(ព្រះវិហារ)៖ សុខ អៀត អាយុ ៨៥ ឆ្នាំ ជាអ្នករស់រានមានជីវិតពីរបបខ្មែរក្រហម សព្វថ្ងៃគាត់ស្នាក់នៅ ភូមិបដិវត្តន៍ ឃុំច្រាច់ ស្រុកជ័យសែន ខេត្តព្រះវិហារ។ ឋិតនៅក្នុងវ័យចាស់ជរា សុខ អៀត មិនបានប្រកបមុខរបរអ្វីនោះទេ ប៉ុន្តែនាសម័យខ្មែរក្រហម គាត់ គឺ ជាឈ្លបភូមិម្នាក់។

ក្នុងអាយុ ៣០ឆ្នាំជាង នាសម័យកម្ពុជាប្រជាធិបតេយ្យ សុខ អៀត ជា ឈ្លបភូមិ បន្ទាប់មកជា សហករណ៍ភូមិ​ ដែលមានតួនាទីជា​អ្នកចែកសម្ភារៈក្នុងភូមិ និង លើកទំនប់ ជីកប្រឡាយ ខ្លះៗ។

​សុខ អៀត​ បានលើកឡើងថា អង្គភាពរបស់គាត់ ទទួលបានការហូបចុក ១ កំប៉ុង ២ នាក់ សម្រាប់អាហារ ៣ ពេលក្នុងមួយថ្ងៃ ដែលច្រើនជាងអ្នករស់រានមានជីវិតដទៃទៀត។ សុខ អៀត មានការចេះដឹង និង អាចសរសេរបានខ្លះៗចាប់តាំងពីមុនសម័យខ្មែរក្រហម។ នៅសម័យនោះមានតែពេទ្យបុរាណ ដូចជាថ្នាំអាចម៍ទន្សាយ ដែលប្រើប្រាស់ក្នុងការព្យាបាលជំងឺផ្សេងៗ។

អ្វីដែលគួរឲ្យចាប់អារម្មណ៍ពីជីវប្រវត្តិរបស់ សុខ អៀត គឺគាត់ក៏បានចូលរួមក្នុងការវ៉ៃសម្លាប់មនុស្សនាសម័យនោះ ដោយលើកឡើងថា “មិនវ៉ៃ គឺខុស ត្រូវធ្វើតាមគេទាំងអស់” តាមកាលៈទេសៈសង្គម។ ការសម្លាប់មនុស្សដោយផ្ទាល់នេះ បានកើតឡើងនៅស្រុកជ័យសែន។ អ្នកស្ម័គ្រចិត្តបានសួរនាំថាតើគាត់បានឃើញគេសម្លាប់មនុស្សដែលឬទេ? គាត់បានឆ្លើយថា “បានចូលរួមវាយមនុស្សសម្លាប់នឹងគេ”។

សម្រាប់ការកាត់ទោសមេដឹកនាំខ្មែរក្រហម មានយុត្តិធម៌ខ្លះ មិនយុត្តិធម៌ខ្លះ នេះជាការលើកឡើងរបស់ សុខ អៀត។  ជាចុងក្រោយ សុខ អៀត បានសូមកុំឲ្យកើតឡើងសារជាថ្មី នូវអំពើឧក្រិដ្ឋប្រល័យពូជសាសន៍ខ្មែរក្រហម។ ការអប់រំ និង ចងក្រងឯកសារនៃប្រវត្តិសាស្ត្រខ្មែរក្រហម នឹងអាចឲ្យអ្នកជំនាន់ក្រោយបានដឹង និងជៀសផុតពីរបបនេះ៕

សម្ភាសន៍ដោយ កាត សារ៉ាត់ នៅថ្ងៃទី២៣ ខែវិច្ឆិកា ឆ្នាំ២០២១

អត្ថបទដោយ ស្រ៊ាង លីហ៊ួរ