ហួត ហាំ បម្រើការជាខ្សែរយៈប្រជៀវក្រហម
ហួត ហាំ[1] ដែលមានឈ្មោះបដិវត្តិន៍ ហួត ហីម បានសរសេរនៅក្នុងចម្លើយសារភាពរបស់ខ្លួនថា៖ «ខ្ញុំឈ្មោះហួត ហាំ ភេទប្រុស អាយុ២២ឆ្នាំ (១៩៧៥)។ ខ្ញុំមានស្រុកកំណើតនៅភូមិត្រពាំងស្វាយ ឃុំសស្ដំ ស្រុកពួក តំបន់៣០៤ (សៀមរាប)។ ខ្ញុំមានបងប្អូនចំនួន៦នាក់ (ប្រុស៥នាក់ និងស្រី១នាក់)។
មុនបដិវត្ដន៍ ខ្ញុំប្រកបរបរធ្វើស្រែ និងស៊ីឈ្នួលកៀរត្រីឲ្យគេ មានវណ្ណៈភាពជាកសិករកណ្ដាលថ្នាក់ក្រោម។ ខ្ញុំបានចូលរួមក្នុងចលនាបដិវត្ដន៍ខ្មែរក្រហមនៅខែមេសា ឆ្នាំ១៩៧៣ ដោយមាន ហាប់ បួន ជាអ្នកឧទេ្ទសនាមខ្ញុំចូលទៅក្នុងកងយោធានៅតំបន់វរសេនាតូច៣០៤។ ខ្ញុំធ្លាប់ប្រយុទ្ធគ្នានៅសមរភូមិជ្រោយរមួន បន្ទាប់មកខ្មាំងបានចាប់ខ្លួនខ្ញុំនៅចុងខែមេសា ឆ្នាំ១៩៧៣។ ការចាប់ខ្លួននេះ ដោយសារតែខ្ញុំមិនមានភាពដាច់ខាតចំពោះខ្មាំង។
ខ្ញុំត្រូវបានខ្មាំងបញ្ជូនមកកាន់ខេត្ដឧត្ដរមានជ័យរយៈពេល៧ថ្ងៃ បន្ទាប់មកបញ្ជូនទៅគុកព្រៃស បន្ទាប់មកទៀតបញ្ជូនមកគុកផ្សារចាស់។ នៅគុកផ្សារចាស់ ខ្មាំងបានបង្រៀនខ្ញុំរយៈពេលជាង១ខែ អំពីទ្រឹស្ដីកុម្មុយនីស្ដ, ទ្រឹស្ដីយួនកុម្មុយនីស្ដ, ទ្រឹស្ដីកាល់ម៉ាក្ស, ទ្រឹស្ដីម៉ាឡេនីន, ទ្រឹស្ដីលោកសេរី និងរៀនពីទ្រឹស្ដីរបបសាធារណរដ្ឋ។ នៅពេលនោះ គឹម អាន បានចាត់តាំងខ្ញុំមិនឲ្យជឿលើខ្មែរក្រហម ដោយសារឃោសនាថា ខ្មែរក្រហមជាខ្ញុំកញ្ជះរបស់យួនកុម្មុយនីស្ដ ឃោសនាមិនឲ្យជឿលើចិនកុម្មុយនីស្ដ ថាចិនកុម្មុយនីស្ដជាអ្នកឈ្លានពានខ្មែរ, ឃោសនា ឬបំផុសបំផុលបំបែកបំបាក់ប្រឆាំងនឹងចលនាតស៊ូបដិវត្ដក្នុងគុក ដោយសារអ្នកតស៊ូក្នុងគុកក្បត់នឹងអង្គការបដិវត្ដន៍, ឃោសនាមិនឲ្យជឿលើកម្លាំងបដិវត្ដន៍ ដោយសារបដិវត្ដន៍មិនអាចធ្វើអ្វីឈ្នះគេនោះទេ ពីព្រោះសម្ភារក៏គ្មាន កាណុងក៏គ្មាន យន្ដហោះក៏គ្មាន គ្រាប់រំសេវសុំគេ តើវាយយ៉ាងម៉េចឈ្នះអាមេរិក ឃោសនាពីរបបសាធារណៈរដ្ឋ លើកថាសាធារណរដ្ឋគឺស្អាតស្អំ យុត្ដិធម៌ សម្បូរគ្រប់មុខ មានតាំងយន្ដហោះគ្រប់ម៉ាក កាណុងគ្រប់ធន់ គ្រាប់មិនចេះខ្វះ អាចវាយឈ្នះបដិវត្ដន៍ សម្ភាររស់នៅសម្បូរតាំងពីការស្លៀកពាក់ ស៊ីចុក សម្បូរលុយចាយ ធ្វើការមានប្រាក់ខែរស់នៅស្រួល មិនរស់នៅដូចតំបន់រំដោះ ឃោសនាអំពីខ្មែររំដោះធ្វើការងារគ្មានប្រាក់ខែ ធ្វើបាបកម្ម កាប់សម្លាប់ប្រជាជនគ្មានគិតគូរ សម្លាប់លោកសង្ឃ រស់នៅខ្វះសព្វមុខ ខ្មែររំដោះ គឺក្បត់ជាតិ ហើយជាកញ្ជះរបស់យួន និងចិនកុម្មុយនីស្ដ។
