(ក្រចេះ)៖ នៅក្នុងរបបខ្មែរក្រហម ប្រជាជនស្ទើទូទាំងប្រទេសកម្ពុជា សុទ្ធតែលើកឡើងប្រហាក់ប្រហែលគ្នា អំពីទុក្ខវេទនា ដោយសារសមាជិកគ្រួសារត្រូវបានដាក់​ឲ្យរស់នៅដាច់ដោយឡែកពីគ្នា ការហូបចុកមិនគ្រប់គ្រាន់ និងធ្វើការងារហួសពីសមត្ថភាពដែលអាចទ្រាំទ្របាន។ មិនខុសគ្នា​ប៉ុន្មាន ឯក គីមសេន អ្នករស់រាន​មានជីវិតពីរបប​ខ្មែរក្រហមមួយរូប​ បាន​ចែក​រំលែក​ប្រវត្តិឆ្លងកាត់​របប​ខ្មែរក្រហមដែរ។​

ឯក គីមសេន ភេទប្រុស អាយុ៥៨ឆ្នាំ មានបងប្អូន៥នាក់ បច្ចុប្បន្នរស់នៅភូ​មិឫស្សីចារ ឃុំថ្មគ្រែ ស្រុកចិត្របុរី ខេត្តក្រចេះ។ គីមសេន បានប្រាប់អំពីសាច់រឿងដែលគាត់ចងចាំពីរបបខ្មែរក្រហមប្រាប់ទៅកាន់អ្នកស្ម័គ្រចិត្តកម្ពុជាថា ដែល​នៅពេលនោះ គាត់មានអាយុប្រហែលជា១៣ឆ្នាំ។ គឹមសេន ត្រូវបានអង្គការឲ្យរស់នៅ និងធ្វើការបែកពីសមាជិកគ្រួសារ។ ខ្មែរក្រហមបានធ្វើការបែងចែកប្រជាជនឲ្យរស់នៅផ្សេងៗពីគ្នាតាមភេទ និងអាយុ។

គីមសេន បាននិយាយបន្ថែមថា នៅក្នុងរបបខ្មែរក្រហម កុមារៗគ្មានឱកាសទទួលបានការសិក្សាអប់រំទេ ផ្ទុយទៅវិញកុមារៗ ត្រូវ ធ្វើការងារផ្សេង។ ចំណែកមនុស្សពេញវ័យគឺ ផ្ដោតលើការធ្វើការងារកសិកម្ម។ អំឡុងពេលនោះ គីមសេន ស្ថិតនៅក្នុងកងកុមារវ័យជំទង់ អង្គការបានប្រើឲ្យគាត់ លើកភ្លឺស្រែ និងច្រូតស្រូវ ព្រមទាំងកាប់ទន្រ្ទានខែត្រសម្រាប់ធ្វើជី។

ផលវិបាកដែល គីមសេន ជួបប្រទះនៅក្នុងរបបខ្មែរក្រហម​គឺ ការបរិភោគមិនគ្រប់គ្រាន់។ គាត់ត្រូវក្រោកទៅធ្វើការតាំងពីម៉ោង៥ព្រឹក និងឈប់សម្រាកហូបអាហារថ្ងៃត្រង់នៅម៉ោង១២។ បន្ទាប់ពីហូបអាហារថ្ងៃត្រង់រួច នៅម៉ោងប្រហែល១រសៀល ត្រូវទៅធ្វើការបន្ត រហូតដល់ម៉ោង៦ល្ងាចទើបបានឈប់សម្រាកហូបអាហារពេលល្ងាច។នៅពេលយប់ គាត់ត្រូវធ្វើការងារបន្ថែមទៀត គឺបោកស្រូវ និងបុកស្រូវរហូតដល់ម៉ោង៩យប់ទើបបានសម្រាកពីការងារ។ ​

គីមសេន ធ្លាប់ត្រូវបានអង្គការស្ដីបន្ទោសដោយសារតែគាត់ធ្វើការយឺតមិនដូចអ្វីដែលអង្គការចង់បាន។ គាត់បានបន្ថែមថា នៅក្នុងសហករណ៍ដែលគាត់រស់នៅគឺមិនសូវជាមានការលំបាកខ្លាំងប៉ុន្មានទេ សម្រាប់រូបគាត់ផ្ទាល់គាត់ គិតថាការពិបាកដែលគាត់ពើបប្រទះមានកម្រិតមធ្យម ខុសប្លែកពីអ្វីដែលគាត់ធ្លាប់បានដឹង គឺនៅសហករណ៍ផ្សេង មានការលំបាកខ្លាំង ពោលគឺ ធ្វើការងារគ្មាន ពេលសម្រាក បរិភោគអាហារមិនគ្រប់គ្រាន់  និងការរស់នៅមានការលំបាក។ ​

នៅក្នុងរបបខ្មែរក្រហម គីមសេន បានបាត់បង់សាច់ញាតិសរុបទាំងអស់ចំនួន៥នាក់ ខាងម្ដាយរបស់គាត់២នាក់ និងខាងឪពុក៣នាក់ ដោយសារអង្គការបានចោទប្រកាន់ថាជាខ្មែរស (នៅក្នុងរបបខ្មែរក្រហម ខ្មែរស សំដៅដល់​ទាហាន លន់ នល់)។ នៅអំឡុងពេលនោះ ឲ្យតែមានសមាជិកគ្រួសារណាម្នាក់ដែលមានតួនាទី ឬមានឋានៈ​នៅក្នុងរបប លន់ នល់ មិនថាជាអ្នករដ្ឋការ ឬគ្រូបង្រៀននោះទេ គឺខ្មែរក្រហមតាមស្វែងរក និងសម្លាប់ចោលទាំងអស់ សូម្បីតែប្រពន្ធ និងកូនរបស់អ្នកទាំងនោះក៏មិនលើកលែងដែរ។ ជាក់ស្ដែង មានកុមារម្នាក់ឈ្មោះ ឃួន អាយុប្រហែល៦ឆ្នាំ ត្រូវបានអង្គការនាំខ្លួនយកទៅសម្លាប់ចោល បន្ទាប់ពីអង្គការបានសម្លាប់ម្ដាយរបស់ ឃួន រួច។ មូលហេតុដែលអង្គការនាំយកម្ដាយរបស់ ឃួន ទៅសម្លាប់ដោយសារតែមានជាប់ខ្សែស្រឡាយជាមួយនឹងជនជាតិវៀតណាម។ កងឈ្លបបានទៅជួបជាមួយនឹង គីមសេន ហើយបានសួររក ឃួន ដើម្បីនាំខ្លួនទៅ​ ដោយប្រាប់ហេតុផលថា ផ្លាស់ទីទៅកន្លែងថ្មីដែលអង្គការបានរៀបចំឲ្យ។

នៅឆ្នាំ១៩៧៨ ចលនាប្រឆាំងជាមួយយោធា ខ្មែរក្រហម ចាប់ផ្ដើមកើតមានឡើង ទើបមានទាហានរបស់វៀតណាម ចូលមកកាន់ទឹកដីកម្ពុជាដើម្បីវាយផ្ដួលរំលំរបបខ្មែរក្រហម។ បន្ទាប់ពីរបបខ្មែរក្រហមបានដួលរលំ គីមសេន បានត្រលប់មករស់នៅជួបជុំជាមួយនឹងគ្រួសារ វិញរហូតមកដល់សព្វថ្ងៃ៕

សម្ភាសន៍ដោយ៖ យ៉ុង ផល្លីន ២៩/០១/២០២៤

អត្ថបទដោយ៖ នេន ស្រីមុំ ២/១២/២០២៤