ញូង រីម៖ អំបែងគ្រាប់មីនផ្ទុះខ្ទាតចំខ្ញុំបណ្ដាលឲ្យពិការ

ប្រភពរូបថត៖ ហ្គូណា ប៊ឺកស្ត្រម (ខែសីហា ឆ្នាំ១៩៧៨)/បណ្ណសារមជ្ឈមណ្ឌលឯកសារកម្ពុជា
ប្រភពរូបថត៖ ហ្គូណា ប៊ឺកស្ត្រម (ខែសីហា ឆ្នាំ១៩៧៨)/បណ្ណសារមជ្ឈមណ្ឌលឯកសារកម្ពុជា

ញូង រីម[1] ភេទ​ស្រី អាយុ៦៣ឆ្នាំ មានទីកន្លែង​កំណើត​នៅភូមិ​ស្រែ​សំរោង​ ឃុំ​ស្រែ​ក្នុង​ ស្រុកឈូក ខេត្ដ​កំពត។

រីម បាននិយាយថា៖ «កាលពី​កុមារ​ភាព​ខ្ញុំមិនបាន​រៀនសូត្រទេ​។ ខ្ញុំគឺ​ជាកូន​កំព្រា​ម្ដាយ ហើយ​ខ្ញុំ​រស់​នៅជាមួយ​ឪពុក។ ខ្ញុំមាន​បងប្អូន​ចំនួន​៧នាក់ (ស្រី៣នាក់ និងប្រុស៤នាក់) ហើយ ខ្ញុំគឺ​ជា​កូន​ទី​៥។ កាលនោះជីវភាពក្រុមគ្រួសាររបស់ខ្ញុំ​មានការលំបាក ដោយសារ​តែយើង​មិនមាន​ម្ដាយ​មើលថែ​បានដិតដល់។ ការ​ហូប​ចុក​របស់យើងមាន​ការខ្វះខាតយ៉ាងខ្លាំង ដោយខ្វះព្រឹក​ និងខ្វះ​ល្ងាច។​

ក្រោយមក ខ្ញុំ ​រៀនសូត្រ​បានបន្ដិចបន្ដួច​ជាមួយនឹង​ការបង្រៀនក្រោម​ដើមឈើ​របស់ខ្មែរក្រហម​ ហើយ​​មមា​ញឹក​ជាមួយនឹង​ការរត់​គេចពី​គ្រាប់បែក​ដែល​ទាហាន​ លន់ នល់ ទម្លាក់មកលើ​ភូមិ​ស្ថាន​របស់​យើង​។​ យើងរៀន​បានតែមួយ​ព្រឹក​ប៉ុណ្ណោះ ដោយ​ពេលថ្ងៃ​នាំគ្នា​កាប់ទន្ទ្រាន ​ខែត្រធ្វើជីសម្រាប់បាច​តាម​វាល​ស្រែ។  យើងនាំគ្នាទៅកាប់ទន្ទ្រានខែត្រ ហើយទូល និងយកមកចិញ្ច្រាំឲ្យល្អិត​។ យើង​មាន​ពេល​វេលា​ជួប​ជុំ​គ្រួសារ​ ដោយពេលធ្វើការយើងត្រូវ ក្រោកពីព្រលឹមទៅធ្វើការងារ។ នៅពេលនោះ យើង​ចែក​ស្រូវ​ទៅ​តាម​ក្រុម​គ្រួសារនីមួយៗ ដោយមនុស្សចាស់​កម្លាំង​ពេញទទួលបាន​ស្រូវ​១២ថាំង។

ខ្ញុំបានចាកចេញពីក្រុមគ្រួសារ​នៅក្នុងឆ្នាំ​១៩៧៧ ដើម្បី​ធ្វើកងចល័ត ដោយនៅពេលនោះ ខ្ញុំ​មាន​អាយុ​​១៥ឆ្នាំ។​ យើងមាន​ភារកិច្ចរែក​ដី​នៅទំនប់​កោះថ្លា និងទំនប់​ម្លិច​។ ទំនប់ទឹកនៅពេលនោះ មានកម្ពស់​៣០​ម៉ែត្រ​។ ប្រជាជន​ក្នុងការដ្ឋាន​បាននាំគ្នា​ធ្វើជណ្ដើរឈើ​ថ្នាក់ៗសម្រាប់រែកដីឡើងទៅចាក់នៅខ្នង​ទំនប់​ខាង​លើ​។​ យើងរែក​ដីនៅទីនោះរយៈពេល​ជិត១ឆ្នាំ​។

