យី ងាវ និងបក្ខពួក ធ្វើសកម្មភាព ឃោសនាដល់ប្រជាជន ដើម្បីបំផ្លាញនឹងអង្គការបដិវត្តន៍
ឯកសារចម្លើយសារភាពសរសេរដោយដៃចំនួន២៣ទំព័ររបស់ យី ងាវ [1] មុនអង្គការចាប់ខ្លួន មានតួនាទីជាយុវជនកងចល័តការដ្ឋានព្រៃមាន់ ស្រុកព្រះនេត្រព្រះតំបន់៥ ភូមិភាគពាយ័ព្យ (ភូមិភាគ៥៦០)ខេត្តបាត់ដំបង។[2] តាមរយៈចម្លើយសារភាពនៅក្នុងឯកសារនេះ (J00១០៣) បង្ហាញអំពីសកម្មភាព ឈ្មោះ ងាវ ចូលបម្រើក្នុងជួរបដិវត្តន៍ ដែលទទួលស្គាល់ពីឈ្មោះ សឿ ក្លូ មានតួនាទីជាអនុរៈនៃវិទ្យាល័យព្រះឧទ័យ។ ការធ្វើបដិវត្តនេះ ងាវ បានជាប់ពាក់ព័ន្ធជាមួយក្រុមមនុស្សចំនួន៥១នាក់ ដោយធ្វើផែនការបំផ្លាញកម្លាំងបដិវត្តន៍ និងបំផុសឲ្យយុវជនស្អប់បក្ខពួករបស់ខ្មែរក្រហម។ រហូតមកដល់ថ្ងៃទី១៩ ខែសីហា ឆ្នាំ១៩៧៧ ងាវ ត្រូវបានអង្គការចាប់ខ្លួន ។ នៅក្នុងអត្ថបទនេះ ឃើញមានការចុះហត្ថលេខា និងឈ្មោះអ្នកសួរចម្លើយជាកម្មាភិបាលខ្មែរក្រហម និងបានកត់ត្រា កាលបរិច្ឆេទនៅថ្ងៃទី២៥ ខែកញ្ញា ឆ្នាំ១៩៧៧ ។ ខាងក្រោមនេះ ជាចម្លើយសារភាពរបស់ យី ងាវ ៖
យី ងាវ ភេទប្រុស អាយុ៣១ឆ្នាំ មានស្រុកកំណើតនៅភូមិទង្កែ ឃុំស្នោ ស្រុក៥៥ តំបន់៣៣ ភូមិភាគនិរតី (ភូមិភាគ៤០៥) ក្នុងខេត្តតាកែវ។[3] នៅឆ្នាំ១៩៥៣ ងាវ បានចូលរៀនថ្នាក់ទី១២ នៅសាលាក្រាំងស្លា ស្ថិតនៅឃុំចារ ស្រុក៥៥។ បន្ទាប់មក នៅឆ្នាំ ១៩៦១ ដល់១៩៦២ ងាវ រៀនដល់ថ្នាក់ទី៦ នៅវិទ្យាល័យព្រះសោមា ក្នុងឃុំព្រៃល្វា។ រហូតដល់ចុងឆ្នាំ ១៩៦៥ ងាវ រៀនដល់ថ្នាក់ទី២ នៅវិទ្យាល័យព្រះឧទ័យនៅក្រុងតាកែវ។
