ឯកសារចម្លើយសារភាពសរសេរដោយដៃចំនួន៣៦ទំព័រ ជារបស់ គឹម ថាំ ​ មុនអង្គការចាប់ខ្លួន ​ជា​ សមាជិកក្នុងអង្គភាពយោធា វរតូច៣៣២ វរធំ៣៣ កងពលលេខ៧០៣ ​។ ​​តាមរយៈចម្លើយសារភាពនៅក្នុងឯកសារនេះ (J00​៤៣០)[1] ​បង្ហាញអំពីសកម្មភាព ឈ្មោះ ថាំ ចូលបម្រើ​ក្នុងជួរបដិវត្តន៍ដែលទទួលផែនការពីឈ្មោះ ដាក វិន ដែលជាជនជាតិវៀតណាម មានតួនាទីជាមេទ័ព ​។ ក្នុងការធ្វើបដិវត្តន៍នេះ ថាំ ​បាន​ជាប់ពាក់ព័ន្ធ​ជាមួយមនុស្សចំនួន៦៦នាក់ ដោយធ្វើផែនការបំផ្លាញកម្លាំងបដិវត្តន៍ ​និងបំផុសឲ្យយុវជន រត់ចោលខ្សែត្រៀម ។  រហូតមកដល់ថ្ងៃទី០២ ខែ​សីហា ឆ្នាំ១៩៧៧ ​ថាំ ត្រូវបានអង្គការចាប់ខ្លួន ។  នៅ​ក្នុង​អត្ថបទនេះ យើងឃើញមានការចុះហត្ថលេខា ​និងឈ្មោះ ​អ្នកសួរចម្លើយ​ជាកម្មាភិបាលខ្មែរក្រហម​ រួមជាមួយសាម៉ីខ្លួនផង  និងបានកត់ត្រា កាលបរិច្ឆេទនៅថ្ងៃទី១១ ខែកញ្ញា ឆ្នាំ១៩៧៧ ។ ​ ​ខាងក្រោមនេះ ជាចម្លើយសារភាពរបស់ ​គឹម ថាំ ​៖

គឹម ថាំ ភេទប្រុស អាយុ ២៩ ឆ្នាំ នៅលីវ មានស្រុកកំណើតនៅភូមិគគីរធំ ឃុំគគីរធំ ស្រុក១៦ តំបន់២៥ ។ នៅអាយុ១២ ឆ្នាំ ថាំ បានចូលរៀននៅសាលាវត្តពោធិ៍ ​រហូតដល់ថ្នាក់ទី១0 ក៏ឈប់រៀនត្រឡប់មកជួយរកស៊ីជាមួយឪពុកម្ដាយវិញ ។