លុះដល់ឆ្នាំ​១៩៧៨ ខ្មែរក្រហម​បានជ្រើសរើសខ្ញុំទៅកាន់តំបន់​សៀមរាប​។ យើងបានធ្វើដំណើរ​ដោយឡានរយៈពេលជាច្រើនថ្ងៃ​។ ខ្ញុំនៅដាំបាយ​ ធ្វើម្ហូប និងដាំស្ល នៅក្នុងឃុំ​​។ នៅពេលនោះ ខ្ញុំមិនទាន់​ចេះ​ស្ទូង​ស្រូវទេ។​ ​ខ្ញុំនៅចាំ​ផ្ទះ និងចម្អិន​អាហារ​សម្រាប់អ្នកធ្វើការងារ​តាមការដ្ឋាន​។​ ទិដ្ឋ​ភាពនៅក្នុងភូមិ​ពេលនោះ គឺ​មានរោង​បាយ​រួមមួយ​។

រហូតដល់ឆ្នាំ​១៩៧៩ យើងបានរត់ចេញពីកង​ទ័ពវៀតណាម​ហើយបន្ដ​រស់នៅជាមួយ​ខ្មែរក្រហម​។ យើង​បាន​នាំគ្នាចូល​សុំស្រូវ​នៅក្នុងភូមិ ហើយបាន​បុកស្រូវទាំងនោះយកអង្ករដាំបាយ​ ដើម្បី​បន្ដដំណើរ​មួយ​ដំណាក់​កាល​ទៅមួយ​ដំណាក់កាល​។​ យើងជួបការ​លំបាកណាស់ដោយសារ​តែ​យើង​​រត់​ឥតឈប់​ឈរ។ យើងរត់ក្នុងរដូវ​ប្រាំង​ យើងចេះតែដើរតាម​គ្នីគ្នា​។​ ជួន​កាល​យើង​ឃើញ​ស្លឹក​ឈើ​ដុះ​​បៃតង​ខ្ចី យើង​រំពឹង​ថា​នឹងមាន​ប្រភព​ទឹក។ ​ជាក់ស្ដែង ដង​អូរ​បាន​រីងស្ងួត​ទឹក​អស់ទៅហើ​យ​។​

រហូត​ដល់​ឆ្នាំ​១៩៨០ ខ្ញុំបាន​ចូល​បម្រើជាកងដឹកជញ្ជូន​របស់​ខ្មែរក្រហម​នៅក្នុងព្រៃ។ ស្ថានភាព​រស់​នៅ​​របស់យើង​នៅពេលនោះ គឺមានការ​ហូប​ចុកប្រសើរ​ជាងមុន ដោយយើង​អាច​រៀប​ចំ​ខ្លួន​បាន​មួយ​ដំណាក់។ យើងមិនទាន់មាន​របបអាហារ​ដែលអង្គភាព​ខ្មែរក្រហមចែកឲ្យ​ទេ។ យើងនៅតែ​នាំគ្នា​ចូល​ទៅ​ក្នុង​ភូមិ​ ​ដើម្បីសុំ​ស្បៀងអាហារ​ពីប្រជាជន​​ ជាពិសេសស្រូវ និងអង្ករ​។​ ​ របបអាហារ​ហូបចុករបស់យើង​ក្នុង​១​នាក់ទទួលបានអង្ករ១កំប៉ុងក្នុងមួយថ្ងៃ។ ក្រោយមកទៀត ទើប​យើង​មាន​របបអាហារ​ចេញពីព្រំដែន​ប្រទេស​ថៃ​ ប៉ុន្ដែក៏មិន​បរិបូរណ៍ដែរ។​ យើងសហការ​គ្នានៅក្នុងព្រៃ​ដើម្បីរកស្រូវអង្ករ និង​ម្ហូប។ ជួន​កាល​យើងរកបេះ​ត្រកួន និងរកត្រី​នៅតាមបឹងបួរ​។​​ នៅក្នុងព្រៃយប់ត្រង់​ណាយើងនាំ​គ្នាកាច់​ស្លឹក​ឈើ​ដេកត្រង់​ហ្នឹងទៅ​។ បើយើង​ចូលទៅក្នុងភូមិ​ប៉ះចំ​ផ្ទះ​ប្រជាជន​យើងសុំ​សម្រាក​នៅទីនោះទៅ។​ ចំពោះ​ការងារ​​ប្រចាំ​ថ្ងៃ​របស់យើង​វិញ គឺដឹកជញ្ជូន​សម្ភារចេញពី​ឡានចូលទៅក្នុង​ឃ្លាំង​ដូចជា អង្ករ ត្រី​ ប្រហុក គ្រាប់​ និងរំសេវជាដើម​នៅត្រង់ចំណុចច្រកអណ្ដែង​មុត។​

