ឯកសារលេខ J០០១០១[1] ដែលផ្នែកក្របមុខបានបង្ហាញពីឈ្មោះ ខែម ហ៊ួត[2] មាននាទីជាមេពួក ផ្នែកវាស់ស្ទង់ មន្ទីរ វ-៦៦ និង បានចូលក្នុងបក្ស សេ-អ៊ី-អា[3] នៅខែសីហា ឆ្នាំ១៩៧៦។ ជនសង្ស័យជាច្រើនក្នុងរបបខ្មែរក្រហម ត្រូវអង្គការចោទប្រកាន់ថា បក្ខពួក សេ-អ៊ី-អា ជាខ្មាំង និងត្រូវចាប់យកទៅសម្លាប់ជាបន្តបន្ទាប់។ ទំព័របន្ទាប់នៃឯកសារគឺឃើញសរសេរសេចក្ដីរាយការណ៍ជូនអង្គការអំពីប្រវត្តិផ្ទាល់ខ្លួនរបស់ ខែម ហ៊ួត និងក្រុមគ្រួសារ សកម្មភាពចូលបដិវត្តន៍ សកម្មភាពក្បត់ ប្រវត្តិនៃសកម្មភាពខ្សែសង្វាក់ចាត់តាំង និង ចុងក្រោយរាយការណ៍ពីឈ្មោះខ្សែសង្វាក់ដែលខ្លួនបានស្គាល់ក្នុងជួរកងពល១៧០ របស់ចាន់ ចក្រី មានតួនាទីជាមេបញ្ជាការកងពល១៧០ ដែលត្រូវអង្គការចាប់ និងសម្លាប់នៅខែឧសភា ឆ្នាំ១៩៧៦។ ផ្អែកតាមសៀវភៅប្រវត្តិសាស្រ្តកម្ពុជាប្រជាធិបតេយ្យ (១៩៧៥-១៩៧៩) បានលើកឡើងថា នៅពេលដែលខ្មាំងប្រឆាំងនិងអង្គការ ត្រូវបានរកឃើញ ឈ្មោះរបស់អ្នកទាំងនេះនឹងត្រូវរាយការណ៍ទៅគណៈកម្មាធិការឃុំ ឬ គណៈកម្មាធិការស្រុក បន្ទាប់មកទៀតអ្នកទាំងនោះនិងត្រូវចាប់ខ្លួន[4]។ ហេតុនេះ យើងអាចសន្និដ្ឋានបានថា ការចាប់ខ្លួនរបស់ ខែម ហ៊ួត មកកាន់មន្ទីរស-២១ គឺបន្ទាប់ពីសម្លាប់ ចាន់ ចក្រី និងបក្ខពួកក្នុងកងពល១៧០ ព្រមទាំងសមាជិកស្ថិតនៅតំបន់បូព៌ាជាច្រើនទៀត។

ខាងក្រោមនេះគឺជាសេចក្ដីរាយការណ៍របស់ ខែម ហ៊ួត ជូនអង្គការ៖

ខែម ហ៊ួត នៅលីវ អាយុ២៣ឆ្នាំ (ក្នុងឆ្នាំ១៩៧៧) កើតនៅភូមិគោកសុក្រំ ឃុំស្មោងខាងជើង ស្រុកកំចាយមារ ខេត្តព្រៃវែង។ ឪពុកឈ្មោះ ហ៊ន អាយុ៥៧ឆ្នាំ  និង ម្តាយឈ្មោះ យាន អាយុ៥៥ឆ្នាំ អ្នកទាំងពីរនៅរស់ (ក្នុងឆ្នាំ១៩៧៧) និងមុនរបបខ្មែរក្រហមបានប្រកបមុខរបរធ្វើស្រែ។ ខែម ហ៊ួត មានបងប្អូនចំនួន៦នាក់ ក្នុងនោះមានប្រុសចំនួន២នាក់ និង ស្រីចំនួន៤នាក់។ ឪពុកម្តាយ និង បងប្អូន ខែម ហ៊ួត គ្មានជាប់ពាក់ព័ន្ធនិន្នាការនយោបាយអ្វីឡើយ។ បើនិយាយពីចរិតលក្ខណៈរបស់ ហ៊ួត គឺជាមនុស្សច្រងេងច្រងាង ចូលចិត្តសប្បាយហ៊ឺហា ភ្លើតភ្លើន ចង់ហូបឆ្ងាញ់ ចង់រស់នៅស្រណុកស្រួល និង ឡូឡាអាវ៉ាសែ។