នៅឆ្នាំ ១៩៦៦ ថាំ ​ធ្វើជាអ្នកស៊ីឈ្នួលចាំចម្ការ​ ឲ្យឈ្មោះ ទឹម កឺន អតីតកុង្សី ខាងច្បាប់ នៅភូមិថ្នាប់ ឃុំទឹកឈូ ស្រុកឈូក ខេត្តកំពត ។ ពេលនោះ ឈ្មោះ  កឺន ចាត់តាំងឲ្យ ថាំ ធ្វើជាប៉ូលិសយាមផ្ទះ​ ។ ​ធ្វើបានរយៈពេល៤ខែ ថាំ ក៏ត្រឡប់មកផ្ទះវិញ ។  ​ក្រោយមក តាមរយៈ សាត ​អប់រំ ថាំ ​ ​ផ្ដោតលើខ្លឹមសារ ចូលទៅបន្លំខ្លួន​ធ្វើបដិវត្តន៍ ជាមួយឈ្មោះ វ៉ន (ស្លាប់ឆ្នាំ១៩៧០) មានតួនាទី មេទ័ពរំដោះប្រចាំនៅភូមិនិរតី (ភូមិភាគ៤០៥) ស្ថិតក្នុងស្រុកលើកដែក តំបន់២៥ នៃខេត្តកណ្ដាល [2]​ ។ នៅខែមេសា ឆ្នាំ១៩៧០ ​ តាមរយៈឈ្មោះ ដាក វិន ដែលជាជនជាតិវៀតណាម មានតួនាទីជាមេទ័ព បានឲ្យ ថាំ ចូលធ្វើ​បដិវត្តន៍ ​នៅ​កង លេខ០៤០ ​ និង​​ចាំទទួលទាហាននៅបន្ទាយកំពង់ភ្នំ ​។  ​មិនយូរប៉ុន្មាន ថាំ បាន​ចេញពីអង្គភាពវៀតណាម មកនៅក្នុងអង្គភាពខ្មែរវិញ ប៉ុន្តែស្ថិតក្រោមការដឹកនាំរបស់វៀតណាមដដែល។ រស់នៅ​បានរយៈពេល២ខែ ថាំ ​ក៏ស្គាល់​មនុស្ស៤នាក់ ​ទទួលការអប់រំពី ឈ្មោះ សិទ្ធិ ​នៅភូមិប្រាសាទ ស្រុក១៦ តំបន់២៥ ​មាន​ខ្លឹមសារថា ការធ្វើបដិវត្តន៍យើងត្រូវចេះសហការណ៍ជាមួយវៀតណាម និងប្រកាន់ខ្ជាប់នូវភាពស្មោះត្រង់។ ​ ថាំ ​មានជំនឿកាន់តែខ្លាំងឡើងៗ មកលើកងទ័ពវៀតណា​ម និងបំផុសឲ្យយុវជនចូលក្នុងអង្គភាពវៀតណាម ជាពិសេសយុវជននៅខាងប្រាសាទ ស្រុក១៦ តំបន់២៥។ លើសពីនេះ ថាំ ​ក៏ជួប​ជាមួយ សិទ្ធិ និងតាល់ នៅភូមិកៀនក្ដុល ឃុំប្រាសាទ ស្រុក១៦ តំបន់២៥​ ជាសមាជិកពលករវៀតណាម។ ចំពេល​នៅទីនោះ ​មានការរៀបចំកម្មវិធី ​ ទាក់ទងការគោរពទង់វិញ្ញាណក្ខន្ធ មានតម្កល់រូបហូជីមិញ ​​ ដែល​បង្ហាញអំពីភាពស្មោះត្រង់ជាមួយប្រទេសជាតិរបស់ខ្លួន។ ពួក​គេ បានធ្វើសកម្មភាព ឃោសនាឲ្យប្រជាជន មានជំនឿ ​ និង​គាំទ្រអង្គការវៀតណាម ដែលជួយរំដោះទឹកដី និងឃោសនា ​ដល់ប្រជាជនក្នុងស្រុក១៦ តំបន់២៥ គាំទ្រ និងជួយឧបត្ថម្ភ​ដល់វៀតណាម​ទៀតផង​។

នៅដើមឆ្នាំ ១៩៧១ ថាំ បានជួបជាមួយ សិទ្ធិ ជាគណៈបញ្ជាការ វរតូចលេខ១២១​ ​ ​និងស្គាល់ជាមួយអ្នកដឹកនាំចំនួន៥នាក់ ដែលមកពីហាណូយ។ ​ក្រោយមក ​តាម​ការចាត់តាំងពី ជិន វ៉ា​ ឲ្យ ថាំ និងមនុស្ស៤នាក់ទៀត ​ទៅយាមការពារនៅតាមព្រំប្រទល់ តំបន់២៥ និងតំបន់៣៣ ​ ស្រុក២០ តំបន់២៥។ ​ អំឡុងពេលនោះ ​ពួកគេ បានធ្វើសកម្មភាព ចាប់កងឈ្លបដែលមកពីតំបន់៣៣ ​ចំនួន៦នាក់ បញ្ជូនមកឲ្យឈ្មោះ ជិន វ៉ាន់ ​​និង​បញ្ជូនមកឃុំឃាំងនៅភូមិរាលត្រែង។ ​ថែមទាំង​ប្រមូលយក​​​ ផ្អក ចំនួន៩ពាង ត្រីប្រហែលជា៥០០គីឡូក្រាម, ថ្នាំជក់ប្រហែល២០០ក្រាម និងពោតអស់ចំនួន៨បាវ រួមទាំងសម្ភារជាច្រើនទៀតពីប្រជាជនដែលរស់នៅទីនោះ លក់ទៅឲ្យប្រជាជននៅតំបន់២៥ ​ ដើម្បី​ទទួលបានប្រាក់ត្រឡប់មកវិញ​។ ​

