ព្រំ ជីម ៖ ខ្ញុំរបួសជើង និងខ្លួន ក្នុងពេលប្រយុទ្ធ

រូបថត ខែមីនា ឆ្នាំ១៩៧៨ (បណ្ណសារមជ្ឈមណ្ឌលឯកសារកម្ពុជា)
រូបថត ខែមីនា ឆ្នាំ១៩៧៨ (បណ្ណសារមជ្ឈមណ្ឌលឯកសារកម្ពុជា)

ព្រំ​ ជីម​[1] ភេទ​ប្រុស​ អាយុ៦៧ឆ្នាំ​​ មាន​ទី​កន្លែង​កំណើត​នៅ​ភូមិ​ក្រាំង​ដូង​ ឃុំ​ពាម​ ស្រុក​កំពង់​ត្រឡាច​ ខេត្ត​កំពង់​ឆ្នាំង​។​ បច្ចុប្បន្ន ជីម​ ​រស់​នៅ​ក្នុង​ភូមិ​ឃ្លាំង​កណ្ដាល​ ឃុំ​ត្រពាំង​ប្រីយ៍​ ស្រុក​អន្លង់​វែង​ ខេត្ត​ឧត្តរ​មាន​ជ័យ​។

ជីម​ បាន​និយាយ​​​ថា​៖ «​កាល​ពី​កុមារ​ភាព ​ខ្ញុំ​មិន​បាន​រៀន​សូត្រ​នោះ​ទេ​ ដោយ​សារ​ប្រទេស​ជាតិ​កើត​​មាន​សង្គ្រាម​។​ ខ្ញុំ​មាន​បង​ប្អូន​បង្កើត​ចំនួន​៩​នាក់​ ហើយ​ខ្ញុំ​ជា​កូន​ទី​៤​នៅ​ក្នុង​គ្រួសារ​។​ ឪពុក​ម្ដាយខ្ញុំ​ប្រកប​​របរ​​ជា​កសិករ ​ដើម្បី​ផ្គត់​ផ្គង់​ជីវភាព​គ្រួសារ​។​ ចាប់តាំង​ពី​ខ្ញុំ​ដឹង​ក្ដី​មក​នៅ​ក្នុង​ភូមិ​របស់​ខ្ញុំ ​ប្រជាជន​តែង​តែ​​មាន​ការ​ចែក​រំលែក​ និង​ជួយ​យក​អាសារដល់គ្នា​ទៅវិញទៅមក ​ដោយ​សារ​តែ​ជីវ​ភាព​ក្សត់​ខ្សោយ។​ ភូមិ​ស្រុក​​មិន​​ទាន់​មាន​ការ​ជឿន​លឿន​ ទើប​អ្នក​ស្រុក​មាន​អ្វី​ចេះ​ចែក​រំ​លែក​គ្នា​​។ ជំនាន់​សង្គម​រាស្រ្ត​និយម​ ប្រជាជន​មាន​ការ​ស្រឡាញ់​ និង​គោរព​សម្ដេចព្រះ​​ នរោត្តម​ សីហនុ​ ខ្លាំង​ណាស់​។​ កាល​នោះ​ អ្នក​មាន​ឋានៈ​ធំ​ភាគ​ច្រើន​​និយម​ចែក​អំណោយ​ជា​ក្រណាត់​ ឬ​បាច់​លុយ​ពី​លើ​យន្ត​ហោះ​។​ ជាក់​ស្ដែង ​នៅ​ជំនាន់​នោះ​ សម្ដេចព្រះ​​ នរោត្តម​ សីហនុ​ ទ្រង់​តែង​តែ​យាង​មកតាម​យន្ត​ហោះ​ ដើម្បី​​ចែក​អំណោយ​ដល់​ប្រជាជន​នៅ​តាម​កម្ម​វិធី​នានា​ ដូច​ជា​ កម្ម​វិធី​នៅ​តាម​សាលា​រៀន​ ឬ​នៅ​តាម​វត្ត​អារាម​ជា​ដើម​។​ ​