សកម្មភាពចូលបដិវត្តន៍

ខែម ហ៊ួត បានចូលបម្រើការងារបដិវត្តន៍ដំបូង នៅសង្កាត់ស្មោងខាងជើង តាមរយៈឈ្មោះ ភក្ដី ជាអ្នកទទួលខុសត្រូវ។ ឈ្មោះ ភក្ដី មាននាទីជាប្រធានសង្កាត់ស្មោងខាងជើង បច្ចុប្បន្នក្ដាប់តួនាទីមិនបាន។ ហ៊ួត ស្ថិតក្រោមការគ្រប់គ្រងរបស់ ភក្តី បានរយៈ៣ខែ ប៉ុណ្ណោះ។  ភក្តី ចូលទៅធ្វើការនៅក្នុងមន្ទីរកាន់ផ្នែកទូរសព្ទរបស់វរសេនាធំ៧២។ បន្ទាប់មកទៀត ហ៊ួត ត្រូវនៅក្រោមការគ្រប់គ្រងឈ្មោះ ស ភឿន រយៈពេល១ឆ្នាំ៨ខែ។ ស ភឿន មានតួនាទីជាអ្នកនយោបាយវរសេនាធំ៧៣ បច្ចុប្បន្នធ្វើការនៅអង្គភាពអនុសេនាធំលេខ១៧។  ក្រោយមកទៀត មានឈ្មោះ បឿន មាននាទីនយោបាយកងធំ១៧ មកជំនួស ស ភឿន។ បឿន ក៏បន្តមកធ្វើការនៅមន្ទីរ វ-៦៦ បានរយៈពេល២ឆ្នាំ ក៏មានឈ្មោះ តែម មាននាទីជាប្រធានមន្ទីរ វ-៦៦ មកគ្រប់គ្រងមន្ទីរដល់សព្វថ្ងៃ។

សកម្មភាពជាខ្សែសង្វាក់ចាត់តាំង

ស្ថិតនៅក្នុងមន្ទីរវ-៦៦ ក្រោមការគ្រប់គ្រងរបស់ឈ្មោះ សុខ មានតួនាទីជាមេក្រុមទូរលេខនៅមន្ទីរ វ-៦៦ បានអប់រំ ហ៊ួត ឱ្យឃើញថាបដិវត្តន៍មានភាពខ្មៅងងឹត ការរស់នៅគ្មានសិទ្ធិសេរីភាព ទៅណាមកណាត្រូវមានការសុំអនុញ្ញាតពីអង្គការ ធ្វើការងារច្រើន គ្មានសម្លៀកបំពាក់ស្អាតបាត គ្មានពេលឈប់សម្រាក គ្មានមុខមាត់បុណ្យសក្តិ ហូបចុកមិនបានគ្រប់គ្រាន់ និង មិនបានហូបឆ្ងាញ់។  សុខ បានបន្ថែមទៀតថា ក្នុងរបបខ្មែរក្រហមគឺរស់នៅលំបាក ហេតុនេះយើងត្រូវការរស់នៅដូចសង្គមចាស់ មានប្រាក់ខែ ស្រីស្រា សប្បាយហ៊ឺហា ស៊ីផឹកសម្បូរបែប រស់នៅបែបឯកជន ទៅណាមកណាតាមចិត្ត ហេតុនេះត្រូវពង្រឹងរបបចាស់ឡើងវិញ។ ក្រោយពីស្ដាប់សំដី សុខ រួចមក ហ៊ួត ក៏ចូលរួមធ្វើសកម្មភាពប្រឆាំងបក្សជាបន្តបន្ទាប់។ ដល់ខែសីហា ឆ្នាំ១៩៧៦ សុខ ក៏បញ្ចូលខ្ញុំ និង សមាជិកពីរនាក់ទៀតឈ្មោះ ជឿន នាទីយុទ្ធជន នៅមន្ទីរវ-៦៦ និង ឆេង នាទីជាមេពួក នៅមន្ទីរ វ-៦៦ ចូលជាកម្លាំង សេ-អ៊ី-អា។ ក្រោយពីចូលជាកម្លាំង សេ-អ៊ី-អា ហ៊ួត, ជឿន និង ឆេង បានចូលរួមប្រជុំទទួលផែនការក្បត់ដូចជា៖ ១) ដើរអូសទាញកម្លាំងណាដែលចូលចិត្តផ្នែកសេរី ចូលមកកម្លាំងបក្ស។ ២) ផែនការណ៍កម្ទេចវិទ្យុទាក់ទងរបស់អង្គការ។ ៣) ដុតរោងចក្រ ឃ្លាំងគ្រាប់រំសេវ អាវុធ ឃ្លាំងសាំង និងទម្លាក់ដីចូលសាំង។ ៤) ផែនការណ៍កម្ទេចកម្លាំងបដិវត្តន៍ នៅពេលដែលយុទ្ធជន និង កម្មាភិបាលដែលដើរដាច់ដោយឡែកពីគេ។ ៥) បំផ្លាញម៉ាស៊ីនកែវស្ទង់ និង  ៦) ធ្វើឱ្យមានទំនាស់ថ្នាក់ដឹកនាំ។ ក្រៅពីនេះ ហ៊ួត ក៏ទាក់ទងបានកម្លាំងបន្ថែមពីរនាក់ទៀត ឈ្មោះ ធី នាទីជាយុទ្ធជន កងចាស់វរសេនាធំ១៥៣ កងថ្មីនៅមន្ទីរវ-៦៦ សកម្មភាពរបស់ ធី គឺទំនាស់ថ្នាក់ដឹកនាំ សេរី ខ្ជិលធ្វើការ មិនពេញចិត្តចំពោះការដឹកនាំបដិវត្តន៍។ ឈ្មោះ ធឿន នាទីជាយុទ្ធជន កងចាស់វរសេនាធំ១៥៣ កងថ្មី នៅមន្ទីរវ-៦៦ សកម្មភាពរបស់ឈ្មោះនេះ គឺទំនាស់ថ្នាក់ដឹកនាំ សេរី ខ្ជិលធ្វើការ មិនពេញចិត្តចំពោះការដឹកនាំបដិវត្តន៍។ តែឈ្មោះទាំងពីរខាងលើ មិនបានចូលរួមជាកម្លាំង សេ-អ៊ី-អា នោះទេ។

