ខេត្តឧត្តរមានជ័យ ស្ថិតនៅប៉ែកខាងជើងឈៀងខាងលិច នៃប្រទេសកម្ពុជា ដែលមានព្រំប្រទល់ខាងជើងជាប់នឹងប្រទេសថៃ ក្នុងនោះមានខេត្តឈ្មោះ ខេត្តបូរីរ៉ាំ, សុរិន និង ស៊ីសាកេត មានប្រវែង២២៤គីឡូម៉ែត្រ[1]។ ខេត្តឧត្តរមានជ័យមានស្រុកចំនួន៤ និងក្រុង១ មានដូចជា ស្រុកអន្លង់វែង, ស្រុកបន្ទាយអំពិល, ស្រុកចុងកាល់, ស្រុកបន្ទាយប្រាសាទ និងក្រុងសំរោង។ ចំពោះច្រកចេញចូលក្នុងតំបន់ព្រំប្រទល់នេះមាន ច្រកជុបគគីរ, ច្រកថ្មដូន, ច្រកអូស្មាច់, ច្រកជាំសាង៉ាម និងច្រកព្រះប្រឡាយ ហើយខេត្តនេះមានព្រំប្រទល់ ខាងត្បូងជាប់នឹងខេត្តសៀមរាប ខាងកើតជាប់នឹងខេត្តព្រះវិហារ និងខាងលិចជាប់នឹងខេត្តបន្ទាយមានជ័យ។ ប្រជាជនដែលរស់នៅខេត្តឧត្តរមានជ័យ ភាគច្រើនធ្វើការរកស៊ីផ្អែកលើកសិកម្ម និងនេសាទត្រី​។

សព្វថ្ងៃខេត្តឧត្តរមានជ័យ គឺជាខេត្តមួយដែលមានកេរដំណែលវប្បធម៌,​ តំបន់ទេសចរណ៍​ គួរឲ្យចាប់អារម្មណ៍ខ្លាំង ពីសំណាក់ភ្ញៀវទេសចរណ៍ជាតិ​ និង​អន្តរជាតិ។ ខេត្តឧត្តរមានជ័យ​ មានរមណីយដ្ឋាន​វប្បធម៌​ជាច្រើនរួមមាន​ប្រាសាទបុរាណ, ស្ពានបុរាណ, ទួលប្រាសាទ និងស្រះបុរាណជាច្រើនកន្លែងទៀត។ ក្នុងនោះ​ស្រុកបន្ទាយអំពិលគឺជាតំបន់ទេសចរណ៍ដែលមានឈ្មោះល្បីល្បាញមួយផងដែរ។

ស្រុកបន្ទាយអំពិល  មានតំបន់ទេសចរណ៍ជាច្រើនកន្លែងសម្រាប់ភ្ញៀវទេសចរណ៍គ្រប់រូបអាចមកទស្សនា ដែលមានប្រាសាទពីបុរាណ ដូចជាប្រាសាទតាក្របី, ប្រាសាទតាមាន់ធំ, ប្រាសាទតាមាន់តូច និងតំបន់ទេសចរណ៍ជាច្រើនកន្លែងទៀត។

ចំណែកឯប្រជាជនដែលរស់នៅស្រុកបន្ទាយអំពិល ក្រៅពីរដូវស្រែចម្ការចប់ ប្រជាជន​តែង​តែ​ត្បាញ​ក្រមា ដែល​មាន​លក្ខណៈ​ខុស​ប្លែក​ពី​បណ្តា​ក្រមា​ខេត្តផ្សេងៗ មានលក្ខណៈក្បាច់ទំពក់រូបសេះ រូបដំរី និងរូបផ្សេងៗសម្រាប់ចែកជូនកូនចៅ ឬជូនចាស់ទុំក្នុងភូមិ និងយកទៅវត្ត ដើម្បី​ប្រគេន​ព្រះសង្ឃ​ក្នុង​ពិធី​បុណ្យ​ភ្ជុំបិណ្ឌ ឬបុណ្យចូលឆ្នាំ ។