​រហូត​ដល់​ឆ្នាំ​១៩៧០​ ខ្ញុំនៅ​​ចង​ចាំ​បាន​ថា​ ប្រទេស​កម្ពុជា​មាន​ព្រឹត្តិ​ការណ៍​​​ដ៏​អាក្រក់​មួយ​គឺ​ «ការ​ធ្វើ​រដ្ឋ​ប្រហារទម្លាក់​ សម្ដេចព្រះ​ នរោត្តម​ សីហនុ​» ​ដោយ​​សេនា​ប្រមុខ​ លន់​ នល់​។​ ក្រោយ​ពី​​រដ្ឋ​ប្រហារ​ ការ​រស់​នៅ​របស់​ប្រជាជន​បាន​​ផ្លាស់​ប្ដូរ​ និងកើត​ឡើងនូវ​ភាព​ចលាចល​ ដោយ​សារ​អំឡុង​ពេល​នោះ​ មាន​ការ​ឃោសនា​ឲ្យ​ចូល​បម្រើ​នៅ​ក្នុង​ជួរ​កង​ទ័ព​ លន់​ នល់​ និង​មាន​ការ​ឃោសនា​ឲ្យ​ចូល​ទៅ​ក្នុង​ក្រុម​បដិវត្តន៍ ដើម្បី​ ​ទាម​ទារ​អំណាច​ជូន​ដល់​សម្ដេច​ឪ​វិញ​។​ ព្រឹត្តិ​ការ​ណ៍​នៅ​ពេល​នោះ​ក៏​ចាប់​ផ្ដើម​មាន​ក្រុម​ខ្មែរ​ក្រហម​ចូល​មក​នៅ​ក្នុង​ភូមិ​ ដើម្បី​ស៊ើប​ការណ៍​ និង​អូស​ទាញ​ប្រជាជន​ឲ្យ​ចូល​តស៊ូក្នុង​ព្រៃ​​។ នៅ​ចន្លោះ​ឆ្នាំ​១៩៧១​ ដល់​ឆ្នាំ​១៩៧២​ ​ភូមិ​របស់​ខ្ញុំ​ក៏​​មាន​វត្ត​មាន​កង​ទ័ព​វៀត​ណាម​ចូល​ទៅ​រស់​នៅ​ហើយ​។​ កាល​នោះ​ ក៏​មាន​កម្លាំង​ខ្មែរ​យើង​ទៅ​រស់​នៅ​ជា​មួយ​វៀត​ណាម​មួយ​ចំនួន​​ដែរ​។​

ចាប់​ពី​ឆ្នាំ​១៩៧២​ ដល់​ឆ្នាំ​១៩៧៣​ ការ​ទម្លាក់​​គ្រាប់​បែក​កាន់​តែ​​​ខ្លាំង​ឡើង​​ ដែល​ធ្វើ​ឲ្យ​ប្រជាជន​រស់​នៅ​តាម​តំបន់​នីមួយៗ​មាន​ភាព​ភ័យ​ខ្លាច​។​ នៅពេលនោះ​ មាន​តាំងពី​យន្ត​ហោះ​ទម្លាក់​គ្រាប់​បែក​ «បេ​៥២»​​​ របស់​​អាមេរិក​ជាដើម។​ ប្រជាជន​​​នៅ​ក្នុង​ភូមិ​ស្ថាន ​បាន​នាំ​គ្នា​ជីក​រណ្ដៅ​ត្រង់​សេ​ ដើម្បី​លាក់​ខ្លួន​ពី​ការ​ទម្លាក់​​គ្រាប់​បែក​។​

