ហុង ង៉ែត៖ បានឃើញអង្គការសម្លាប់មនុស្ស ៧នាក់
ហុង ង៉ែត អាយុ៨៤ឆ្នាំ រស់នៅភូមិតាខូយ ឃុំជើងគួន ស្រុកសំរោង ខេត្តតាកែវ។ រឿងរ៉ាវដែល ង៉ែត ចងចាំ និងមិនអាចបំភ្លេចបាននោះគឺការសម្លាប់មនុស្ស និងការរៀបអាពាហ៍ពិពាហ៍នៅក្នុងភូមិតាខូយ ក្នុងរបបខ្មែរក្រហម។
ង៉ែត បានរៀបរាប់ថា គាត់បានឃើញកម្មាភិបាលខ្មែរក្រហមឈ្មោះ យន់ ដែលជាប្រធានសង្កាត់ សម្លាប់មនុស្សចំនួន៧នាក់ ក្នុងនោះមានស្រ្ដីម្នាក់ នៅភូមិតាខូយ។ ក្នុងចំណោមអ្នកស្លាប់ទាំង៧នាក់ មានមនុស្ស៣នាក់ត្រូវសម្លាប់ក្នុងផ្ទះ និងមនុស្ស៤នាក់ទៀតត្រូវយកទៅសម្លាប់នៅខាងត្បូងភូមិ។ នៅពេលដែលសម្លាប់រួច អង្គការបានយកសាកសពទៅកប់ចោលនៅខាងត្បូងភូមិ ក្នុងមួយរណ្ដៅ២ ទៅ៣សាកសព។
ង៉ែត បានឲ្យដឹងថា មនុស្សទាំង៧នាក់ ដែល យន់ សម្លាប់ មានមួយចំនួន គឺជាបងប្អូនរបស់ង៉ែត និងខ្លះទៀតជាញាតិនៅក្នុងភូមិ។ នៅពេលដែលឃើញការសម្លាប់មនុស្សដូច្នេះ ង៉ែត មានការភ័យយ៉ាងខ្លាំង ហើយប្រជាជននៅក្នុងភូមិផ្សេងទៀតក៏មានការស្ងប់ស្ងាត់មិនហ៊ានតវ៉ាអ្វីទាំងអស់។
មួយវិញទៀត ង៉ែត បាននិយាយអំពីការរៀបការនៅក្នុងភូមិតាខូយថា នៅក្នុងមួយថ្ងៃ អង្គការបានរៀបចំយុវជនចំនួន៥០គូ ឲ្យរៀបការរួមគ្នានៅក្នុងភូមិ។ នៅពេលរៀបការ អង្គការបានរៀបចំសែនក្បាលជ្រូក ដើម្បីប្រាប់ទៅជីដូនជីតា។ នៅពេលសែនព្រេន អង្គការបានគម្រាមទៅជីដូនជីតាថា៖ “ប្រសិនបើហ៊ានកាច់ និងធ្វើ គឺយកដេកនៅជញ្ជាំងបាញ់ចោលហើយ។”
ការរៀបការនេះគឺមិនមែនធ្វើឡើងដោយការស្ម័គ្រចិត្តទាំងអស់នោះទេ ប៉ុន្តែគ្មាយុវជន-យុវនារីណា ហ៊ានបដិសេធនោះឡើយ ព្រោះខ្លាចអង្គការយកទៅសម្លាប់ចោល។ ក្រោយមក នៅពេលដែលខ្មែរក្រហមដួលរលំ ប្រជាជនដែលរៀបការនៅពេលនោះ បានបន្តរស់នៅជាមួយគ្នា ប៉ុន្តែគូខ្លះទៀតបានសម្រេចចិត្តចែកផ្លូវគ្នា។
នៅពេលដែលអ្នកស្ម័គ្រចិត្តចុះទៅសម្ភាស ង៉ែត បានប្រាប់ឲ្យដឹងទៀតថា គាត់មិនពេញចិត្តចំពោះតុលាការកាត់ទោសមេដឹកនាំខ្មែរក្រហម ដែលកាត់ទោសមេដឹកនាំខ្មែរក្រហមឲ្យជាប់ទោសអស់មួយជីវិតទេ ពីព្រោះថាខ្មែរក្រហម សម្លាប់ប្រជាជនអស់ជាច្រើនលាននាក់ ដោយគ្មានប្រណី ដែលមិនសមជាមួយទោសដែលអ្នកទាំងនេះទទួល។
សម្ភាសដោយ៖ សឿន ធារ៉ា ថ្ងៃទី១៨ សីហា ២០២១
អត្ថបទដោយ៖ ភា រស្មី ថ្ងៃទី១២ មីនា ២០២៥