នៅពេលថ្មីៗនេះមានព្រឹត្តិការណ៍រាយបន្លាលួសរបស់កងទ័ពថៃ នៅក្នុងដែនអធិបតេយ្យភាពរបស់ប្រទេសកម្ពុជា នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ព្រឹត្តិការណ៍នេះបានបង្កផលប៉ះពាល់យ៉ាងខ្លាំងដល់ប្រជាជនស្លូតត្រង់ដែលកំពុងរស់នៅក្នុងភូមិជោគជ័យ។ ក្នុងនោះមានប្រជាជនចំនួន ៦គ្រួសារ ដែលជួបផលប៉ះពាល់ផ្ទាល់ដោយសារការហុំព័ទ្ធរាយបន្លាលួស ធ្វើឲ្យប្រជាជនទាំង៦គ្រួសារ បានបាត់បង់ដីស្រែចម្ការ និងផ្ទះសម្បែង។ ប្រជាជនទាំង៦គ្រួសារួមមាន៖ ទី១) គ្រួសារ តុល ដាវី ទី២) គ្រួសារ ចាន់ បូនី  ទី៣) គ្រួសារ ស្រី ទាវ ទី៤) គ្រួសារ មាស សាវឿន ទី៥) ​គ្រួសារ អ៊ុន ដា  និងទី៦) គ្រួសារ តុល​ សាវី។^[1] ប្រជាជនដទៃទៀតត្រូវរងការគំរាមកំហែង និងបំភិតបំភ័យ។

(នៅជាជំរំ) រហូតកើតជាភូមិ

ប្រជាជនដែលរស់នៅក្នុងភូមិជោគជ័យបច្ចុប្បន្ន​ មួយភាគធំសុទ្ធសឹងតែជាប្រជាជនចាស់ ដែលរស់នៅតាំងពីមិនទាន់កកើតជាភូមិ (នៅជំរំ)។ ប្រជាជនពីដើមហៅភូមិជោគជ័យថា ជំរំណងចាន់ ឬជំរំជនភៀសខ្លួនណងចាន់ គ្រប់គ្រងដោយលោក ជា រិទ្ធីឈុត។[2] អង្គការសហប្រជាជាតិ (UNTAC) បានដាក់ឈ្មោះភូមិថាជោគជ័យ ក្នុងឆ្នាំ១៩៩២ ហើយមេភូមិដំបូងឈ្មោះ វឿន ជាទាហានប៉ារ៉ាប្រចាំនៅជំរំណងចាន់​​។[3] បច្ចុប្បន្នភូមិសាស្ត្រភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ[4] ត្រូវកងទ័ពថៃរំលោភបំពានដោយរាយបន្លាលួសកាត់យកដីស្រែចម្ការ និងផ្ទះសម្បែងប្រជាជនអស់ចំនួន ៦គ្រួសារ។ កាល​ពីថ្ងៃ​ទី​១២ ខែសី​ហា ឆ្នាំ២០២៥[5] រហូតដល់ថ្ងៃទី២៥ ខែសីហា ឆ្នាំ២០២៥ កងទ័ពថៃបានព្យាយាមយកលួសបន្លាមករាយបន្ថែមទៀត។^[6]

ចាប់តាំងពីថ្ងៃដែលកងទ័ពថៃរាយបន្លាលួស ប្រជាជននៅក្នុងភូមិរស់នៅដោយទទួលរងការគំរាមកំហែង និងភាពភ័យខ្លាច។ ដោយសារខ្លាចកងទ័ពថៃរាយបន្លាលួសយកផ្ទះរបស់ប្រជាជន ដូចប្រជាជនទាំង៦គ្រួសារកន្លងមកដែរ និងខ្លាចកងទ័ពថៃរាយបន្លាលួសយកផ្ទះរបស់ខ្លួន ប្រជាជនទាំងអស់ត្រូវបង្ខំចិត្តរស់នៅតែផ្ទះ មិនហ៊ានចេញទៅធ្វើការ ឬរកស៊ីនៅទីឆ្ងាយៗឡើង។ សេដ្ឋកិច្ចក្នុងគ្រួសារនីមួយៗ ចាប់ផ្ដើមធ្លាក់ចុះយ៉ាងខ្លាំង ព្រោះបាត់បង់ប្រាក់ចំណូល ហើយម្យ៉ាងទៀតនៅក្នុងភូមិជោគជ័យអ្នកដែលពិបាកជាងគេគឺក្មេងៗ ព្រោះមិនបានទៅសាលារៀន ដោយសាលារៀនទាំងអស់ត្រូវបិទទ្វា។