​​លុះ​ដល់​ឆ្នាំ​១៩៧៣​ ក្នុង​វ័យ​១៧​ឆ្នាំ​ ខ្ញុំ​បាន​សម្រេច​ចិត្ត​ចូល​ធ្វើ​ជា​កង​ទ័ព​ខ្មែរ​ក្រហម​ដោយ​សារ​នៅ​ក្នុង​ភូមិ​មាន​ភាពចលាចល​ខ្លាំង​ពេក និង​​ធ្វើ​ឲ្យ​ការ​រស់​នៅមាន​ភាព​លំបាក​។​ ជំនាន់​នោះ​ ខ្ញុំ​ចូល​ធ្វើ​កង​ទ័ព​ភ្លាម។ ខ្ញុំ​​​បាន​កាន់​កាំ​ភ្លើង​ភ្លាម​ សម្រាប់ការ​ហ្វឹក​ហាត់​ពី​យុទ្ធ​សាស្រ្ត​​​សង្គ្រាម​ រួមមាន៖​ការ​បាញ់​កាំ​ភ្លើង​ ហាត់​លូន​ ហាត់​ក្រាប ហាត់​ដោះ​មីន​ និង​ហាត់​លូន​តាម​របង​ អស់​រយៈ​ពេល​៣​ខែ​។ ​ខ្ញុំក៏​ចាប់ផ្តើម​​ចេញ​ទៅ​ ​សមរភូមិ​។​ ខ្ញុំ​ស្ថិតនៅ​ក្នុង​វរសេនា​តូច​លេខ​១១៣​ ដែល​មាន​កម្លាំង​ទ័ព​ប្រហែល​ជា​៣០០នាក់​ ទៅ​៤០០​នាក់​។​ អំឡុង​ពេល​នោះ​ ប្រជាជន​បាន​នាំ​គ្នា​ចូល​តស៊ូ​ក្នុង​ព្រៃ​ច្រើន​ណាស់​ ប៉ុន្តែ​នៅ​មិន​ទាន់​សម្បូរ​កង​អង្គ​ភាព​នោះ​ទេ​។​ សមរភូមិ​ដំបូងរបស់ខ្ញុំ​​ស្ថិត​នៅ​បណ្តោយផ្លូវ​ជាតិ​លេខ​៥​ និង​ផ្លូវ​ជាតិ​លេខ​៤​ នៅប៉ែក​ខាង​​ភ្នំ​បាសិត​ ​ភ្នំ​ឧដុង្គ​​ និង​​លង្វែក​។​ ខ្ញុំ​ទទួលដឹកនាំ​​កង​ទ័ព​មួយ​ក្រុម​ ដែលមាន​សមាជិកចំនួន​១២​នាក់​។​ មុនពេលមានការ​​​ប្រយុទ្ធម្តងៗ ​កង​ទ័ព​យើង​បាន​រៀប​ចំ​ផែន​ការ​ រួម​ទាំង​ស៊ើប​​ការណ៍​យ៉ាង​ច្បាស់​លាស់​ពី​តំបន់របស់​​សត្រូវជាមុន​។​

ចំពោះ​ការ​ហូប​ចុក ​កង​ទ័ព​មិន​មាន​ការ​ខ្វះ​ខាត​នោះ​ទេ​។ ខ្ញុំ​ទទួល​បាន​អាហារ​គ្រប់​គ្រាន់​។​ កម្លាំង​កង​ទ័ព​នៅ​ជំនាន់​នោះ​ ​ចាំ​តែ​វាយ​នៅ​ខ្សែ​ត្រាម​ខាង​មុខ​ ខណៈដែល​​​​ក្រុម​ដឹក​ជញ្ជូន​យក​បាយ​ម្ហូប​​​ទៅ​ឲ្យ​នៅតាម​​រណ្ដៅ​ត្រង់​សេ​។​ ការ​វាយប្រយុទ្ធ​គ្នា​រវាង​ភាគី​ទាំង​ពីរ​នេះ​បាន​ធ្វើឲ្យ​កង​កម្លាំង​ទ័ព​ លន់​ នល់​ ស្លាប់​អស់​ជា​ច្រើន​នាក់​ ដោយ​សារ​កម្លាំង​ទ័ព​ខ្មែរ​ក្រហម​បាន​វាយ​ឆ្មក់​ទៅ​លើ​កង​ទ័ព​ លន់​ នល់​។​ ​

