ឌឿ ប្រាក់ ប្រើរូបសម្រស់ដ៏ទាក់ទាញ ដើម្បីប្រឆាំងបដិវត្តន៍ខ្មែរក្រហម
មេម៉ាយវ័យ២៣ឆ្នាំ ឌឿ ប្រាក់[1] បានប្រើរូបសម្រស់ដ៏ទាក់ទាញរបស់ខ្លួន នៅក្នុងផ្ទះបនមួយកន្លែង នៅម្តុំគុកក្រុងបាត់ដំបង ដើម្បីកសាងកម្លាំងក្បត់នៅក្នុងជួរទាហាន និងរៀបចំផែនការសម្លាប់ ហ៊ូ យន់ ទៀតផង។ ក្រុមអ្នកសួរចម្លើយ បានប្រើ«ទារុណកម្មធ្ងន់គួរសម»លើ ឌឿ ប្រាក់ ក្នុងគោលបំណងបង្ខំឲ្យបង្ហាញអំពីសកម្មភាពក្បត់ផ្សេងៗទៀត ទាក់ទងនឹងបណ្តាញរបស់ ចាន់ តារា (ដែលមានឋានន្តរសក្តិបី មេបញ្ជាការកងវរៈសេនាតូចកងការពារក្រុង និងជាមនុស្សរបស់ ចាន់ រង្សី) និង ឌិត ទិល (ដែលមានឋានន្តរសក្តិពីរ សៀមរាប និងជាមនុស្សរបស់ ចាន់ រង្សី ដែរ)។
ឌឿ ប្រាក់ មិនទាន់ត្រូវបានសម្លាប់នៅឡើយទេ នៅត្រឹមថ្ងៃទី១៥ ខែកញ្ញា ឆ្នាំ១៩៧៥ ដោយសារតែចម្លើយសារភាពនេះបានបង្ហាញអំពីវិធានការថ្មីថែមទៀត ដែលត្រូវ«បំប៉នឲ្យមានសុខភាពល្អឡើងវិញ»។ យោបល់របស់អ្នកសួរចម្លើយ ក៏បង្ហាញអំពីទស្សនៈមិនច្បាស់លាស់ថាតើ ឌឿ ប្រាក់ មិនព្រមឆ្លើយសារភាពអំពីខ្សែបណ្តាញរបស់ ចាន់ តារា និង ឌិត ទិល ឬក៏មិនស្គាល់មែន ឬមិនមានលើសពីអ្វីដែលបានឆ្លើយ។ ខាងក្រោមនេះគឺជាខ្លឹមសារនៃចម្លើយសារភាពរបស់ ឌឿ ប្រាក់៖
ឌឿ ប្រាក់ មានឪពុកឈ្មោះ ឌឿ ឌិញ និងម្តាយឈ្មោះ ប៊ុត នួន (ស្លាប់) ព្រមទាំងម្តាយចុងឈ្មោះ សោម យួម ដែលប្រកបរបរធ្វើស្រែចម្ការ នៅភូមិព្រែកខ្ពប ឃុំព្រែកខ្ពប ស្រុកសង្កែ ខេត្តបាត់ដំបង។ ប្រាក់ បានឈប់រៀនត្រឹមថ្នាក់ទី៩តែប៉ុណ្ណោះ ហើយមកជួយការងារស្រែចម្ការរបស់ឪពុកវិញ។ ឳពុកបានរៀបចំឲ្យមានប្តី នៅក្នុងខែឧសភា ឆ្នាំ១៩៧៣ ហើយលែងលះគ្នាវិញមួយខែក្រោយមក។ នៅក្នុងខែដដែលនេះ ប្រាក់ ចាប់ផ្តើមប្រកបរបររកស៊ីជាស្រីបន ដែល«យឹង»គឺជាថៅកែបនស្រី។ មុខរបបរនេះបានបណ្តាលឲ្យ ប្រាក់ ជួបជាមួយសក្តិបី ចាន់ តារា ដែលជាខ្សែបណ្តាញរបស់ ចាន់ រង្សី។ ចាន់ តារា បានចាត់តាំងឲ្យ ប្រាក់ ធ្វើជាអ្នកឃោសនា និងយកព័ត៌មាន។ ដោយមានការសហការពី ឌិត សម្បតិ្ត អ៊ុយ សាវ៉ាត និងប្រាក់ សាវ៉ាត់ ផង ប្រាក់ ធ្លាប់បានចូលរួមក្នុងសកម្មភាពសម្លាប់ ជៃ(ប្តី) និង ង៉ូវ (ប្រពន្ធ) ដែលជាកម្មាភិបាលបង្កប់របស់ខ្មែរក្រហមនៅក្នុងក្រុងបាត់ដំបង។ ប្រាក់ បានប្រើរូបសម្រស់ដើម្បីទាក់ទង នូ ពុំ ដែលកម្មាភិបាលវរសេនាតូច នៅថ្ងៃទី២០ ខែមេសា ឆ្នាំ១៩៧៥។
