តន់ យ៉េង៖ មេក្រុមដឹកជញ្ជូន ពាណិជ្ជកម្មភាគពាយ័ព្យ
ឯកសារចម្លើយសារភាពសរសេរដោយដៃចំនួន២២ទំព័រ ជារបស់ តន់ យ៉េង[1] មុនអង្គការចាប់ខ្លួន យ៉េនមានតួនាទីជាមេក្រុមដឹកជញ្ជូន ពាណិជ្ជកម្មភូមិភាគពាយ័ព្យ។ តាមរយៈចម្លើយសារភាពនៅក្នុងឯកសារនេះ (J00១០៦) បង្ហាញអំពីសកម្មភាព តន់ យ៉េង ចូលបម្រើក្នុងជួរបដិវត្តន៍ តាមការណែនាំពីឈ្មោះឆាយ និងបញ្ចូលជា សេ អ៊ី អា ដោយឈ្មោះ សៅ, យួស សុថា និងសុវណ្ណ ហុង។ ការចូលបម្រើបដិវត្តន៍នេះ តន់ យ៉េង បានធ្វើផែនការ តាមដានខ្មែរក្រហម និងកសាងកម្លាំងសេ អ៊ី អា។ ខាងក្រោមនេះ ជាចម្លើយសារភាពរបស់ តន់ យ៉េង ៖
តន់ យ៉េង ភេទប្រុស អាយុ៤០ឆ្នាំ មានស្រុកកំណើតនៅភូមិបឹងសាលា ឃុំបឹងសាលា ស្រុកកំពង់ត្រាច ខេត្តកំពត។ នៅវត្តឫស្សី ពេល យ៉េង អាយុ១៦ ឆ្នាំ នៅទីនោះបាន មួយឆ្នាំគាត់ក៏ត្រឡប់ទៅធ្វើការស៊ីឈ្នួលរែកទឹកស្រោចធូរេន ឲ្យជនជាតិចិននៅវត្តស្នាំអំពិល។ យ៉េង ធ្វើការងារនេះបានត្រឹមរយៈពេលមួយឆ្នាំ ក៏ឈប់។ នៅឆ្នាំ១៩៥៨ តាមរយៈឈ្មោះ ឆាយ បានអប់រំ យ៉េង ឲ្យស្អប់របបកុម្មុយនិស្ដ ដោយទទួលស្គាល់ពីឈ្មោះ សៅ, យួស សុថា និងសុវណ្ណ ហុង បានបញ្ចូល យ៉េង និង ឈ្មោះ សុន ជាភ្នាក់ សេ អ៊ី អា។ បន្ទាប់មក ឆាយ បានចាត់តាំង យ៉េង និងសុន ឲ្យទៅវាយថ្មនៅរោងចក្រីទីង ហើយបានភ្ជាប់ខ្សែ ជាមួយឈ្មោះ ពុត អតីតមេការទទួលខុសត្រូវកម្មករវាយថ្ម ក្នុងការតាមដានខ្មែរក្រហម និងកសាងកម្លាំង សេ អ៊ី អា។
នៅឆ្នាំ១៩៦០ យ៉េង បានទទួលផែនការពីឈ្មោះ ពុត នៅភូមិអារីញាន ជាមួយខ្សែរបស់ពុត ចំនួន៦នាក់ អប់រំយុវជនឲ្យធ្វើសកម្មភាពតាមដានខ្មែរក្រហម និងបញ្ជូនទៅឲ្យឈ្មោះ ឆាយ បញ្ចូល ជា សេ អ៊ី អា។ តាមរយៈ ឈ្មោះ ពុត ដដែល បានណែនាំ យ៉េង ឲ្យទាក់ទងជាមួយឈ្មោះ ស៊ូ ហៅសើរ មានតួនាទីជំនួយការគណៈតំបន់២ និងឈ្មោះ កាន់ ហៅសារឿន មានតួនាទីប្រធានបង្កបង្កើនផលនៅភូមិកន្ធារ នៅភូមិភាគពាយ័ព្យ (ភូមិភាគ៥៦០) ស្រុកបាកាន ទំបន់២ នៅខេត្តពោធិ៍សាត់។[2] នៅឆ្នាំ១៩៦១ ឈ្មោះ សើរ និងសារឿន បានណែនាំ យ៉េង ឲ្យស្គាល់ជាមួយឈ្មោះ លន់ អតីតមេចោរព្រៃ នៅភូមិតាលោ ឲ្យទទួលស្គាល់ យ៉េង ជាខ្សែ សេ អ៊ី អា។ ពេលនោះ យ៉េង