នៅខែកុម្ភៈ ឆ្នាំ១៩៦៦ ឈឹម សំអាត ដែលជាគ្រូបង្រៀន ងាវ និងវឌ្ឍនៈ រួមទាំងសមាជិកចំនួន៤នាក់បញ្ចូល ជា សេ អ៊ី អា ដោយទទួលស្គាល់ពីឈ្មោះ សឿ ក្លូ មានតួនាទីជាអនុរៈវិទ្យាល័យព្រះឧទ័យ។ អ្នកទាំងអស់ធ្វើកម្មភាពស្រាវជ្រាវរកសិស្សដែលមាននិន្នាការខ្មែរក្រហម ដើម្បីកសាងកម្លាំង សេ អ៊ី អា និងឃោសនាឲ្យប្រជាជនស្អប់ខ្មែរក្រហម។ លើសពីនេះ សឿ ក្លូ និងងាវ កសាងកម្លាំងចំនួន២នាក់ ដែលជាគ្រូបង្រៀន បញ្ចូនឲ្យយកការពីខ្មែរក្រហមដែលបង្កប់ខ្លួននៅក្នុងសាលារៀន ហើយថែមទាំងចាប់បានសិស្សម្នាក់ ដែលមានឪពុកមា ធ្វើការជាមួយខ្មែរក្រហមផងដែរ។
នៅឆ្នាំ១៩៦៧ ងាវ ប្រឡងជាប់ជាគ្រូបង្រៀន និងបានទៅរៀនច្បាប់គ្រូនៅសាលាគរុកោសល្យនៅទីក្រុងភ្នំពេញ និងអប់រំមនុស្សចំនួន២នាក់ ឈ្មោះ ថាច់ បា និងឆាន់ អ៊ុល ដែលជាគ្រូបង្រៀននៅគរុកោសល្យ ដោយលើកផែនការ ស៊ើបការណ៍ និងស្វែងរកខ្មែរក្រហម ត្រូវអប់រំដល់គ្រូបង្រៀនកុំឲ្យចាញ់ឧបាយកលរបស់ខ្មែរក្រហម និង កសាងកម្លាំង សេ អ៊ី អា ឲ្យបានច្រើនទៀត។ រយៈពេលមួយឆ្នាំក្រោយមក ងាវ ចេញបង្រៀនសិស្សលើកដំបូង នៅសាលាប្រសូត្រ ស្រុកស្វាយទាប ខេត្តស្វាយរៀង និងស្គាល់ជាមួយឈ្មោះ គង់ ស៊ឹម ជានាយកសាលាប្រសូត្រ ដើម្បីភ្ជាប់ខ្សែ សេ អ៊ី អា តាមរយៈឈ្មោះ ថាច់ បា ឲ្យធ្វើសកម្មភាពតាមដានខ្មែរក្រហម។ នៅខែកញ្ញា ឆ្នាំ១៩៦៩ ងាវ បានផ្លាស់មកបង្រៀននៅសាលារៀន វត្តសេដ្ឋជី និងបានរាយការណ៍ ទៅកាន់ សឿ ក្លូ ដើម្បីរងចាំការចាត់តាំងសាជាថ្មី។ នៅឆ្នាំ១៩៧០ ងាវ បានបង្រៀននៅសាលាឬស្សីកែវ នៅទីក្រុងភ្នំពេញ ហើយជួបជាមួយឈ្មោះ ម៉ិញ ឈីវ ជាខ្សែរបស់ សឿ ថែមទាំងអប់រំគ្រូបង្រៀនចំនួន៤នាក់ ឲ្យមានជំនឿលើរដ្ឋាភិបាលឡើងវិញ។ នៅឆ្នាំ១៩៧១ ងាវ ផ្លាស់មកធ្វើការនៅសាលាគរុកោសល្យវិញ ហើយជួបជាមួយ សឿ ក្លូ ដែលបានរត់មកពីខេត្តតាកែវ។