 នៅខែធ្នូ ឆ្នាំ១៩៧២ ​ តាមការចាត់តាំងពី សិទ្ធិ ឲ្យថាំ ជាមួយ សៅ សុវ៉ាន់ ចូលបន្លំខ្លួន ទារពន្ធពីប្រជាជនដែលប្រកបមុខរបររកត្រី នៅឃុំប្រាសាទ ស្រុក១៦។  ​ សកម្មភាពនេះធ្វើបាន​​រយៈពេលកន្លះខែ ​ពួកគេប្រមូលប្រាក់ពីប្រជាជនបាន​ចំនួន៦ម៉ឺនរៀល ​ប្រគល់ទៅឲ្យឈ្មោះ សិទ្ធិ ជាអ្នកកាន់កាប់​។ ​ ក្រោយមក សិទ្ធិ បាន​ហៅ ថាំ ​ជាមួយមនុស្ស៤នាក់ទៀត មកប្រជុំនៅព្រែកតាឯក ​​ដាក់ខ្លឹមសារ វ៉ៃ សមរភូមិ នៅស្រែអំបិល ក្នុងការបំផ្លាញកម្លាំងបដិវត្តន៍ ​និងបំផុសឲ្យយុវជន រត់ចោលខ្សែត្រៀម​។ លើសពីនេះត្រូវបំផុសឲ្យកើតមានជាទំនាស់ រវាងកងទ័ពភូមិភាគបូព៌ា (ភូមិភាគ ២០៣) ដែលស្ថិតក្នុងខេត្តព្រៃវែង[3] និងតំបន់២៥ ហើយដាក់ងារ ​យុវជនមកពីបូព៌ា ​ថា “ពួកចម្ប៉ា” និងយុវជនមកពីតំបន់២៥ ហៅថា “ពួកក្អែកទឹក” ។ នៅពេលកើតមានសង្រ្គាមរយៈពេល៦ថ្ងៃ បណ្ដាលឲ្យកងទ័ពខាងបូព៌ាត្រូវរបួសចំនួន២នាក់។  ​​បន្ទាប់មក ថាំ និងបក្ខពួកក៏ចាប់យុវជននៅវរតូចលេខ១១២ និងលេខ១១៦ បានចំនួន៨នាក់ បញ្ជូនមកឲ្យ សិទ្ធិ ទៀតផង។ នៅខែកុម្ភៈ ឆ្នាំ១៩៧៤ ថាំ ​និងមនុស្ស១០នាក់ ​បានចូលរួមក្នុងពិធីជប់លៀងមួយនៅព្រែករុន ​ហើយ​ដាក់ផែនការពង្រីកកម្លាំង ដែលជាខ្សែ ឲ្យចូលធ្វើជា​​បក្សកុម្មុយនីស្តកម្ពុជា ដឹកនាំក្នុងវរតូចលេខ២៦៥។ ​​រយៈពេលមួយខែក្រោយ អង្គការបានដកកង២៦៥ ទៅកាន់សមរភូមិទន្លេមេកុងវិញ ថាំ កសាងកម្លាំងចំនួន២នាក់ ​និងបំផុសឲ្យយុវជនរត់​ទៅផ្ទះ និងឲ្យរត់ចូលខ្មាំងពាមរាំងក្រោម នៃទន្លេមេកុង។  ​ក្រោយមក ក៏​​បំផ្លាញគ្រាប់៦០ មីលីម៉ែត្រ អស់ចំនួន៤០០គ្រាប់ និងB ៤០ និង៤១ អស់ចំនួន៦០គ្រាប់ និងបំផុសឲ្យយុវជន​​រត់ចោលខ្សែត្រៀមថែមទាំងបំផុសឲ្យយុវជនរត់ទៅនៅផ្ទះវិញអស់ចំនួន៨នាក់ទៀត។ ​

