(តាកែវ) ឃុន នី អាយុ៦៥ឆ្នាំ រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ ឪពុករបស់នី ឈ្មោះ ណឹម និងម្ដាយឈ្មោះ វា។ នី មានបងប្អូនចំនួន ៧នាក់ ក្នុងនោះគាត់គឺជាកូនទី៣នៅក្នុងគ្រួសារ។

គ្រួសាររបស់ នី គឺជាអ្នកមូលដ្ឋាន រស់នៅក្នុងសហករណ៍ស្វាយខាងត្បូង។ អង្គការចាត់តាំងឲ្យឪពុករបស់នី ទៅធ្វើការងារដាំល្ហុងនៅទួលគគីរ និងម្ដាយរបស់គាត់ទៅត្បាញនៅក្នុងសហករណ៍។ នៅក្នុងសម័យខ្មែរក្រហម នី បាត់បង់ឪពុកមា ដែលជាអ្នកធ្វើការងារពីជំនាន់មុន។

មុនដំបូង នី ត្រូវអង្គការចាត់តាំងឲ្យចូលធ្វើការងារនៅក្នុងកងចល័តភាគនៅភ្នំបូរី រួចបន្តទៅព្រៃផ្គាំ, គោកកណ្ដៀង, ល្វាត្នោត និងស្វាយយូ។ ការងាររបស់ នីគឺធ្វើចុះឡើងៗ។ នៅភ្នំបូរី នី រែកដី ជីកព្រែក ហើយនៅព្រៃផ្គាំធ្វើស្រែ និងច្រូតស្រូវ។ នីបានឲ្យដឹងថា នៅព្រៃផ្គាំ មានឈ្លើងច្រើនណាស់ ប៉ុន្តែគាត់មិនហ៊ានបដិសេធចំពោះការចាត់តាំងរបស់អង្គការទេ។

នី ខិតខំធ្វើការយ៉ាងហត់នឿយជារៀងរាល់ថ្ងៃ ប៉ុន្តែរបបអាហារដែលគាត់ទទួលបានគឺបបរពីរវែកក្នុងមួយពេល និងមួយថ្ងៃពីរពេល ពោលគឺមិនគ្រប់គ្រាន់នោះទេ។ នី បានឲ្យដឹងទៀតថា អង្គការរៀបចំគូស្រករឲ្យរៀបការនៅភ្នំបូរី ១០០គូ ក្នុងនោះក៏មាន នី ដែរ ប៉ុន្តែគាត់បានរត់ពួន។ នៅក្នុងសម័យខ្មែរក្រហម នី មិនសូវឈឺនោះទេ ប៉ុន្តែបើគាត់ឈឺក៏មិនមានថ្នាំព្យាបាលដែរ។ នី ធ្វើការក្នុងកងចល័តរហូតដល់ខ្មែរក្រហម ដួលរលំ។

​នៅពេលរបបខ្មែរក្រហមដួលរលំ នី ចូលធ្វើការងារជាប្រធានសមាគមឃុំ ស្រុកអង្គរបូរី និងបន្តចូលជាសមាជិកនារីស្រុក នៅព្រៃទោល។  នី បានប្រាប់ទៅអ្នកស្ម័គ្រចិត្តរបស់មជ្ឈមណ្ឌលឯកសារកម្ពុជាថា គាត់បានដឹងអំពីតុលាការកាត់ទោសមេដឹកនាំខ្មែរក្រហមដែរ។

នី យល់ថាការកាត់ទោសមេដឹកនាំខ្មែរក្រហមគឺ ល្អ និងយុត្តិធម៌។ លើសពីនេះទៅទៀត នី យល់ថាការអប់រំនៅតាមសាលារៀន, ការប្រមែប្រមូលឯកសារ ឬក៏សាច់រឿងអ្នករស់រានមានជីវិតពីរបបខ្មែរក្រហម ដូចជាអ្នកស្ម័គ្រចិត្តចុះទៅសម្ភាសគឺល្អ ព្រោះអាចការពារកុំឲ្យរបបខ្មែរក្រហមវិលត្រលប់មកវិញ។

សម្ភាសដោយ៖ថៃ ស៊ីណា ថ្ងៃទី២៦ សីហា ២០២១

អត្ថបទដោយ៖ ភា រស្មី ថ្ងៃទី០៤ មីនា ២០២៥