អ៊ុយ យ៉ន ហៅ ប៊ុន លី ភេទប្រុស អាយុ២៣ឆ្នាំ ដែលជាប្រធានវរសេនាតូចលេខ៦៨ ភូមិភាគបូព៌ា ត្រូវបានចាប់ខ្លួន និងបញ្ជូនមកសម្លាប់នៅគុកទួលស្លែង។ បុគ្គលិកមជ្ឈមណ្ឌលឯកសារកម្ពុជា បានជួបសម្ភាសន៍ជាមួយឈ្មោះ សួស ប៊ិន អាយុ៧៣ឆ្នាំ ត្រូវជាម្ដាយ និងឈ្មោះ អ៊ុយ ប៉ុន អាយុ៧៨ឆ្នាំ ត្រូវជាឪពុករបស់យ៉ន។

ខាងក្រោមនេះគឺជាការបញ្ជាក់ឪពុកម្តាយរបស់ យ៉ន ពីកូនប្រុសមុនពេលបាត់ខ្លួនក្នុងរបបខ្មែរក្រហម៖

យ៉ន មានបងប្អូនចំនួន៥នាក់ និងមានស្រុកកំណើត នៅភូមិក្រសាំងជ្រំ ឃុំគ្រួស ស្រុកស្វាយជ្រំ ខេត្ដស្វាយរៀង។ កាលពីកុមារភាព យ៉ន រៀនបានត្រឹមថ្នាក់ទី៦(សង្គមចាស់) នៅសាលាបឋមសិក្សាចំបក់។ ក្រោយពីឈប់រៀន គាត់បានទៅបួសជាព្រះសង្ឃ នៅវត្តក្រសាំងជ្រំរយៈពេល៣វស្សា ហើយបានសឹក និងមករស់នៅជាមួយឪពុកម្តាយនៅស្រុកកំណើតវិញ។

នៅឆ្នាំ១៩៧២ យ៉ន បានស្ម័គ្រចិត្ដចូលបម្រើចលនាតស៊ូខែ្មរក្រហម។ នៅឆ្នាំ១៩៧៣ ខ្មែរក្រហមចាត់តាំង យ៉ន ឲ្យធ្វើជាកងឈ្លបឃុំគ្រួស​។ នៅពេលនោះ យ៉ន អាចមកលេងឪពុកម្តាយ និងបងប្អូនបានជាធម្មតា​។ នៅឆ្នាំ១៩៧៤ យ៉ន ត្រូវបានថ្នាក់លើបញ្ជូនទៅធ្វើជាពេទ្យតំបន់២៣ ដែលប្រចាំការនៅទីរួមខេត្តស្វាយរៀង។ នៅឆ្នាំ១៩៧៥ ពេលដែលខ្មែរក្រហមឡើងកាន់អំណាច យ៉ន បានបាត់ដំណឹងព្រោះគាត់មិនបានមកលេងឪពុកម្តាយ និងបងប្អូនដូចពីមុន។

នៅឆ្នាំ១៩៧៨ ឪពុកម្តាយរបស់យ៉ន ទទួលដំណឹងពីអ្នកធ្លាប់ស្គាល់កូនរបស់ខ្លួនថា យ៉ន បានបាត់ខ្លួន។ នៅក្រោយឆ្នាំ១៩៧៩ ពេលដែលរបបខ្មែរក្រហម​ដួលរលំ ឪពុកម្តាយ និងបងប្អូនមិនឃើញ យ៉ន ត្រលប់មកស្រុកកំណើតវិញទេ។

យោងតាមឯកសារK00322 និង TSL2639 តម្កល់នៅមជ្ឈមណ្ឌលឯកសារកម្ពុជា អ៊ុយ យ៉ន ភេទប្រុស, មានម្តាយឈ្មោះសួស ប៊ិន, មាន ឪពុកឈ្មោះ អ៊ុយ ប៉ុន និងមានស្រុកកំណើតនៅភូមិក្រសាំងជ្រំ ឃុំគ្រួស ស្រុកស្វាយជ្រំ ខេត្ដស្វាយរៀង, ត្រូវបានរបបខ្មែរក្រហមចាប់ខ្លួន និងសម្លាប់នៅគុកទួលស្លែងនៅថ្ងៃទី២៥ ខែមីនា ឆ្នាំ១៩៧៨។ ឯកសារខាងលើសរសេរថាមុនចាប់ខ្លួន យ៉ន កំពុងបម្រើការងារជាប្រធានយោធានៅវរសេនាតូចលេខ៦៨, វរសេនាធំ១១២, កងពលលេខ៧០៣, តំបន់២៣, នៃភូមិភាគបូព៌ា។ យ៉ន ធ្លាប់ជាប្រធានពេទ្យតំបន់២៣ មុនពេលធ្វើជាប្រធានយោធាវរសេនាតូចលេខ៦៨៕

អត្ថបទដោយ អេង សុខម៉េង ថ្ងៃទី១៩ ខែកុម្ភៈ ឆ្នាំ២០២៥

សម្ភាសន៍ដោយ ផាន់ សុជា ថ្ងៃទី២៤ សីហា ឆ្នាំ២០០៥