(តាកែវ)៖ ប៉ិច រន កើតក្នុងឆ្នាំ១៩៦០ ភេទប្រុស មានអាយុ ៦១ឆ្នាំ ជាកសិករ រស់នៅភូមិអាជាំង ឃុំត្រពាំងសាប ស្រុកបាទី ខេត្តតាកែវ។ រន មានស្រុកកំណើតនៅស្រុកឧដុង្គ និងមានបងប្អូនចំនួនប្រាំពីរនាក់ ក្នុងនោះមានស្រីបួននាក់។

នៅអំឡុងទសវត្សរ៍ឆ្នាំ១៩៦០ រន បានឈប់រៀនត្រឹមថ្នាក់ទី១០ (របបសង្គមរាស្ត្រនិយម) នៅសាលាវត្តពញាឮ ខេត្តកណ្ដាល។ នៅឆ្នាំ១៩៧០ បន្ទាប់ពីមានរដ្ឋប្រហារ ស្រុកទេសក៏កើតមានចលាចលដោយសារការប្រយុទ្ធរវាងទាហាន លន់ នល់ និងកងទ័ពខ្មែរក្រហម។ រន ដែលមានអាយុ១៣ឆ្នាំ បានចូលធ្វើការក្នុងកងសិល្បៈនៃកងទ័ពខ្មែរក្រហមភូមិភាគបស្ចិម។ នៅចន្លោះឆ្នាំ១៩៧២ដល់ឆ្នាំ១៩៧៣ គឺមានការទម្លាក់គ្រាប់បែកនៅតំបន់ព្រៃភ្នំ និងតំបន់ព្រៃលើដែលកាន់កាប់ដោយកងទ័ពខ្មែរក្រហម។

នៅឆ្នាំ១៩៧៥ រន ដែលជាប្រជាជនមូលដ្ឋាន បានបន្តធ្វើការក្នុងកងទ័ពភូមិភាគបស្ចិម និងជាអង្គរក្សរបស់គណៈតំបន់ក្នុងខេត្តកំពង់ស្ពឺ ឈ្មោះ ហំ ដែលមានសមាជិកទាំងអស់ប្រហែល៥០នាក់។

នៅឆ្នាំ១៩៧៦ រន បានចូលធ្វើជាពេទ្យនៅមន្ទីរព-១៧មេសា។ របបអាហារពីឆ្នាំ១៩៧៦ដល់ឆ្នាំ១៩៧៧ គឺមាននំបុ័ងមួយកំណាត់ និងសម្លលាយជាមួយត្រកួននិងព្រលិត។ រន ត្រូវធ្វើការពីម៉ោង៧ព្រឹករហូតដល់ម៉ោង១១ព្រឹកទើបបានសម្រាក និងក្រោយពីពេលសម្រាក គឺគាត់ត្រូវបន្តធ្វើការរហូតដល់យប់អធ្រាត្រ។

នៅឆ្នាំ១៩៧៧ បន្ទាប់ពីមានការចាប់ខ្លួននៃកម្មាភិបាលជាន់ខ្ពស់ខ្មែរក្រហមឈ្មោះ ហ៊ូ នឹម រួមទាំងគណៈតំបន់ឈ្មោះ ហំ។ រន ត្រូវបានខ្មែរក្រហមស្រាវជ្រាវ និងរកឃើញថាមានជាប់ខ្សែបណ្តេញជាមួយគណៈតំបន់ដែលខ្មែរក្រហមចាប់ខ្លួន។ សមាជិករបស់គាត់ជាច្រើននាក់ ត្រូវបានខ្មែរក្រហមផ្លាស់ចេញពីមន្ទីរព-១៧មេសាទៅធ្វើការនៅក្រសួង ប៉ុន្តែការពិតអ្នកទាំងនោះត្រូវបានខ្មែរក្រហមចោទថាជាខ្មាំងរបស់អង្គការ និងបញ្ជូនទៅគុកទួលស្លែង។ បន្ទាប់ពី រន និងសមាជិកម្នាក់ទៀតបានឮអំពីដំណឹងនេះ អ្នកទាំងពីរបានសម្រេចចិត្តរត់គេចខ្លួនទៅបឹងទំពុន។

នៅឆ្នាំ១៩៧៨ រន ត្រូវបានខ្មែរក្រហមបញ្ជូនទៅធ្វើជាពេទ្យក្នុងកងពិការ និងក្រោយមកនៅរោងចក្រកែវ។ នៅទីនោះ អ្នកណាដែលធ្វើឲ្យបែកកែវ ឬបាក់ស្លាបព្រានោះនឹងត្រូវខ្មែរក្រហមចោទថាជាខ្មាំង ដូចជាភ្នាក់ងារកាហ្សេបេ ឬសេអ៊ីអា។

នៅរបបខ្មែរក្រហម រន ចងចាំថា មានការរៀបការដោយបង្ខំ និងប្តេជ្ញាចិត្តចំពោះមុខអង្គការ ដោយមានរហូតដល់ម្ភៃគូក្នុងពេលតែមួយ ប៉ុន្តែក្នុងនោះក៏មានអ្នកស្ម័គ្រចិត្តដែរ។

នៅឆ្នាំ១៩៧៩ បន្ទាប់ពីរបបខ្មែរក្រហមដួលរលំ រន ត្រូវបានខ្មែរក្រហមចាត់តាំងឲ្យធ្វើជាពេទ្យនៅក្នុងកងពល២១២ និងក្រោយមកធ្វើជាកងទ័ពកាំភ្លើងធំ នៅតំបន់អន្លង់ផ្លៀវ។ មិនយូរប៉ុន្មាន រន បានចាកចេញពីជួរកងទ័ពខ្មែរក្រហម និងប្រកបរបរធ្វើស្រែចម្ការ។ សព្វថ្ងៃ រន មានជំងឺទឹកនោមផ្អែម។ នៅរបបខ្មែរក្រហម រន បានបាត់បង់បងប្អូនចំនួនពីរនាក់៕

សម្ភាសដោយ ពេជ្រ លក្ខិណា ថ្ងៃទី១៩ ខែសីហា ឆ្នាំ២០២១

អត្ថបទដោយ ស្រ៊ាង លីហ៊ួរ ថ្ងៃទី១ ខែធ្នូ ឆ្នាំ២០២៥