​នៅខែកុម្ភៈ ឆ្នាំ១៩៧៥ អង្គការចាត់តាំងឲ្យ ថាំ ចូលក្នុងកង១៤៣ ជាមួយឈ្មោះ ស្រ៊ីវ និងលាង ​ហើយ​ជួបជាមួយមនុស្ស៥នាក់ នៅព្រែកទន្លាប់។ ​ពួកគេ ធ្វើសកម្មភាពប្រលែងសត្វ ធ្វើឲ្យបែកការ និងមានបង្កប់គ្រាប់បែកមួយគ្រាប់​ទៀតផង​។ សកម្មភាពនេះធ្វើបានមួយរយៈ ​​ អង្គការបានដក ថាំ ឲ្យទៅធ្វើស្រែនៅបាគូ ​​បានជួបជាមួយ ខាត់ ហើយ​ពិភាក្សាគ្នាអំពីការធ្វើសកម្មភាពបំផ្លាញបដិវត្តន៍ ​ទាក់ទងនឹង​ធ្វើស្រែ​ ត្រូវប្រជុំជាមួយមនុស្ស១០នាក់ ​ដាក់ផែនការបំផ្លាញម៉ាស៊ីនបូមទឹក​។ ពួកគេ ក៏ធ្វើសកម្មភាពបូមទឹកពន្លិចស្រូវ ធ្វើឲ្យរលួយអស់ ​និងធ្វើឲ្យម៉ាស៊ីនបូមទឹកផ្ទុះអស់ចំនួន២គ្រឿង ដោយប្រើមិនបានចាក់ប្រេង។ ​ ក្នុងពេលនោះ ថាំ ក្ដោបក្ដាប់បាន​មនុស្ស២នាក់ ​ចាត់តាំងឲ្យទៅមើលគោជាង១០០ក្បាល​។  ពួកគេ ធ្វើសកម្មភាព​ប្រលែងគោ ឲ្យស៊ីស្រូវអស់ជាង៤០០០កណ្ដាប់ ​ ​និងបំផុសឲ្យយុវជនរត់ទៅផ្ទះអស់ចំនួន៦នាក់ទៀត ។ នៅខែមីនា ឆ្នាំ១៩៧៦ ខាត់ បាន​ឲ្យ ថាំ និងមនុស្សទាំង១៦នាក់ ​ ទៅប្រជុំនៅព្រែកជ្រៅ នៅតាខ្មៅ ​ ​បំផុសឲ្យកើតមានទំនាស់រវាងអង្គភាពមួយទៅអង្គភាពមួយទៀត ​​ពីបញ្ហាលួចបេះផលដំណាំដោយសេរី។ ​បន្ទាប់មក ​តាម​ផែនការ ថាំ បានបន្លំរាយការណ៍ ជូនគណៈអង្គភាពយោធា ​ ​ និងបាន​រៀបចំ​ជ្រើសរើសកម្លាំង ចំនួន៤នាក់ដែលមានបំពាក់អាវុធ ​​ ឲ្យចាំការពារអង្គការ រហូតដល់ទល់ដែន​។ ​​ ​ ក្រោយមក អង្គការដក ថាំ ​មកនៅភ្នំពេញ ឲ្យត្រឡប់ចូលមកបក្សវិញ តាមការឧទ្ទេសនាមពីឈ្មោះ សន និង ​ចាត់តាំងឲ្យ​យុវជន យកសំណាបដាក់លាយឡំ​គ្នា ធ្វើស្រូវទុំ​មុនក្រោយគ្នារយៈពេលកន្លះខែ​ បណ្ដាល​ឲ្យស្រូវខូច ​ហើយទទួលផលតិច។ សកម្មភាព​បន្ទាប់ទៀត ពួកគេពុំ​បានបញ្ចូលទឹកដាក់ស្រែ ធ្វើឲ្យស្រូវខូចអស់ចំនួន៨ហិចតា។