ដោយឡែក[2] នៅថ្ងៃទី២៤ ខែកក្កដា ឆ្នាំ២០២៥​ ស្រុកបន្ទាយអំពិល ត្រូវបានរងការប៉ះពាល់យ៉ាងខ្លាំង ព្រោះតែកងទ័ពឈ្លានពានថៃ បានបើកការវាយប្រហារមកលើកម្ពុជា នៅតំបន់ប្រាសាទតាក្របី ប្រាសាទតាមាន់ធំ និងប្រាសាទតាមានតូច។ កងទ័ពឈ្លានពានថៃបានទម្លាក់គ្រាប់បែកមកលើវត្តតាមាន់សែនជ័យ ស្ថិតក្នុង ខេត្តឧត្តរមានជ័យបន្ថែមទៀត ក្នុងគោលបំណងដើម្បីដណ្ដើមយកប្រាសាទបុរាណ និងទឹកដីកម្ពុជាយកទៅកាន់កាប់ជាសម្បត្តិរបស់ប្រទេសខ្លួន។ វត្តតាមាន់សែនជ័យ ត្រូវបានខូចខាតទាំងស្រុង ព្រោះការទម្លាក់គ្រាប់បែកដោយយន្តហោះ F-16 និងគ្រាប់បែក​ចង្កោមរបស់កងទ័ពឈ្លានពានថៃ ដែលទម្លាក់មកលើទីតាំងស៊ីវិល និងធ្វើឲ្យខូចខាតផ្ទះសំបែងរបស់ប្រជាពលរដ្ឋជាច្រើន​។ អំឡុងពេលនោះប្រជាពលរដ្ឋដែលរស់នៅស្រុកបន្ទាយអំពិល ត្រូវបានរត់ភៀសសឹកចេញពី​ផ្ទះសំបែងរបស់ខ្លួនទាំងមិនដាច់អាល័យ ដើម្បីឆ្ពោះទៅកន្លែងសុវត្ថិភាព ជាហេតុធ្វើឲ្យខកខានមិនបានប្រកបមុខរបរចិញ្ចឹមជីវិត និងសិស្សានុសិស្សមិនបានទៅសាលារៀនសូត្រ។

រហូតដល់[3] ថ្ងៃទី១០ ខែសីហា ប្រជាពលរដ្ឋនៅស្រុកបន្ទាយអំពិល ពិសេសនៅឃុំគោកមន ជិតភូមិសាស្រ្តប្រាសាទតាមាន់ បានវិលត្រឡប់មកផ្ទះសំបែងវិញ បន្ទាប់ពីមានពីកិច្ច​ប្រជុំពិសេស និងកិច្ចប្រជុំវិសាមញ្ញគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី៧ ខែសីហា ឆ្នាំ២០២៥ ដែលបានឯកភាពគ្នាអនុវត្តឲ្យបានពេញលេញនូវបទឈប់បាញ់ ដែលសម្រេចបានកាលពីថ្ងៃទី២៨ ខែកក្កដា ឆ្នាំ២០២៥ នៅទីក្រុងភូត្រាចាយ៉ា ប្រទេសម៉ាឡេស៊ី។

សរុបមកអាចសន្និដ្ឋានបានថាការបង្កសង្រ្គាមរបស់ថៃមកលើកម្ពុជាបានបំផ្លិចបំផ្លាញសម្បត្តិវប្បធម៌​ជាតិ និងសក្តានុពលខេត្តដែលកំពុងអភិវឌ្ឍន៍របស់កម្ពុជា៕

១ ភូមិសាស្រ្តខ្មែរ៖ ខេត្តឧត្តរមានជ័យ https://phumsas.blogspot.com/2020/05/blog-post_32.html

២ វត្តតាមាន់សែនជ័យ ខូចខាតទាំងស្រុងពីការទម្លាក់គ្រាប់បែកដោយយន្តហោះ F-16 របស់ថៃ https://www.thmeythmey.com/detail/149776

៣ ពលរដ្ឋស្រុកបន្ទាយអំពិលសម្រុកវិលត្រឡប់មកផ្ទះវិញ https://www.thmeythmey.com/index.php/detail/150305?page=6

អត្ថបទដោយ គាត ស្រីឡែន