នៅ​ក្នុង​ឆ្នាំ​១៩៧៤​ កម្លាំង​ទ័ព​ខ្មែរ​ក្រហម​បាន​វាយ​បែក​បន្ទាយ​កង​ទ័ព​ លន់​ នល់​ រួម​ទាំង​​ដណ្ដើម​បាន​រថក្រោះ​ កាំ​ភ្លើង​ធំ​ និង​​កាំ​ភ្លើង​ជា​ច្រើន​ប្រភេទ​ទៀត នៅ​បន្ទាយ​លង្វែក​​។ ទិស​ដៅ​ ដែល​អង្គ​ភាព​​ពិសេស​របស់​​ខ្ញុំ​ត្រូវ​វាយ​ប្រយុទ្ធ គឺការ​ឆ្ពោះ​ទៅ​ទី​ក្រុង​ភ្នំ​ពេញ​។​ អំឡុង​ពេល​នោះ​ កង​​ទ័ព​ខ្មែរ​ក្រហមបាន​កើនចំនួន​​​ច្រើន​ឡើង​។ កង​ទ័ព​ខ្មែរ​ក្រហម​បាន​ធ្វើ​ការ​រៀប​ចំ​យុទ្ធ​នា​ការវាយ​រំដោះ​យក​ទី​ក្រុង​ភ្នំ​ពេញ ពី​កង​ទ័ព​ លន់​ នល់ ​​​​នៅ​ក្នុង​ថ្ងៃ​ទី​១៧​ ខែ​មេសា​ ឆ្នាំ​១៩៧៥​។​

ប៉ុន្តែ​ ​ខ្ញុំ​បានរង​​របួស ​តាំង​ពី​ខែ​មករាមក​ម៉្លេះ ​ក្នុង​កំឡុង​ពេលដែលខ្ញុំ​​ដឹក​នាំ​កម្លាំង​វាយ​នៅសមរភូមិ ភ្នំ​បាសិត​។​ ខ្ញុំ​មាន​គ្នា​ត្រឹម​តែ​៨​នាក់​តែ​ប៉ុណ្ណោះ​ដែល​បាន​ឡើង​ទៅ​វាយ​ជាមួយ​ទាហាន​ លន់​ នល់។​ ​កម្លាំង​ លន់​ នល់​ បាន​បាញ់​សម្រុក​មកវិញ​ ដែល​​ធ្វើ​ឲ្យ​ខ្ញុំ​ត្រូវ​របួស​ជើង​ និង​ខ្លួន​មួយ​ចំនួន​ទៀត​។ ភ្លាមៗ​នោះ​ កម្លាំង​ទ័ព​ខ្ញុំ​បាន​រត់​ទៅ​មុន​អស់​។ ខ្ញុំ​ក៏​បាន​លូន​ចេញ​ពី​ទីតាំង​ ដែលខ្ញុំ​​​ត្រូវ​របួស ​រហូត​ដល់​បាន​​ជួប​គ្នី​គ្នា។ ខ្ញុំ​ក៏ត្រូវ​បាន​​សែង​យក​ទៅ​ព្យាបាល​នៅ​មន្ទីរ​ពេទ្យ​នៅ​ខាង​ក្រោយ​រហូត​ដល់​បា​ន​ជា​សះ​ស្បើយ​។​