អតីតទាហានប៉ារ៉ានៅជំរំណងចាន់ និងបច្ចុប្បន្នជាមេភូមិជោគជ័យ ឈ្មោះ (ប៉ែន រិទ្ធី)

ខ្ញុំឈ្មោះ ប៉ែន រិទ្ធី ភេទប្រុស អាយុ៦១ឆ្នាំ មានស្រុកកំណើតរនៅស្រុកសង្កែ ខេត្តបាត់ដំបង។ បច្ចុប្បន្នរស់នៅភូមិជោគជ័យ (អតីតជំរំណងចាន់) ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ខ្ញុំចេញពីស្រុកកំណើតមករកស៊ី និងរស់នៅជំរំណងចាន់ (បច្ចុប្បន្នជាភូមិជោគជ័យ) កាលពីឆ្នាំ១៩៨៩។ នៅឆ្នាំ១៩៩១ ខ្ញុំបានចូលធ្វើជាទាហានប៉ារ៉ា ប្រចាំនៅជំរំណងចាន់។ នៅឆ្នាំ១៩៩១ ដដែលខ្ញុំបានរៀបការប្រពន្ធ​ និងបានសង់ផ្ទះរស់នៅក្នុងជំរំណងចាន់ជាមួយប្រជាជនដទៃទៀតរហូតដល់ឆ្នាំ២០២១ ខ្ញុំ ត្រូវបានជ្រើសរើសជាមេភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ​។ សព្វថ្ងៃប្រជាជនរស់នៅភូមិជោគជ័យមានចំនួសរុប៧៣២​គ្រួសារ ស្មើនឹង២,៥៥៤នាក់ (ស្រ្តីមានចំនួន ១,៣២២នាក់)។[7]

[1] ឈ្មោះទាំង ៦គ្រួសារទទួលបានពីបទសម្ភាសន៍ ឡុង ដានី ប្រធានមជ្ឈមណ្ឌលផ្សះផ្សាវាលវែង\មជ្ឈមណ្ឌឯកសារកោះថ្ម ជាមួយ ប៉ែន វុទ្ធី មេភូមិជោគជ័យ

[2] បទសម្ភាសន៍ ឡុង ដានី ប្រធានមជ្ឈមណ្ឌលផ្សះផ្សាវាលវែង\មជ្ឈមណ្ឌឯកសារកោះថ្ម ជាមួយ ឡៃ វរៈ

[3] ឈ្មោះទាំង ៦គ្រួសារទទួលបានពីបទសម្ភាសន៍ ឡុង ដានី ប្រធានមជ្ឈមណ្ឌលផ្សះផ្សាវាលវែង\មជ្ឈមណ្ឌឯកសារកោះថ្ម ជាមួយ ប៉ែន វុទ្ធី មេភូមិជោគជ័យ

[4] https://thmeythmey.com/detail/150457

[5] https://thmeythmey.com/detail/150457

[6] https://www.kampucheathmey.com/local-news/976047

[7] ឈ្មោះទាំង ៦គ្រួសារទទួលបានពីបទសម្ភាសន៍ ឡុង ដានី ប្រធានមជ្ឈមណ្ឌលផ្សះផ្សាវាលវែង\មជ្ឈមណ្ឌឯកសារកោះថ្ម ជាមួយ ប៉ែន វុទ្ធី មេភូមិជោគជ័យ

---

អត្ថបទដោយ ទាវ សម្ភស្ស