ពីដំបូង ខ្ញុំមិនជឿថាខ្មែរក្រហមឃោរឃៅ

ប្រភពរូបថត៖ ហ្គូណា ប៊ឺកស្ត្រម (ខែសីហា ឆ្នាំ១៩៧៨)/បណ្ណសារមជ្ឈមណ្ឌលឯកសារកម្ពុជា

“កាលហ្នុង ភ្នំពេញ​ស្ងាត់ឈឹង។ កន្លែងណាមានមនុស្ស​នៅ មានតែកន្លែងនឹង។ កន្លែងណាគ្មាន គ្មានទេ។ ភ្លើង​តចោលតាម​ផ្លូវធំៗ។ កន្លែងណាគ្មាន​មនុស្ស​នៅងងឹត​សូន្យហ្មង។ មនុស្សនៅដោយ​កន្លែង។”[1] សូ គឹមយ៉ន ហៅរ៉េន អតីតយុវជន​ក្នុង​អង្គភាពពាណិជ្ជកម្ម​ខ្មែរក្រហម[2] បានចែករំលែក​យ៉ាង​ដូច្នេះ។ ខុស​ប្លែកពី​ប្រជាជន​កម្ពុជា​ទូទៅ ជីវិត​ស្ថិត​ក្រោម​របប​ខ្មែរក្រហម ពុំ​បាន​ប្រឈមជាមួយនឹង​ទុក្ខ​លំបាក​នោះទេ។ កត្តានេះ​ហើយ បាន​ញ៉ាំងឲ្យ​ រ៉េន ភ្ញាក់​ផ្អើល​​ក្រោយពីត្រលប់​ទៅស្រុកកំណើតវិញ​ក្រោយ​របបខ្មែរក្រហមដួល​រលំ និង​បាន​ដឹងពីអំពើ​ឃោរឃៅដែល​ខ្មែរក្រហមបាន​ប្រព្រឹត្ត​លើ​ប្រជាជន​នៅក្នុង​ភូមិ​ស្រុករបស់​ខ្លួន។

សូ គឹមយ៉ន ហៅ រ៉េន កើតនៅភូមិអង្កែវ ឃុំកណ្ដាលជ្រុំ ស្រុកពញាក្រែក ខេត្ដកំពង់ចាមខាងកើត ក្នុង​វណ្ណភាពកសិករកណ្ដាលថ្នាក់ក្រោម។  គឹមយ៉ន មាន​ឪពុកឈ្មោះ សូ កោយ និង​ម្តាយឈ្មោះ អ៊ូក ឡឹម ព្រមទាំងមាន​បងបងស្រី៤នាក់ និង​ប្អូនស្រីម្នាក់។[3] នៅមុន​ពេលខ្មែរក្រហម​ឡើង​កាន់អំណាច គឹមយ៉ន រៀនសូត្រ​បាន​បន្តិ​ចបន្តួច។ ដើម្បី​មាន​ឱកាស​រៀនសូត្រ​បន្ថែម នៅក្នុង​ឆ្នាំ១៩៧៤ គឹមយ៉ន បាន​បួសរៀន​នៅ​វត្ត​ក្នុងភូមិ​កំណើតបានមួយវស្សា និង​អាច​ចេះសរសេរបាន​ខ្លះ។ នៅពេល​ខ្មែរក្រហមឡើងកាន់អំណា​ច​នៅក្នុង​ឆ្នាំ​១៩៧៥ គឹម​យ៉ន និង​ព្រះសង្ឃដទៃទៀតនៅក្នុងវត្ត ត្រូវ​បាន​ចាប់​ផ្សឹក​និង​បង្ខំ​ឲ្យចូល​រួមនៅក្នុង​បដិវត្តន៍​។ ក្រោយផ្សឹក គឹម​យ៉ន​ ត្រូវ​បាន​ដាក់​បញ្ចូល​ឲ្យធ្វើ​ការ​នៅកងចល័ត​ផ្នែក​សេដ្ឋកិច្ច​ និង​ត្រូវ​បញ្ជូនឲ្យទៅធ្វើការ​នៅកំពង់​ផែកំពង់សោម នៅ​ខែ​សីហា ឆ្នាំ​១៩៧៥។ គឹមយ៉ន ចាំបានថា ព្រះសង្ឃ​ដែលត្រូវ​ផ្សឹករួច រួមជាមួយ​ប្រជាជន​ប្រមាណជា​១០០០ នាក់ ត្រូវ​បាន​ដឹកតាម​ឡាន​កាម៉ាស់ ប្រហែល​១០គ្រឿង​ ចេញទៅពីភូមិស្រុករបស់គាត់​ ឆ្លងកាត់និងសម្រាក​នៅភ្នំពេញ​ប្រមាណ៣ថ្ងៃ មុនពេល​បញ្ជូន​ទៅតាម​គោល​ដៅចាត់​តាំង​ផ្សេងៗ។

