សេចក្ដីក្លាហានពិតប្រាកដគឺជាភាពស្ងៀមស្ងាត់ប្រកបដោយគុណធម៌មួយ ដែលស្ថិតនៅចន្លោះរវាងភាពខ្មាស់អៀនខ្វះការទុកចិត្ត និងភាពសើៗឡេះឡោះមិនប្រុងប្រយ័ត្ន។ សេចក្ដីក្លាហានពិតប្រាកដគឺជាភាពស្ងៀមស្ងាត់ ពីព្រោះវាជាលទ្ធផលកើតផុសចេញពីកម្លាំងចិត្តដែលមិនងាយទ្រុឌទ្រោម និងការតាំងចិត្តដ៏មោះមុតដែលមិនពឹងផ្អែកលើ ឋានៈ បុណ្យស័ក្តិ ឬក្អេងក្អាង។ សេចក្ដីក្លាហានពិតប្រាកដគឺស្ថិតនៅចន្លោះរវាងចំណុចផ្ទុយគ្នាដាច់ស្រឡះនៃធម្មជាតិរបស់មនុស្សចំនួនពីរគឺ៖ ភាពខ្មាសអៀនខ្វះការទុកចិត្ត និងភាពសើៗឡេះឡោះមិនប្រុងប្រយ័ត្ន​។ ភាពខ្មាសអៀនខ្វះការទុកចិត្តគឺនៅផ្តុំលើភាពភ័យខ្លាច ភាពអសន្តិសុខ និងការធ្លាក់ទឹកចិត្ត។ ចំណែកឯភាពសើៗឡេះឡោះមិនប្រុងប្រយ័ត្ន វាស្ថិតនៅជ្រុងម្ខាងទៀតនៃចំណុចផ្ទុយគ្នាដែលជ្រុលនិយម គឺខ្វះការប្រុងប្រយ័ត្ន ខ្វះការគិតគូរវែងឆ្ងាយ និងខ្វះការយកចិត្តទុកដាក់ចំពោះអ្នកដទៃ។ សេចក្ដីក្លាហានដែលស្ថិតនៅចន្លោះគុណភាពទាំងពីរនេះគឺជាគុណធម៌ឧត្តុង្គឧត្តមបំផុត មិនសម្រាប់កងទ័ពតែប៉ុណ្ណោះទេ ប៉ុន្តែវាក៏សម្រាប់ប្រជាជនជាទូទៅដែរ។

វីរកងទ័ពកម្ពុជានៅក្នុងវីដេអូនេះបានបង្ហាញយ៉ាងច្បាស់នូវសេចក្ដីក្លាហានពិតប្រាកដដោយគុណធម៌មួយរបស់ស្មារតីអ្នកប្រយុទ្ធ។ យើងត្រូវតែអនុវត្តឱ្យបានល្អ ដោយមិនត្រឹមតែទទួលស្គាល់សេចក្ដីក្លាហាន នឹង ផ្តល់រង្វាន់ដល់វីរកងទ័ព ប៉ុន្តែថែមទាំងដល់ជនស៊ីវិលដែលបានបង្ហាញនូវសេចក្ដីក្លាហាន​​ក្នុងកាលៈទេសៈដ៏ចាំបាច់បែបនេះ និងសូម្បីតែនៅក្នុងជីវភាពរស់នៅប្រចាំថ្ងៃ ព្រោះអ្នកទាំងនោះគឺជាគំរូសម្រាប់ប្រទេសជាតិ។

ឆាំង យុ

នាយកមជ្ឈមណ្ឌលឯកសារកម្ពុជា

ថ្ងៃទី១៩ ខែវិច្ឆិកា ឆ្នាំ២០២៥

យោង៖ វីដេអូមួយដែលបានបង្ហាញពីវីរកងទ័ពកម្ពុជាម្នាក់ឈ្មោះ ឈុំ ស្រេង បានរក្សាជំហររបស់គាត់យ៉ាងរឹងមាំនៅចំពោះមុខការគំរាមកំហែងពីសំណាក់ទាហានថៃ កាលពីថ្ងៃទី២៣ ខែកក្កដា គឺមុនមួយថ្ងៃនៃការប៉ះទង្គិចគ្នាដោយអាវុធ កាលពីថ្ងៃទី២៤-២៥ ខែកក្កដា។ (FB @ Yaa Daa)