​ក្រោយ​មក ​កង​ពលរបស់​​ខ្ញុំ​ត្រូវ​បាន​បញ្ជូន​ទៅ​ខេត្ត​រតនគិរី​ ដើម្បី​ការ​ពារ​ព្រំ​ដែន​។​ ក្រៅ​ពី​ការ​ត្រួត​ពិនិត្យ និ​ងល្បាត​​​តាម​ព្រំ​ដែន​ ​កង​ទ័ព​ត្រូវ​ធ្វើ​ស្រែ​បង្ក​បង្កើន​ផល​ស្រូវ ដើម្បី​​ផ្គត់​ផ្គង់​ជីវភាព​ខ្លួន​ឯង​។​ ​ដំបូងឡើយ​​ កង​ទ័ព​ខ្មែរ​ក្រហម​មិន​ទាន់​មាន​ជម្លោះ​ជា​មួយ​កង​ទ័ព​វៀត​ណាម​​ទេ​។ ទាំង​ពីរ​ភាគី​ បាន​កសាង​​​ទំនាក់​ទំនង​ល្អ​ជា​មួយ​គ្នា​ធម្មតា​។​ នៅ​ក្នុង​​​ឆ្នាំ​១៩៧៧​ ​ជម្លោះ​​ព្រំ​ដែ​នបាន​ផ្ទុះឡើង​ ដោយសារ​​កង​ទ័ព​វៀត​ណាម​បាន​បង្ខិត​បង្គោល​ព្រំ​ដែន​។ ​ការ​ឈ្លោះ​ទាស់​ទែង​គ្នា​ បាន​នាំឲ្យ​មានការ​បាញ់​ប្រហារ​គ្នា​ទៅ​វិញ​ទៅ​មក ​នៅ​ពេលយើង​ល្បាត​​ព្រំ​ដែន​។​ ​​

នៅក្នុង​​ឆ្នាំ​១៩៧៩​ កង​ទ័ព​ខ្មែរ​ក្រហម​បាន​បែក​បាក់​គ្នា ​ដោយ​សារ​ការ​វាយ​ប្រហារ​របស់​កង​ទ័ពស្ម័គ្រ​ចិត្ត​​វៀត​ណាម​។​ ក្រោយ​មក​ទៀត​ ខ្ញុំ​ក៏​បាន​រត់​ចូល​ព្រៃ​ និង​បាន​ផ្ញើ​ជីវិត​លើ​សត្វ​ព្រៃ​ ផ្លែ​ឈើ​ព្រៃ​ ​មើម​ក្ដួច​ មើម​ដំឡូង​ ដោយ​សារ​ការ​ហូប​ចុក​មាន​ការ​ខ្វះ​ខាត​ជា​ខ្លាំង​។​ រហូត​ដល់​ឆ្នាំ​១៩៨៤​ ខ្ញុំ​បាន​ធ្វើ​ដំណើរ​ឡើង​មក​ភ្នំ​ដង​រែក​ នៅ​តំបន់​ភ្នំ​១០០១​។​ លុះ​ដល់​ឆ្នាំ​១៩៨៨​ ខ្ញុំ​ក៏​បាន​រៀប​ការ​។​ បច្ចុប្បន្ន​នេះ​ ខ្ញុំ​មាន​ជំងឺ​ប្រចាំ​កាយ​មួយ​ចំនួន​ដូច​ជា​ ថ្លើម​, ​ក្រពះ​ពោះ​វៀន​,​ សន្លាក់​ដៃ​ជើង​, និងស្រវាំង​ភ្នែក»៕​​

អត្ថបទដោយ សួត វិចិត្រ


[1] មេក វិន សម្ភាសន៍ជាមួយ ព្រំ ជីន នៅភូមិឃ្លាំងកណ្តាល ឃុំត្រពាំងប្រិយ៍ ស្រុក​អន្លង់វែង នៅក្នុងឆ្នាំ​២០២៤។​

ចែករម្លែកទៅបណ្តាញទំនាក់ទំនងសង្គម

Solverwp- WordPress Theme and Plugin