នៅកំពង់ផែកំពង់សោម ការងារ​ចម្បង​របស់​គឹមយ៉ន គឺ​លីសែង​ជ័រកៅស៊ូ, ឈើហ៊ុប និង​សំឡីគ​ដាក់លើ​កប៉ាល់របស់​ចិន​ ​និង​ជញ្ជូន​ទំនិញ​ដែល​ចិន​ផ្តល់​ឲ្យមក​វិញចុះពីកប៉ាល់​ចូល​កំពង់​ផែ។ ទំនិញ​ដែល​ចិន​ដឹកត្រលប់​មក​វិញ រួមមានដូចជា អង្ករ, ម៉ាស៊ីន​កិនស្រូវ​, ឡាន, ប្រេងសាំង និង​អាស៊ីតជាដើម។ នៅពេល​កប៉ាល់ចូល​ម្តងៗ គឹមយ៉ន​ និង​អ្នក​បម្រើ​ការ​នៅកំពង់ផែ ត្រូវ“ដឹកទំនិញតាមឡាន និងលីសែងទាំងយប់​ទាំង​ថ្ងៃ​ រយៈកាល​ប្រមាណជាងកន្លះខែ​” ទើបរួចរាល់។ គឹមយ៉ន​រំឭកថា កប៉ាល់ទំនិញនោះមានទំហំធំខ្លាំង ដែល “អាចលេងបាល់​” បាន។ នៅរាល់ពេល​កប៉ាល់ចូលម្តងៗ មានជំនាញការចិន ដែល​និយាយភាសា​ខ្មែរបាន​មួយម៉ាត់ៗ មកជាមួយ។ ចំពោះរបបអាហារ​នៅ​ការដ្ឋានកំពង់ផែនេះ គឹមយ៉ន លើកឡើង​ថាមានសភាពគ្រប់គ្រាន់ ដោយទទួលបានរបប​អាហារបីពេល​ក្នុង​មួយថ្ងៃ។ វេនការងារ​ត្រូវបាន​បែងចែកជាពីរ គឺពីម៉ោង ៦ព្រឹកដល់​ម៉ោង១២យប់ និងពីម៉ោង​១២យប់ដល់​ម៉ោង​៦ព្រឹក ដោយ​កម្មករ​ទាំងអស់​ត្រូវ​ប្រកាន់​ខ្ជាប់ម៉ោងពេលធ្វើការ​ឲ្យ​បាន​ខ្ជាប់ខ្ជួន។ យូរៗម្តង ប្រធាន​ក្រុម​បាន​កោះហៅ​កម្មករ​ជួបប្រជុំ និង​អប់រំ​ឲ្យ​យកចិត្ត​ទុក​ដាក់​លើការងារ។ ក្រោយបំពេញការងារ​នៅកំពង់ផែបាន​រយៈពេលជាងមួយឆ្នាំ ដោយសារ​ចំនួន​កម្មករ​ដែល​ត្រូវផ្លាស់ទៅកំពង់សោម មានចំនួនកើនឡើងច្រើន គឹមយ៉ន ត្រូវបាន​បញ្ជូន​មកធ្វើការ​នៅភ្នំពេញវិញ​។

នៅពេល​មក​ដល់​ភ្នំពេញ គឹមយ៉ន​ត្រូវ​ចាត់តាំង​ឲ្យធ្វើការ​ខាង​សេដ្ឋកិច្ច ដោយទទួល​បន្ទុក​បេះ​បន្លែ និង​ដួសបាយ​ទឹក​ជូនកម្មករ​លីសែងក្នុង​កង​របស់ខ្លួននៅទួលទំពូង។ ទីតាំងការងាររបស់​គឹមយ៉ន គឺជា​រោងបាយ មានទីតាំងជាប់នឹង​របងខាង​កើត​វត្តទួល​ទំពូង ដែលមានប្រធាន​កង​ពីរនាក់គឺ តាធារិទ្ធ និង​ស៊ីថា (ស្រី)។ យោងតាម​គឹមយ៉ន តាធារិទ្ធ ឬតារិទ្ធ មាន​អត្តចរិតកាច ដែលធ្វើឲ្យ​អ្នក​នៅក្នុង​កងរបស់​គាត់កោតខ្លាច។ ដូចទៅនឹងការ​រស់នៅកំពង់ដែរ ជីវភាព​នៅក្នុង​កង​រោងបាយ​នៅទួលទំពូង គឹមយ៉ន ទទួលបាន​របប​អាហារគ្រប់គ្រាន់។ ការងារ​នៅក្នុង​រោងបាយរួមមាន ការដើរប្រមែប្រមូល​បន្លែនៅតាម​ទីតាំងមួយចំនួនដូចជា ម្តុំចោមចៅ, បែកចាន, បឹងស្នោរ និង​ត្រើយម្ខាង​ខាងកើត​មុខ​វាំង។ ការធ្វើដំណើរទៅបំពេញការងារនៅទីតាំងទាំងនេះ​ ធ្វើឡើង​ដោយ​ថ្មើរជើង ឬដោយប្រើកង់។