នៅពេលចេញពីគុកមុនដំបូង ខ្ញុំបានរស់នៅក្នុងកងវរ៧០៦ កងពលទី២ វរសេនាតូច អនុសេនាធំ និងអនុសេនាតូច នៅអង្គភាពវរសេនាធំ៧០៦ បានចំនួន១០ថ្ងៃ នាទីជាយុទ្ធជន បន្ទាប់មកអង្គការបានបញ្ជូនខ្ញុំទៅកាន់ពាណិជ្ជកម្មរដ្ឋផ្នែកភស្ដុភារនៅឯទួលគោក។ បន្ទាប់ពីទទួលបានការចាត់តាំងឈ្មោះហើយ ខ្ញុំបានឃោសនាបំផុសបំផុលអូសទាញមនុស្សបានចំនួន៤នាក់។ ខ្ញុំបានរាយការណ៍អំពីសកម្មភាពនៅក្នុងគុកទៅឲ្យ អាន ចំនួន២ដង៖ លើកទី១ ខ្ញុំបានអូសទាញបានម្នាក់ឈ្មោះ អ៊ុយ នី និងឈានទៅដល់ការចាប់ខ្លួនចំនួន៣នាក់ទៀតយកទៅដាក់គុកសាលាចិន។
លើកទី២ ខ្ញុំរាយការណ៍អំពីការអូសទាញបានមនុស្សចំនួន៣នាក់ ហើយឈានទៅដល់ការចាប់ខ្លួនមនុស្សចំនួន២នាក់ផ្សេងទៀត។ ក្រោយមក ខ្ញុំត្រូវបានដោះលែងមកវិញ ហើយខ្ញុំក៏បានទៅជួបជាមួយ ថែ ដើម្បីទទួលផែនការបំបែកបំបាក់សាមគ្គីភាពក្នុងកងជួរ និងកៀងគរប្រមូលកម្លាំងឲ្យចូលក្នុងខ្សែរយៈប្រជៀវក្រហម ដើម្បីសម្លាប់កម្មាភិបាលណាដែលរឹងរូស។ មនុស្សចំនួន២នាក់ បានចូលក្នុងចលនាបំផុសបំផុលជាមួយខ្ញុំ ដើម្បីបំផ្លិចបំផ្លាញគ្រឿងចក្រ យានយន្ដ ផ្ដាច់ខ្សែភ្លើង ឃោសនាបំបែកក្នុងជួរបដិវត្ដន៍ ទាំងកម្មាភិបាល ទាំងយុទ្ធជន ដែលមិនព្រមចូលធ្វើជាខ្សែរយៈប្រជៀវក្រហម ឃោសនាឲ្យខិតខំប្រមូលកម្លាំងឲ្យចូលក្នុងខ្សែរយៈប្រជៀវក្រហម ដើម្បីវាយកម្លាំងបដិវត្ដន៍ដែលរឹងរូសមិនព្រមចូលខាងប្រជៀវក្រហមក្នុងការឃោសនានេះ នៅក្នុងខែឧសភា ឆ្នាំ១៩៧៥។ ខ្ញុំឃោសនាបានចំនួន១៨នាក់ទៀត ដោយខ្ញុំបានបំផុសបំផុលឲ្យចូលក្នុងខ្សែរយៈប្រជៀវក្រហម ជម្រុញឲ្យមានការដុតផ្ទះចំនួន៥ខ្នង និងសម្ភារមួយចំនួនទៀតដូចជា៖ ឆ្នាំង កែវ តុ ទូ គ្រែ ក្រៅពីនេះ នៅមានការរាយការណ៍អំពីខ្មែរសេរីនៅក្នុងគុកដែលខ្ញុំទាក់ទង។
គួរបញ្ជាក់ថា ចំពោះសញ្ញាបញ្ជាក់ថាជាខ្សែរយៈប្រជៀវក្រហម គឺមានការជួបជុំគ្នាច្រើនហើយចង់ទាក់ទងគ្នាដើម្បីឲ្យស្គាល់ជាខ្សែរយៈប្រជៀវក្រហម គឺមួកពាក់ផ្អៀងទៅខាងឆ្វេង, មិនឲ្យបង់កក្រមា ពាក់រូបផ្កាយក្រហមលើហោប៉ៅអាវខាងឆ្វេង, មូលដៃអាវខាងឆ្វេងលើគួយដៃ។ ក្រៅពីនេះ ខ្សែរយៈនេះ បានបង្ហាញតាមរយៈការយកក្រដាសចេញពីហោប៉ៅខោ យកមកមូលនៅខាងមុខ បើមានអ្នកមូលក្រដាសឆ្លើយតាម អ្នកនោះជាខ្សែរយៈប្រជៀវក្រហម ហើយចេញទៅវិញទាក់ទងគ្នាដោយសម្ងាត់ ហើយលាក្រដាសនោះមើលឃើញសរសេរអក្សរជាសញ្ញាប្រជៀវក្រហម នោះពិតជាគ្នាយើង ហើយសួរថាធ្វើបានប៉ុន្មាន ហើយបើមានឆ្លើយតាមមាន។ ចម្លើយសារភាពត្រូវបានធ្វើឡើងនៅថ្ងៃទី៤ ខែកញ្ញា ឆ្នាំ១៩៧៥»៕
សង្ខេបចេញពីចម្លើយសារភាពដោយ សួត វិចិត្រ
[1] ចម្លើយសារភាពរបស់ ហួត ហាំ ឯកសារលេខAV DC-Cam J0863។ បញ្ជាក់ ៖ ចម្លើយសារភាពមិនត្រូវបានចាត់ទុកថាត្រឹមត្រូវទាំងស្រុងទេ ដោយសារតែជាចម្លើយដែលកើតចេញពីអំពើទារុណកម្ម។