប្រជាជនទទួលបានគឺមានភាពខ្វះខាតច្រើន ព្រោះខ្មែរក្រហម ផ្ដល់ឲ្យប្រជាជនត្រឹម​បបររាវច្រើនជាង បាយ ហើយបបរនោះគឺមានទឹកច្រើនជាងគ្រាប់អង្ករ។

ខ្មែរក្រហម បានរៀបចំឲ្យមានគ្រូពេទ្យចាំព្យាបាលអ្នកជំងឺនៅតាមសហករណ៍នីមួយៗ ប៉ុន្តែគ្រូពេទ្យទាំងនោះមិនមានជំនាញវិជ្ជាជីវត្រឹមត្រូវនោះទេ។ គ្រូពេទ្យនៅតាមសហករណ៍ក្នុងរបបខ្មែរក្រហម ភាគច្រើនគឺជាប្រជាជនមូលដ្ឋានមានចំណេះដឹងទាប។ ខ្មែរក្រហមជ្រើសរើស និងបញ្ជូនប្រជាជនមូលដ្ឋានទាំងនោះឲ្យទៅសិក្សាជំនាញព្យាបាលជំងឺទូទៅ ហើយការសិក្សានោះមិនមានរយៈពេលវែងនោះទេ។ ការសិក្សាមានរយៈពេលយ៉ាងយូរត្រឹមតែបីខែប៉ុណ្ណោះ និងមួយចំនួនទៀតអាចបន្តការសិក្សាដល់រយៈពេលប្រាំមួយខែ ប៉ុន្តែមិនមានច្រើនឡើយ។

សាត ធ្លាប់បានដឹងដំណឹងពីការសម្លាប់មនុស្សនៅក្នុងរបបខ្មែរក្រហម ពីប្រជាជនដែលរស់នៅក្នុងសហករណ៍ជាមួយគ្នា។ ខ្មែរក្រហម តែងនាំប្រជាជនទៅដោយប្រាប់ថា នាំទៅធ្វើការនៅសហករណ៍ថ្មី ផ្លាស់ទីលំនៅថ្មី និងនាំទៅរៀនសូត្រ។ ពាក្យថារៀនសូត្រនៅត្រង់ចំណុចនេះមិនមែនរៀនអក្សរនោះទេ គឺនាំយកទៅសម្លាប់។ ចំពោះរឿងដែលខ្មែរក្រហមវាយកម្ទេចវត្តអារាម ឬចាប់ផ្សឹកព្រះសង្ឃ សាត មិនបានជួបផ្ទាល់នោះទេ គាត់បានត្រឹមតែឮពីអ្នករស់នៅសហករណ៍ជាមួយគ្នានិយាយប្រាប់គាត់ ។

បន្ទាប់ពីរបបខ្មែរក្រហមដួលរលំ សាត បានផ្លាស់ប្ដូរទីលំនៅពីខេត្តតាកែវ ទៅខេត្តក្រចេះវិញ។ បច្ចុប្បន្ន គាត់មានជំងឺលើសសម្ពាធឈាម ហើយគាត់ត្រូវលេបថ្នាំជាប្រចាំថ្ងៃ ផ្ដាសាយម្ដងម្កាល និងឈឺសន្លាក់ដៃជើង៕

សម្ភាសន៍ដោយ៖ អេង សុខជា នៅថ្ងៃទី១៥​ ខែកញ្ញា ឆ្នាំ២០២៤

អត្ថបទដោយ៖ នេន ស្រីមុំ នៅថ្ងៃទី២០ ខែកុម្ភៈ ឆ្នាំ២០២៥