នៅខែមករា ឆ្នាំ១៩៧៧ អង្គការបានដក​ ថាំ ឲ្យមកកាន់​នៅអង្គភាពយោធា នៅវរតូច លេខ៣១៣ វរធំលេខ ៣១ ​ ​ក៏ជួបជាមួយ ផល និងខ្សែចាស់ចំនួន២នាក់ ​​ទទួលភារកិច្ចដើរមើលស្រូវ និងសម្ភារក្នុងកង៧០៣ ទាំងមូល។ ពួកគេបានដឹកជញ្ជូនស្រូវពីវរធំ លេខ៣៣ ចំនួន៦០០បាវ ទៅទុកនៅផ្ទះមួយកន្លែងនៅចាក់អង្រែ ទាំងដែលស្រូវ​នៅសើម ធ្វើឲ្យស្រូវនោះដុះខូចខាតអស់មួយចំនួនធំ។ ​ក្រោយមក ថាំ ក៏ត្រឡប់មកកាន់កាប់នៅកង០៨ ដែល​មាន​យុវជនជាច្រើននាក់​ ងាយស្រួលក្នុងការប្រមូលមកធ្វើជាកម្លាំងបាន​ច្រើនទៀត។ ​ ក្រោយមក ស្ថានភាពមានការប្រែប្រួល​ធ្វើឲ្យមាន​ភាពច្របូកច្របល់នៅក្នុងអង្គភាព ដែលនាំឲ្យ​រាំងស្ទះដល់ការធ្វើសកម្មភាព។  រហូតដល់ថ្ងៃទី០២ ខែសីហា ឆ្នាំ១៩៧៧ អង្គការបានចាប់ខ្លួន​ ថាំ និងសួរចម្លើយនៅថ្ងៃទី១១ ខែកញ្ញា ឆ្នាំ១៩៧៧៕

អត្ថបទដោយ៖ ជីម សុខគា

[1] ឯកសារ ​ J 00៤៣០ តម្កល់នៅបណ្ណាសារមជ្ឈមណ្ឌលឯកសារកម្ពុជា មានចំណងជើង «សកម្មភាពបំផ្លាញ បដិវត្តន៍របស់ គឹម ថាំ » ។ បានបង្ហាញអំពីសកម្មភាព ​ ធ្វើផែនការដោយធ្វើផែនការបំផ្លាញកម្លាំងបដិវត្តន៍ ​និងបំផុសឲ្យយុវជន រត់ចោលខ្សែត្រៀម ដែលទទួលផែនការពីឈ្មោះ ​ ដាក វិន ដែលជាជនជាតិវៀតណាម។

[2] ដកស្រង់ចេញពី, សៀវភៅសាក្សីប្រវត្តិសាស្ត្រកម្ពុជាប្រជាធិបតេយ្យ (១៩៧៥-១៩៧៩), បោះពុម្ពលើកទី២ មជ្ឈមណ្ឌលឯកសារកម្ពុជា ២០២០, បង្ហាញទីតាំងភូមិសាស្ត្រ នៅស្រុកលើកដែក ខេត្តកំពង់ស្ពឺ, ៣៣-៣៤។

[3] ដកស្រង់ចេញពី, សៀវភៅសាក្សីប្រវត្តិសាស្ត្រកម្ពុជាប្រជាធិបតេយ្យ (១៩៧៥-១៩៧៩), បោះពុម្ពលើកទី២ មជ្ឃមណ្ឌលឯកសារកម្ពុជា ២០២០, បង្ហាញទីតាំងភូមិសាស្ត្រ នៅ​ភូមិភាគបូព៌ា (ភូមិភាគ២០៣) , ៣៣​។