គឹមយ៉ន លើកឡើង​ថា គាត់ពុំ​ដែល​ហ៊ាន​ទៅទីតាំងដទៃផ្តេសផ្តាសក្រៅពីទីតាំងដែលគេចាត់តាំងនេះឡើយ ទោះបីជាពេល​ខ្លះគាត់មានការងឿនឆ្ងល់ឬចង់ដឹងអ្វីមួយក្តី។ នៅពេល​ធ្វើដំណើរទៅទីតាំងចាត់តាំង និង​ឆ្លងកាត់​ម្តុំ​ខាងកើត និង​ខាង​លិច​ផ្សារដើមគរ គាត់​តែ​ឮសំឡេង​មនុស្ស​ស្រែកយ៉ូយពីការ​ឈឺចាប់បង្កឡើង​ដោយការ​វាយដំ និងស្រែក​ឲ្យជួយ ក៏ប៉ុន្តែ​គាត់​ពុំ​ដែល​ហ៊ាន​ទៅលួចមើលអ្វីទេ ព្រោះមិត្តរួមកង​តែងនិយាយបន្លាចថា បើល្មើសនឹង​ត្រូវគេ​ចាប់​យកទៅ។ ម្តងម្កាល កម្មករ​នៅក្នុង​កងរោងបាយ​របស់ ​គឹមយ៉ាន ត្រូវ​កោះហៅឲ្យទៅមើល​ខ្សែភាពយន្ត​ឯកសារ​នៅ​ឯរោងកុន​បូកគោ។ ខ្សែភាពយន្តចិន​ ពិពណ៌នាអំពី​វីរភាព ​និង​ការពារជាតិ​តែង​ត្រូវបាន​ចាក់​បញ្ចាំង។

នៅក្នុង​អំឡុង​ឆ្នាំ​១៩៧៧ គឹមយ៉ន​ បាន​រំឭកថាមានការឃោសនា​ថា “ពួកបូព៌ាហ្នឹង ពួក​ក្បាល​យួន​ខ្លួនខ្មែរ”។ ក្រោយការឃោសនា​នេះបាន​ឮសុះសាយ មានការ​ស៊ើបរក​អ្នក​ដែល​មកពី​ខាង​ភូមិភាគ​បូព៌ា។ នៅក្នុង​កងរបស់​គឹមយ៉ន ដែល​ភាគច្រើន​មាន​សមាជិក​ដែល​ពុំ​បាន​លាក់​ប្រវត្តិរូប និង​មកពីភូមិភាគ​បូព៌ាជាច្រើននាក់ ត្រូវ​បាន​ចាប់យកទៅ​ប្រមូល​ផ្តុំ​នៅផ្សារថ្មីមួយ​រយៈ មុនពេល​បញ្ជូនទៅសំឡូត ក្នុង​ខេត្តបាត់ដំបង។ គឹមយ៉ន ពុំ​បាន​ដឹង​ថា​អ្នកទាំងនោះត្រូវ​បញ្ជូន​ទៅបាត់ដំបង​ធ្វើអ្វីនោះទេ ក៏ប៉ុន្តែ​គាត់​បាន​លាក់​ប្រវត្តិរូប និង​រួចផុតពីការ​ចាប់យកទៅ។ ក្រោយពីការចាប់មនុស្ស​ទ្រង់ទ្រាយធំពីកងរបស់ខ្លួន គឹមយ៉ន​ នៅតែបន្ត​បំពេញការងារ​នៅកងនេះ​ដដែល រហូត​ដល់​មានការចូល​មកដល់​របស់​វៀតណាម។