នៅក្នុងចម្លើយសារភាពនេះ ឌឿ ប្រាក់ បានចង្អុលបង្ហាញឈ្មោះអ្នកពាក់ព័ន្ធនៅក្នុងខ្សែបណ្តាញរបស់ ចាន់ តារា និង ឌិត ទិល ដែលសុទ្ធសឹងជាមនុស្សរបស់ ចាន់ រង្សី។ ទាក់ទងនឹងខ្សែ ចាន់ តារា ឈ្មោះមនុស្សចំនួន១៤នាក់ ដែល ឌឿ ប្រាក់ បានបង្ហាញឈ្មោះ រួមមាន៖ ចាន់ តារា, សោម សារិន, កែ ផល, កែ ភី, អ៊ុយ សាវ៉ាត, ចិន្តាហៅមុន, ដោក សោភ័ណ, តាត ឈឿន, វឿន, ប្រាក់ សាវ៉ាត់, ឌឿ ប្រាក់(ខ្លួនឯង), ឌិត ទិល, ស៊ាន សាំង (ដែលត្រូវសម្លាប់រួចហើយ) និង ចាយ សារ៉ន (ស្លាប់នៅសមរភូមិ)។ ចំណែកឯខ្សែបណ្តាញរបស់ ឌិត ទិល មានឈ្មោះចំនួនបីនាក់ ដែល ឌឿ ប្រាក់ បានរៀបរាប់ រួមមាន៖ ឌិត ទិល, ប៉ាច សឿម, និង ឌិត សម្បត្តិ។
នៅក្នុងចម្លើយសារភាពនេះ ឌឿ ប្រាក់ ក៏បានបង្ហាញឈ្មោះមនុស្សចំនួន៨នាក់ ដែលខ្លួនស្គាល់ឬអះអាងថា«ទាក់ទងបាន» រួមមាន៖ អ៊ុក ហាំ, ម៉ៅ ស្រង់, មាក ខ្ចៅ, ផឹង ទុន, ព្រាប អឿន, ជាងដូង, ជាងយ៉ន, និងជាងភឿន។ ចម្លើយសារភាពនេះបានបញ្ជាក់ថា ឌឿ ប្រាក់ គ្រានតែចង់ប្រើប្រាស់បណ្តាញមនុស្សទាំងនេះ ដើម្បីទាក់ទងជាមួយ ចាន់ តារា ដែលប្រពន្ធរបស់ ចាន់ តារានេះ ក៏ជាអ្នកភូមិព្រែកខ្ពបជាមួយខ្លួនដែរ។ មនុស្សក្នុងខ្សែនេះចំនួន៦នាក់ ក្នុងចំណោម៨នាក់ សុទ្ធសឹងជាកងកម្លាំងកុម្មង់ដូរ ហើយពីរនាក់ក្នុងចំណោមនេះអាចជាអ្នកមានលុយកាក់ច្រើន។ ឧទាហរណ៍ ឌឿ ប្រាក់ បានចង្អុលបង្ហាញថា ម៉ៅ ស្រង់ គឺជា«កំពូលអ្នកមាន»នៅភូមិព្រែកខ្ពប។
តែទោះយ៉ាងណាក៏ដោយ ការសង្កេតរបស់អ្នកសួរចម្លើយបានបង្ហាញថា៖ «ពួកចាស់ៗអស់នេះ ម្យ៉ាងធ្វើតាមការចាត់តាំង…តែម្យ៉ាងទៀតក្មេងៗ មាននារី ឌឿ ប្រាក់, កែ ភី, ឌិត សម្បត្តិ។ វាចុះឡើងៗ អ៊ុំអញ្ចេះ, មាអញ្ចុះ រហូតមក»។
បន្ទាប់មក ឌឿ ប្រាក់ ក៏បានប្រើសម្រស់របស់ខ្លួនទាក់ទងជាមួយគណៈកងវរសេនាតូចឈ្មោះ នូ ពុំ ដែលបានរួមដំណើរជាមួយគ្នាមកភ្នំពេញ ដើម្បីតាមសម្លាប់ ហ៊ូ យន់។ ទាំងពីរនេះ មានបំណងសួររក ហ៊ូ យន់ ឲ្យជួយ ដោយសារខ្លួនកំពុងមានរឿងរ៉ាវនៃការ«ពង្រាត់ស្រី»។