ទទួលភារកិច្ចជាអ្នកតាមដានខ្មែរក្រហម និងកសាងកម្លាំង សេ អ៊ី អា។ តាមផែនការនេះ យ៉េង កសាងកម្លាំងបានចំនួន៨នាក់ និងអប់រំឲ្យតាមដានបក្សខ្មែរក្រហមដូចខ្លួនដែរ។ នៅឆ្នាំ១៩៦៨ យ៉េង និងខ្សែ សេ អ៊ី អា ចំនួន៩នាក់ បានដាក់ផែនការសកម្មភាពបំផុសដល់យុវជន នៅឃុំតាលោ ឲ្យធ្វើបាតុកម្មប្រឆាំងនឹងបក្ខពួកខ្មែរក្រហម។
នៅឆ្នាំ១៩៧០ យ៉េង និងសមាជិកចំនួន១១នាក់ ទទួលផែនការពីឈ្មោះ សើរ និងយឿន នៅភូមិកូនត្នោត និងបានចូលបង្កប់ខ្លួនចំនួន៣នាក់ បំផុសឲ្យយុវជនរត់ចូលតំបន់ខ្មាំង និងលួចវាយកម្ទេចកម្លាំងបដិវត្តន៍។ ពេលនោះ យ៉េង មានតួនាទីប្រធានភូមិកន្ធារ ភូមិភាគពាយ័ព្យ (ភូមិភាគ៥៦០) នៅស្រុកបាកាន តំបន់២ ខេត្តពោធិ៍សាត់[3] និងបានធ្វើសកម្មភាពបំផុសប្រជាជននៅភូមិកន្ធារ ឲ្យរត់ចូលតំបន់ខ្មាំងចំនួន៥នាក់នៅផ្សារត្រពាំងជ័យ។ នៅខែមិថុនា ឆ្នាំ១៩៧១ តាមសេចក្ដីរាយការណ៍ពី យ៉េង បានផ្ដល់ព័ត៌មានទៅកាន់ឈ្មោះ លន់ ឲ្យធ្វើសកម្មភាពទម្លាក់គ្រាប់នៅមន្ទីរសេដ្ឋកិច្ចតំបន់២ នៅភូមិកោះស្វាយ បណ្ដាលឲ្យឃ្លាំងមួយកន្លែងត្រូវបានខូចខាត។ លើសពីនេះ យ៉េង និងសមាជិកចំនួន៤នាក់ បានបំផុសប្រជាជនឲ្យរត់ចូលតំបន់ខ្មាំង ហើយស៊ើបរកកន្លែងមន្ទីរ ដើម្បីបញ្ជូនយន្ដហោះទៅទម្លាក់គ្រាប់ទីនោះ។ បន្ទាប់មក យ៉េង និងម៉ន កសាងកម្លាំងបានចំនួន២នាក់ នៅភូមិកោះក្របី។ អ្នកទាំងពីរបានធ្វើសកម្មភាព លួចដុតស្រូវប្រជាជន និងស៊ើបការណ៍នៅតាមជួរកងទ័ព ដើម្បីរាយការណ៍ទៅឲ្យឈ្មោះ ស៊ូ ទៅកម្ទេចទីតាំងនោះ។
នៅខែមេសា ឆ្នាំ១៩៧៥ យ៉េង និងកម្លាំងចំនួន១១នាក់ បានចូលរួមប្រជុំនៅភូមិព្រអាំ ដោយទទួលផែនការពីឈ្មោះ សើរ ឲ្យធ្វើសកម្មភាពបំផ្លាញសម្ភារ និងបំផុសប្រជាជនថ្មី ឲ្យធ្វើបាតុកម្មប្រឆាំងនឹងបដិវត្តន៍។ ពេលនោះ ឈ្មោះ សើរ ក៏ចាត់តាំង យ៉េង និងសមាជិកចំនួន២នាក់ ឲ្យទៅដឹកអង្ករចំនួន១១បាវ និងក្រណាត់១០០ម៉ែត្រដែលទុកនៅស្រុកមោងឫស្សី បញ្ជូនទៅឲ្យ ឈ្មោះ សើរ នៅភូមិថ្នល់បត់។