នៅឆ្នាំ១៩៧៥ ងាវ បានស្គាល់មនុស្សចំនួន៦នាក់ជាគ្រូបង្រៀន ហើយអនុវត្តសកម្មភាពតាមផែនការរបស់ឈ្មោះ ម៉ៃ លន់ ។ នៅឆ្នាំ១៩៧៥ ដដែល សឿ ក្លូ បានប្រកាសដល់មនុស្សចំនួន៨នាក់ មកប្រជុំដាក់ផែនការត្រៀមមុនពេលចូលបដិវត្តន៍ ដើម្បីធ្វើការទាមទារឲ្យរៀបចំរដ្ឋាភិបាលចំរុះ និងធ្វើសកម្មភាពរារាំងចលនាបដិវត្តន៍ក្នុងការងារប្រចាំថ្ងៃ។ ក្រោយថ្ងៃរំដោះ ខែមេសា ឆ្នាំ១៩៧៥ អង្គការបានជម្លៀស ងាវ ទៅកាន់ខេត្តកំពង់ចាម ប៉ុន្តែមិនយូរប៉ុន្មាន ងាវ ក៏សុំអង្គការត្រឡប់មកវិញ។ អំឡុងពេលមកដល់ស្រុក ងាវ បានជួបជាមួយឈ្មោះ ផាន់ សុងលន ជាអតីតបុគ្គលិកពេទ្យនៅខេត្តព្រៃវែង ដោយបានលើកយកផែនការប្រឆាំងនឹងបដិវត្តន៍ តាមរយៈការបង្ហូរទឹកចេញពីស្រែចំនួន៥ស្រែ ធ្វើឲ្យស្រូវស្កកអស់ជាច្រើន និងបំផ្លាញឧបករណ៍ប្រើប្រាស់ដូចជា រទេះ នង្គ័ល រនាស់ ចប និងកាំបិតជាដើម។ នៅចុងខែសីហា ឆ្នាំ១៩៧៥ ងាវ បានទំនាក់ទំនងជាមួយឈ្មោះ មាស វង់ និងលាង ក្រាវ ដែលជាគ្រូបង្រៀននៅឃុំស្នោដែលរស់នៅភូមិទង្កែដូចគ្នា ឲ្យជួយធ្វើសកម្មភាពបំផ្លាញបដិវត្តន៍ ដោយធ្វើសកម្មភាពធាក់រហាត់ទឹកធ្វើខូចអស់ជាច្រើន។ នៅខែវិច្ឆិកា ឆ្នាំ១៩៧៥ ងាវ និងប្រជាជនមួយចំនួនទៀត ត្រូវបានអង្គការប្ដូរឲ្យមកនៅភូមិភាគពាយ័ព្យវិញ។ លុះមកដល់ស្វាយស៊ីសុផុន ក៏ជួបជាមួយខ្សែ សេ អ៊ី អា ឈ្មោះ ហង់ សារ៉ូម មានការទទួលស្គាល់ពីឈ្មោះ ម៉ៃ លន់។
នៅខែធ្នូ ឆ្នាំ១៩៧៥ ឡោក ឆូត ចាត់តាំងឲ្យ ងាវ និងបក្ខពួកចំនួន៧នាក់ ឲ្យធ្វើសកម្មភាពបំផ្លាញស្រូវ និងបំផ្លាញសម្ភាររបស់អង្គការតាមគ្រប់រូបភាពទាំងអស់។ នៅខែមករា ឆ្នាំ១៩៧៦ តាមរយៈឈ្មោះ សន ចាត់តាំង ងាវ និងបក្សពួក ឲ្យធ្វើសកម្មភាពលួចដុតបំផ្លាញស្រូវចំនួន៥ហិចតា។ សកម្មភាពបន្ទាប់ត្រូវបោះចោលចបកាប់ ចំនួន៨ចប និងលួចកាប់កូនឈើអស់មួយចំនួនផងដែរ។