ចម្លើយសារភាពនេះក៏មានសេចក្តីសន្និដ្ឋានរួមរបស់ក្រុមអ្នកសួរចម្លើយដែរ ដែលបានវាយតម្លៃចម្លើយរបស់ ឌឿ ប្រាក់ ទៅតាមចំនួនភាគរយនៃភាព«ពិត»ឬ«មិនពិត»ទៀតផង។ លទ្ធភាពនៃភាព«ពិត»រហូតដល់៦០ភាគរយ ត្រូវបានវាយតម្លៃ នៅត្រង់ចម្លើយសារភាពរបស់ ឌឿ ប្រាក់ ទាក់ទងនឹងខ្សែរបស់ ចាន់ តារា និងឌិត ទិល ខណៈដែលលទ្ធភាព«ពិត»មានត្រឹមតែ៥០ភាគរយប៉ុណ្ណោះ ទាក់ទងនឹងផែនការកំទេចស្ពានពោធិ៍សាត់ ដែលគ្រោងផ្ទុះអាវុធនៅក្នុងឆ្នាំ១៩៧៦ឬ១៩៧៧។ ចំណែកឯការវាយតម្លៃលើចម្លើយសារភាពរបស់ ឌឿ ប្រាក់ ទាក់ទងនឹង«ខ្សែក្រុង ខ្សែជាយក្រុងភ្នំពេញ របស់ ឌិត ទិលនិងចាន់ តារា មានកម្រិតត្រឹមតែ៤៥ភាគរយ ឬ៥០ភាគរយ។
ក្រុមអ្នកសួរចម្លើយបានបង្ហាញពីការប្រឌិតឈ្មោះទាំងស្រុង ឬ«ប្រឌិត១០០%» ដោយសារតែភាពមិនច្បាស់លាស់។ នៅក្នុងចម្លើយសារភាពពីមុន វ៉ាញ និង ឃីម ត្រូវបានកំណត់អត្តសញ្ញាណថាជាប្រុសដូចគ្នា។ ផ្ទុយទៅវិញ វ៉ាញ និង ឃីម គឺជាប្តីប្រពន្ធ។ ក្រុមអ្នកសួរចម្លើយក៏មិនច្បាស់ដែរថាតើខ្សែរបស់ ចាន់ តារា និង ឌិត ទិល «អាចមានតែមនុស្សក្នុងខ្សែនេះ ឬវាមិនទាន់សុខចិត្តនិយាយ ឬវាមិនស្គាល់មែន»។ ដូច្នេះហើយ ចម្លើយសារភាពបានបញ្ជាក់នៅត្រង់ឃ្លាមួយថា វិធានការកន្លងមកបានដាក់«ទារុណកម្មធ្ងន់គួរសមហើយ» ព្រមទាំងបានធ្វើសតិអារម្មណ៍នយោបាយផង។ ឌឿ ប្រាក់ នឹងត្រូវបំប៉នឲ្យមានសុខភាពប្រសើរឡើងវិញ ដើម្បីធ្វើការសួរបន្តទៀត។ ចំណែកឯ នូ ពុំ បានធ្លាក់ខ្លួនឈឺរហូត ចាប់តាំងពីការចាប់ខ្លួនជាមួយ ឌឿ ប្រាក់ ប៉ុន្តែនឹងត្រូវសួរចម្លើយសារនៅពេលមានសុខភាពមាំទាំល្អ៕
សង្ខេបពីចម្លើយសារភាពដោយ លី សុខឃាង
[1] ចម្លើយសារភាពនេះមានលេខ J00341 របស់«នារី ឌឿ ប្រាក់ ចាប់ពីសេដ្ឋកិច្ច វរៈសេនាតូចមួយរបស់ពាយព្យ ជាមួយប្តី (នូ ពុំ) ដែលឯកសារនេះមានរក្សទុកនៅក្នុងការិយាល័យរបស់មជ្ឈមណ្ឌលសន្តិភាពអន្លង់វែង នៃមជ្ឈមណ្ឌលឯកសារកម្ពុជា។ ភាគច្រើន ឬសឹងតែទាំងអស់នៃ ចម្លើយសារភាពបានកើតចេញពីអំពើទារុណកម្ម៕