នៅពេលនោះ ស្ថានភាព​ច្របូក​ច្របល់ គឹមយ៉ន​ និង​សមមិត្ត​ប្រមាណ១២នាក់​ផ្សេងទៀត​ ត្រូវប្រធាន​ក្រុម​កៀរយកទៅជាមួយ​ដើម្បី​តស៊ូ​ប្រយុទ្ធ​នៅ​ស្រុក​ដងទង់ (ខេត្តកោះកុង) ក្បែរ​ព្រំដែនថៃ។ នៅទីនេះ គឹមយ៉ន ត្រូវចាត់តាំង​ឲ្យ​កាន់​កាំភ្លើង​ធ្វើជាទ័ពព្រៃ​ដើម្បី​តតាំងជាមួយ​វៀតណាម។ ស្ថានភាព​រស់នៅក្នុង​ព្រៃមាន​សភាពយ៉ាប់យឺន ដោយ​គ្មានស្បៀង​គ្រប់គ្រាន់ ហើយ​មនុស្សម្នា​ត្រូវ​ប្រឈមនឹងជំងឺគ្រុនចាញ់។ គឹមយ៉ន​ រំឭកថា សមមិត្ត​រួមដំណើរទៅកាន់ទីតាំងនេះជាមួយគាត់ ទាំងអស់បាន​ធ្លាក់ខ្លួនឈឺ​និង​ស្លាប់។ ការ​ប្រយុទ្ធ​នៅតែ​បន្ត ហើយ​កងទ័ពខ្មែរក្រហម​បន្ត​ផ្លាស់ទីក្រោយចាញ់​សមរភូមិ។ គឹមយ៉ន បាន​បន្ត​ដំណើរ​តាម​ព្រំដែន​រហូត​ដល់​ខេត្តបាត់ដំបង។ ដោយសារតែ​ពុំ​ធ្លាប់​រងភាពលំបាក នៅដើមឆ្នាំ​១៩៨០ គឹមយ៉ន​ បាន​រត់ចោលជួរ និង​គេចទៅស្រុកកំណើត​របស់​ខ្លួនវិញ។

នៅតាម​ផ្លូវ​ធ្វើដំណើរមកកាន់​ស្រុកកំណើត គឹមយ៉ន តែងត្រូវ​​ប្រជាជន​ប្រាប់​អំពី​ទុក្ខ​វេទនា​ខ្លួន​បាន​ជួបប្រទះ។ នៅពេលនោះ គឹមយ៉ន ហាក់មិនទាន់​ជឿថា ខ្មែរក្រហម​ប្រព្រឹត្ត​អំពើទាំងនេះ លើប្រជាជនទេ ព្រោះគាត់​ពុំ​ដែល​ពើ​បប្រទះនឹង​ព្រឹត្តិការណ៍ទាំងនេះ នៅក្នុងរបបខ្មែរក្រហមទេ។ នៅពេល​មកដល់​ស្រុកកំណើត និងបាន​ជួបជាមួយឪពុក​ម្តាយ និងក្រុមគ្រួសារ ព្រមទាំងបាន​ស្តាប់ពីការរៀបរាប់​អំពីទុក្ខវេទនារបស់​ក្រុមគ្រួសារ​ក៏ដូចជា​អ្នក​ភូមិ ទើប​ គឹមយ៉ន ​ជឿថាពិតជា ខ្មែរក្រហមពិតជាបាន​ប្រព្រឹត្ត​អំពើសាហាវឃោរឃៅទាំងនេះ​លើ​ប្រជាជន។

នៅក្នុង​ឆ្នាំ​១៩៨០ដដែល គឹមយ៉ន បាន​រៀបការជាមួយប្រពន្ធរបស់​ខ្លួន ឈ្មោះ ប៊ិន យ៉ុន។ គាត់​ទាំងពីរមានកូន​ស្រីម្នាក់ និង​កូនប្រុសបីនាក់ ហើយ​បន្ត​រស់នៅ​ភូមិកំណើត​របស់​ខ្លួន។ គឹមយ៉ន និង​ប្រពន្ធ តែ​ងនិយាយរៀបរាប់​ប្រាប់​កូនចៅរបស់​ខ្លួន​អំពី​ដំណើរ​ជីវិត​របស់​ខ្លួន​ក្នុង​របប​ខ្មែរក្រហម៕

អត្ថបទដោយ៖ សុភ័ក្រ្ត ភាណា

[1] បទសម្ភាសន៍ជាមួយ សូ គឹមយ៉ន ហៅរ៉េន នៅថ្ងៃទី​១៦ ខែមីនា ឆ្នាំ​២០០៤ ដោយ​ ឡុង​ ដានី បុគ្គលិក​មជ្ឈមណ្ឌលឯកសារ​កម្ពុជា។ សូ គឹមយ៉ន ហៅរ៉េន ជា​ម្ចាស់​ប្រវត្តិរូប I08298 នៅពេល​ផ្តល់បទសម្ភាសន៍ មានអាយុ៤៦ឆ្នាំ រស់នៅភូមិ​អង្កែវ ឃុំ​អញ្ចើម ស្រុកត្បូង​ឃ្មុំ ខេត្ត​កំពង់ចាម។

[2] ព័ត៌មាន​ដកស្រង់ចេញពីឯកសារ​ I08298 តម្កល់​ក្នុង​បណ្ណសារ​មជ្ឈមណ្ឌលឯកសារកម្ពុជា។

[3] ដូចខាងលើ។

ចែករម្លែកទៅបណ្តាញទំនាក់ទំនងសង្គម

Solverwp- WordPress Theme and Plugin