នៅឆ្នាំ១៩៧៧ ងាវ និងបក្ខពួក ទទួលផែនពីឈ្មោះ ហ៊ីង ឲ្យផ្ដល់ប្រាក់មួយចំនួនសម្រាប់ផ្គត់ផ្គង់ដល់កម្លាំងសេរី។ ចំណែកឯសកម្មភាពនៅក្នុងមន្ទីរ៦២វិញ ងាវ និងបក្ខពួកបានបំផ្លាញស្ពៃ អស់ចំនួន៧រង មួយរងមានប្រវែងប្រហែលចំនួន១៥ម៉ែត្រ និងដំឡូងជ្វាចំនួន៣០រង មួយរងមានប្រវែងចំនួន១៥ម៉ែត្រ។ នៅខែកញ្ញា ឆ្នាំ១៩៧៦ ងាវ បានស្គាល់ជាមួយឈ្មោះ សាវ៉ាត់ ដោយពិភាក្សា អំពីការរក្សាទុកអង្ករដែលអង្គការផ្ដល់ឲ្យប្រជាជនចំនួន២៤តោន ថ្នាំពេទ្យមួយឡាន ខោអាវ ២៥០០សម្រាប់ ដើម្បីបម្រុងទុកពេលធ្វើរដ្ឋប្រហារឆ្នាំ១៩៧៧។
នៅខែមករា ឆ្នាំ១៩៧៧ តាមការចាត់តាំងពី ហ៊ីង បានបញ្ជូន ងាវ ទៅក្នុងអង្គភាពចល័តលេខ៥ ដែលមានឈ្មោះ ស្រួច ជាអ្នកដឹកនាំ ឲ្យធ្វើសកម្មភាពដុតបំផ្លាញស្រូវដំណើបអស់ចំនួន៦០បាវ និងបំផ្លាញម៉ាស៊ីនរោយស្រូវអស់មួយគ្រឿងផងដែរ។ នៅខែមិថុនា ឆ្នាំ១៩៧៧ឈ្មោះ ស្រួច ត្រូវបានអង្គការចាប់ខ្លួន។ រយៈពេលមួយខែក្រោយមក អង្គការក៏បញ្ជូន ងាវ ឲ្យទៅកាប់ឈើ និងដុតធ្យូងនៅភ្នំជ្រាប ជាមួយប្រជាជន៤នាក់ ហើយរស់នៅតាមសហករណ៍ នៅភូមិគិរីវ័ន។ អ្នកទាំងអស់បានបបួលគ្នារត់ទៅកាន់ប្រទេសថៃ ប៉ុន្តែផែនការនេះមិនទាន់បានសម្រេចនៅឡើយ។ ឈ្មោះ ងាវ ក៏ត្រូវអង្គការចាប់ខ្លួននៅថ្ងៃទី១២ ខែសីហា ឆ្នាំ១៩៧៧ និងសួរចម្លើយនៅថ្ងៃទី២៥ ខែកញ្ញា ឆ្នាំ១៩៧៧។
អត្ថបទដោយ ជីម សុខគា
[1] ឯកសារ J 00១០៣ តម្កល់នៅបណ្ណាសារមជ្ឈមណ្ឌលឯកសារកម្ពុជា មានចំណងជើង «យី ងាវ និងបក្ខពួក ធ្វើសកម្មភាព ឃោសនាដល់ប្រជាជន ដើម្បីប្រឆាំងនឹងអង្គការបដិវត្តន៍ » ។ បានបង្ហាញអំពីសកម្មភាព ឈ្មោះ ងាវ ចូលបម្រើក្នុងជួរបដិវត្តន៍ ដែលទទួលផែនការពីឈ្មោះ សឿ ក្លូ មានតួនាទីជាអនុរៈនៃវិទ្យាល័យព្រះឧទ័យ។
[2] មជ្ឈមណ្ឌលឯកសារកម្ពុជា ២០២០ បោះពុម្ពលើកទី២ ដកស្រង់ចេញពីសៀវភៅ «សាក្សីប្រវត្តិសាស្ត្រកម្ពុជាប្រជាធិបតេយ្យ (១៩៧៥-១៩៧៩)» ទំព័រទី៣៤។
[3] មជ្ឈមណ្ឌលឯកសារកម្ពុជា ២០២០ បោះពុម្ពលើកទី២ ដកស្រង់ចេញពីសៀវភៅ «សាក្សីប្រវត្តិសាស្ត្រកម្ពុជាប្រជាធិបតេយ្យ (១៩៧៥-១៩៧៩)»ទំព័រទី៣៣-៣៤។