នៅខែមករា ឆ្នាំ១៩៧៦ តាមរយៈឈ្មោះ ម៉ន បានចាត់ យ៉េង ឲ្យទៅកាន់កាប់ផ្នែកដឹកជញ្ជូន នៅខេត្តពោធិ៍សាត់ មានតួនាទី មេក្រុមបើកឡានដឹកជញ្ជូនផ្នែកពាណិជ្ជកម្ម និងកសាងកម្លាំងនៅក្នុងក្រុមដឹកជញ្ជូននោះ។ នៅខែមិថុនា ឆ្នាំ១៩៧៦ យ៉េង និងសមាជិកចំនួន៥នាក់ បានរៀបចំការប្រជុំ ដែលមានទីតាំងនៅក្រុងពោធិ៍សាត់ ដោយដាក់ផែនការកសាងកម្លាំង និងត្រៀមស្បៀងទុកសម្រាប់វាយបដិវត្តន៍ ហើយថែមទាំង លាក់ប្រេងម៉ាស៊ូតបានចំនួន១៦០លីត្រ នៅក្រុងបាត់ដំបងផងដែរ។
នៅខែមករា ឆ្នាំ១៩៧៧ យ៉េង, ភិន និងវ៉ា បានធ្វើសកម្មភាព លាក់ទុកប្រេងម៉ាស៊ូត ចំនួន២០ធុងធំ,ប្រេងម៉ាស៊ីនមួយធុងធំ និងសម្លៀកបំពាក់ចំនួន១០០សម្រាប់។ លើសពីនេះ យ៉េង ក៏បើករថយន្តបុក ធ្វើខូចអស់ចំនួន២គ្រឿង។ នៅខែមេសា ឆ្នាំ១៩៧៧ យ៉េង និងសមាជិកចំនួន១២នាក់ បានទៅប្រជុំនៅក្រុងបាត់ដំបង និងបានដាក់ផែនការវាយនៅភូមិភាគពាយ័ព្យនៅខែកញ្ញា ឆ្នាំ១៩៧៧។ មុនដំបូង សមាជិកទាំងអស់ ត្រូវសហការជាមួយកងទ័ពអ៊ិនតាំង ហើយបែងចែកជាបីមុខសញ្ញា។ ទី១) ចាប់ផ្ដើមវាយចេញពីស្រុកដូនទាវ សហការជាមួយកងទ័ពតំបន់៥ នៅភូមិភាគពាយ័ព្យ (ភូមិភាគ៥៦០) នៅថ្មពួក ខេត្តពោធិ៍សាត់។[4] ទី២) ត្រូវវាយចេញពីក្រុងបាត់ដំបង ហើយសហការជាមួយកងទ័ព តំបន់៥ នៅនិមិត្ត និងចុងក្រោយទី៣) ត្រូវវាយយកឃ្លាំងអាវុធនៅក្រុងបាត់ដំបងទាំងមូល។ គោលបំណងធំជាងគេនោះ គឺភូមិភាគនេះ សម្បូរដោយតំបន់សេដ្ឋកិច្ច។ ជាពិសេស ជាតំបន់ ដែលនៅជាប់នឹងព្រុំប្រទល់ប្រទេសថៃ ដែលផ្ដល់ភាពងាយស្រួលដល់ការសុំជំនួយ និងអប់រំឲ្យអ្នកទាំងនោះ ឲ្យប្រឆាំងនឹងបដិវត្តន៍។ រហូតដល់ថ្ងៃទី២១ ខែសីហា ឆ្នាំ១៩៧៧ យ៉េង ត្រូវបានអង្គការចាប់ខ្លួន និងសួរចម្លើយនៅថ្ងៃទី២ ខែតុលា ឆ្នាំ១៩៧៧។
អត្ថបទដោយ ជីម សុខគា
[1] ឯកសារ J00១០៦ តម្កល់នៅបណ្ណាសារមជ្ឈមណ្ឌលឯកសារកម្ពុជា មានចំណងជើង «តន់ យ៉េង៖ មេក្រុមដឹកជញ្ជូន ពាណិជ្ជកម្មភាគពាយ័ព្យ»។ បានបង្ហាញអំពីសកម្មភាព តន់ យ៉េង ចូលបម្រើក្នុងជួរបដិវត្តន៍ តាមការណែនាំពីឈ្មោះឆាយ និងបញ្ចូលជា សេ អ៊ី អា ដោយឈ្មោះ សៅ,យួស សុថា និងសុវណ្ណ ហុង ។ ការចូលបម្រើបដិវត្តន៍នេះ តន់ យ៉េង បានធ្វើផែនការ តាមដានខ្មែរក្រហម និងកសាងកម្លាំងសេ អ៊ី អា។
[2] ផេង ពង្សរ៉ាស៊ី និង អ្នកផ្សេងទៀត, សៀវភៅប្រវត្តិសាស្ត្រកម្ពុជាប្រជាធិបតេយ្យ (១៩៧៥-១៩៧៩), បោះពុម្ពលើកទី២ (ភ្នំពេញ ២០២០),៣៤។
[3] ឯកសារដូចគ្នា។
[4] ឯកសារដូចគ្នា។