នៅចុង​ឆ្នាំ​១៩៨០ ខ្ញុំបានរៀបការ​ដោយស្ម័គ្រចិត្ដជាមួយអ្នកដឹកជញ្ជូន​នៅឃ្លាំង​របស់ខ្មែរក្រហម​​។ នៅ​ពេល​នោះមាន​ចំនួន​៤គូ។ គូនីមួយ​ៗឡើង​មានចំណាប់អារម្មណ៍ និងប្ដេជ្ញាចិត្ដ​ស្រឡាញ់​គ្នា​អស់មួយ​ជីវិត​។ នៅឆ្នាំ១៩៨១ ខ្ញុំរស់នៅ​តាមជម្រាលភ្នំ។ ក្រោយមក យើងក៏បានទៅរស់នៅ​ភូមិផ្កូវ​ និងជំរំដំកង់​តាម           បណ្ដោយ​​ព្រំដែន​កម្ពុជា-ថៃ។

នៅឆ្នាំ​១៩៨៥ ប្ដីរបស់ខ្ញុំបាន​ស្លាប់នៅពេលបំពេញកាតព្វកិច្ចជាយោធានៅសមរភូមិ។ នៅ​ពេល​នោះ​ខ្ញុំ​មាន​​កូន​២នាក់ហើយ។ រាល់ពេល​ផ្លាស់ទីទៅ​ណា​ម្ដង​ៗ​ខ្ញុំមានការលំបាក​វេទនាណាស់​។  នៅពេលនោះ ប្រជាជន​​ដែលរស់នៅជាមួយ​គ្នាបានដើរជាន់មីនហើយផ្ទុះស្លាប់ ចំណែកអំបែង​មីន​នោះ​ក៏ផ្ទុះ​ខ្ទាត​មក​ត្រូវ​ខ្ញុំ​ទៀត​​បណ្ដាល​​ឲ្យពិការដូចគ្នា។ ​ដោយសារ​មានស្ថានភាពលំបាកបែបនេះ ញាតិមិត្ដនៅក្នុងកងក៏ជម្រុញឲ្យខ្ញុំមាន​គ្រួសារ​​ម្ដងទៀត ដោយខ្ញុំបានរៀបការ​​ជាមួយ​ជនពិការ​។ ខ្ញុំបានរស់នៅក្នុងភូមិជនពិការ​ ក្រោយមកទៀត​គាត់​ក៏បានស្លាប់ទៀត។​

នៅឆ្នាំ​១៩៩០ យើងចាប់ផ្ដើម​ចុះមករស់នៅ​ទឹកដីតំបន់​អន្លង់វែង។ ដំបូងឡើយនៅទីនេះ​ជា​តំបន់​ព្រៃ​ ថ្នាក់ដឹកនាំ​ខ្មែរក្រហមបានដឹកជញ្ជូនយើង​តាមឡាន​ និងជាប់ផុងតាមផ្លូវផង។ យើងរស់នៅ​ដោយពឹង​ផ្អែក​​ទៅលើរបបអង្ករ និង​ដាំដុះ​ដំណាំផ្គត់​ផ្គង់ជីវភាព​ដោយខ្លួនឯង។ ខ្ញុំទទួលរង​ពិការ​ភាព​ដោយ​សារ​ផ្ទុះ​គ្រាប់​មីន​នៅពេល​ខ្មែរក្រហម​ផ្លាស់ទីយើង​ពីជំរំភៀសខ្លួន​មួយ​ទៅជំរំភៀស​ខ្លួន​មួយ​ទៀត​។​ ក្រោយមកទៀត នៅមុនពេលសមាហរណកម្ម​នៅ​តំបន់អន្លង់វែង​ (ឆ្នាំ​១៩៩៨) អង្គភាពជនពិការត្រូវបាន​ជម្លៀសទៅកាន់​ទំនប់ដាច់ស្ថិតក្នុង​ស្រុកត្រពាំង​ប្រាសាទ​នាពេល​បច្ចុប្បន្ន ដោយរស់នៅ​មិនទាន់បានមួយខែផងក៏កងទ័ព​ខ្មែរក្រហមមានការផ្ដាច់ខ្លួន​ចូលទៅក្នុង​រាជ​រដ្ឋាភិបាល​»៕

អត្ថបទដោយ សួត វិចិត្រ


[1] ភួន សុរីន សម្ភាសន៍​ជាមួយ​ ញូង រីម នៅក្នុងភូមិ​ជើងភ្នំ ឃុំ​ត្រពាំងប្រិយ៍ ស្រុកអន្លង់វែង ខេត្ដឧត្ដរមានជ័យ នៅឆ្នាំ២០២៣។

ចែករម្លែកទៅបណ្តាញទំនាក់ទំនងសង្គម

Solverwp- WordPress Theme and Plugin