(តាកែវ) ឃុន ឆឹង អាយុ៧៥ឆ្នាំ គឺជាអ្នករស់រានមានជីវិតពីរបបខ្មែរក្រហម។ នៅក្នុងសម័យខ្មែរក្រហម ឆឹង គឺជាយុវនារីម្នាក់ដែលបានរៀបការតាមការចាត់តាំងរបស់អង្គការ។ ឆឹង បានឲ្យដឹងថា នៅពេលដែលគាត់រៀបការ មានការសែនបន្តិចបន្តួច។ បន្ទាប់ពីរៀបការរួច ឆឹង បានពពោះ និងសម្រាលបានកូនស្រីម្នាក់។

នៅពេលពពោះ អង្គការមានបំណងបញ្ជូន ឆឹង ឲ្យទៅស្ទូងសំណាបនៅផ្លូវជាតិលេខ ៣ ប៉ុន្តែ គាត់បានបដិសេធ។ នៅពេលដែល ឆឹង បដិសេធ អង្គការបានពោលពាក្យថា៖ “មិត្តឯងនៅវប្បធម៌ចក្រពត្តិ”។ បន្ទាប់ពីឮការទិតៀនភ្លាម ឆឹង បានឆ្លើយតបទៅគណៈកងវិញថា៖ “ប្រសិនបើខ្ញុំនៅវប្បធម៌ចក្រពត្តិ ខ្ញុំទៅបាត់ហើយ។” ក្រោយមកអង្គការបានឲ្យ ឆឹង ធ្វើការងារកាប់ដងក្ដប និងដេរស្លឹកត្នោត រហូតដល់សម្រាលកូន។

នៅពេលដែលឆឹងសម្រាលកូន មានឆ្មបខ្មែរម្នាក់ឈ្មោះយាយ អឹម បានមកជួយសម្រាលកូនឲ្យ ឆឹម។ បន្ទាប់ពីសម្រាលកូនរួចបានមួយរយៈ ឆឹង ត្រូវ​អង្គការចាត់តាំង​ឲ្យធ្វើជាមេដោះនៅក្នុងភូមិ។ បីខែក្រោយមក ឆឹង ចូលធ្វើការងារក្នុងកងចល័តភូមិវិញ។ ការធ្វើការងារក្នុងកងចល័តមានការលំបាកបន្តិចបន្តួច ព្រោះឆឹង ត្រូវដើរទៅបំបៅកូននៅក្នុងសហករណ៍។ ដោយមើលឃើញពីការលំបាកក្នុងការធ្វើដំណើរទៅមក ប្រធានក្រុមបានអនុញ្ញាឲ្យ ឆឹង យកកូនទៅកន្លែងធ្វើការងារ។ នៅពេលដែលកូនយំ ឆឹង បានឡើងមកបំបៅកូននៅក្នុងរោងមួយក្បែរកន្លែងធ្វើការងារ។

ក្រៅពីការងារខាងលើ ឆឹង បានធ្វើការងារផ្សេងទៀតដូចជា ពេលថ្ងៃជីកព្រែក ៦មករា ហើយពេលយប់ជីកស្រះវត្តកោះ។ ឆឹង បានធ្វើការងារជីកព្រែកតាំងពី កំពង់ចក​ បន្តទៅឌុចសេដ្ឋី ហើយបន្តទៅស្រែងគង់ និងទៅដល់ព្រៃល្វា។ ដើម្បីទទួលបានជ័យជម្នះក្នុងការជីកព្រែក ក្រុមរបស់ ឆឹង ត្រូវដាក់វេនគ្នាធ្វើការងារទាំងយប់ ទាំងថ្ងៃ។

លើសពីនេះទៅទៀត ឆឹង បានចូលរួមធ្វើជីនៅកន្លែង ៩៤។ នៅកន្លែងធ្វើជី ឆឹង ត្រូវទូលទឹក និងដើមទន្ទ្រានខែត្រ យកទៅកាប់ និងចាក់ក្នុងរណ្ដៅ ដើម្បីធ្វើជីដាក់ស្រែ។ មួយវិញទៀត នៅរដូវវស្សា អង្គការបានចាត់តាំង ឆឹង ឲ្យធ្វើការងារដកសំណាប, ស្ទូងសំណាប និងច្រូតស្រូវ នៅភូមិព្រៃផ្ដៅ។

ឆឹង បានឲ្យដឹងទៀតថា គាត់ត្រូវធ្វើការងារខួបប្រាំង ខួបវស្សា ប៉ុន្តែរបបអាហារដែលគាត់ទទួលបានភាគច្រើនគឺបបររាវៗពីរពេល ជាមួយសម្លម្ជូរបន្លែព្រលឹត, ត្រកួន ឬក៏ត្រឡាច។ លើសពីនេះទៅទៀតនៅពេលដែលអង្គការដាច់ស្បៀងខ្លាំង កម្មាភិបាលខ្មែរក្រហមបានស្ងោរដំឡូងចែកប្រជាជនហូបជំនួសបបរ។

ឆឹង បានបន្តថា គាត់ហូបមិនបានគ្រប់គ្រាន់នោះទេ ព្រោះគាត់បានយកដំឡូង និងកាកបបរដែលគាត់ទទួលបានផ្តល់​ឲ្យកូន​របស់​ខ្លួនបន្ថែមទៀត។ ដើម្បីកាត់បន្ថយភាពឃ្លាន ឆឹង សុខចិត្តបេះបន្លែឆៅយកមកហូបបន្ថែមទៀត។

នៅអំឡុងពេលធ្វើបទសម្ភាស ឆឹង រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ ឆឹង បានប្រាប់ទៅអ្នកស្ម័គ្រចិត្តថា គាត់មានជំងឺពុកឆ្អឹង និងលើសឈាម។ ដើម្បីព្យាបាលជំងឺទាំងពីរនេះ ឆឹង បានទៅពិនិត្យសុខភាព និងទិញថ្នាំនៅពេទ្យឯកជន។ ក្រៅពីការលេបថ្នាំ ឆឹង បានទិញទឹកដោះគោហូបបន្ថែមទៀត។

សម្ភាសដោយ៖ ថៃ ស៊ីណា ថ្ងៃទី១១ សីហា ២០២១

អត្ថបទដោយ៖ ភា រស្មី ថ្ងៃទី០៧ កុម្ភៈ ២០២៥