ចំពោះឈ្មោះដែល ហ៊ួត ធ្លាប់ស្គាល់ស្ថិតក្នុងជួរកម្លាំងកងពល១៧០ របស់ ចាន់ ចក្រី មានដូចជា៖ សុខ នៅមន្ទីរវ-៦៦ នៅកងពលចាស់ ១៧០។ ឈុំ នៅកងចាស់ ១៧០ នាទីនយោបាយកងធំ បច្ចុប្បន្នទៅ១៧០។ អាត នៅកងចាស់១៧០ នាទីកាន់តេអូ១៧០ បច្ចុប្បន្នក្ដាប់មិនបាន។ យ៉ាន កងចាស់១៧០ នាទីក្ដាប់មិនបាន។ ឡេន នៅកងចាស់១៧០ នាទីយុទ្ធជន បច្ចុប្បន្នក្ដាប់មិនបាន។ រ៉េន កងចាស់១៧០ នាទីនយោបាយកងតូច បច្ចុប្បន្នក្ដាប់មិនបាន។ ឈ្មោះ វាស្នា នៅកងចាស់១៧០ មាននាទីជាយុទ្ធជនយោធាធំ បច្ចុប្បន្នក្ដាប់មិនបាន។ ឈ្មោះ ឡុច កងចាស់១៧០ នាទីកាន់តេអូ១៧០ បច្ចុប្បន្នក្ដាប់មិនបាន និងឈ្មោះ សីហា កងចាស់១៧០ នាទីនយោបាយកងតូច បច្ចុប្បន្នក្ដាប់មិនបាន។

ចុងបញ្ចប់នៃសេចក្ដីរាយការណ៍ គឺបានបញ្ជាក់ថា ឈ្មោះអ្នកទាំង៩នាក់ខាងលើនេះ គឺត្រូវអង្គការបញ្ជូនទៅអង្គភាពវិញហើយ។ យើងអាចសន្និដ្ឋានបានថាឈ្មោះខាងលើនេះត្រូវអង្គការចាប់បាន និង សម្លាប់៕

អត្ថបទដោយ៖ មីន សាណាស់

[1] ឯកសារសេចក្ដីរាយការណ៍ពីសកម្មភាពរបស់ ខែម ហ៊ួត ជាមេពួក ផ្នែកវាស់ស្ទង់ ស្ថិតនៅក្នុងមន្ទីរ វ-៦៦, ដែលឯកសារនេះតម្កល់នៅមជ្ឈមណ្ឌលឯកសារកម្ពុជា មានចំនួន៧ទំព័រ។

[2] ខែម ហ៊ួត កើតនៅភូមិគោកសុក្រំ ឃុំស្មោងខាងជើង ស្រុកកំចាយមារ ខេត្តព្រៃវែង។ ដែលបានផ្ដល់សេចក្តីរាយការណ៍អំពីសកម្មភាពរបស់ខ្លួនជូនអង្គការនៅក្នុងឯកសារ J00101។

[3] សេ-អ៊ី-អា ជាភា្នក់ងារស៊ើបការសម្ងាត់របស់អាមេរិក ជនសង្ស័យជាច្រើនក្នុងរបបខ្មែរក្រហម ត្រូវចោតប្រកាន់ (ត្រូវបានរបបខ្មែរក្រហមចាត់ទុកជាខ្មាំងសត្រូវខាងក្រៅ ដែលត្រូវកម្ទេច)។ ដកស្រង់ចេញ សៀវភៅ ប្រវត្តិសាស្រ្តកម្ពុជាប្រជាធិបតេយ្យ (១៩៧៥-១៩៧៩) បោះពុម្ពដោយ មជ្ឈមណ្ឌលឯកសារកម្ពុជា ក្នុងឆ្នាំ២០២០ (ទំព័រ៤៨)

[4] ដកស្រង់ចេញ សៀវភៅ ប្រវត្តិសាស្រ្តកម្ពុជាប្រជាធិបតេយ្យ (១៩៧៥-១៩៧៩) បោះពុម្ពដោយ មជ្ឈមណ្ឌលឯកសារកម្ពុជា ក្នុងឆ្នាំ២០២០ (ទំព័រ៥៦)