(តាកែវ) ម៉ៅ ស៊ីម អាយុ៧០ឆ្នាំ គឺជាអ្នករស់រានមានជីវិតពីរបបខ្មែរក្រហម។  នៅឆ្នាំ១៩៧០ ក្នុងភូមិរបស់ ស៊ីម មានឡានហោះ(យន្តហោះ)ចូលមកទម្លាក់គ្រាប់បែក។ ស៊ីម និងឪពុកម្ដាយបានភៀសខ្លួនចេញពីភូមិ ដើម្បីគេចពីការទម្លាក់គ្រាប់បែក។

អំឡុងពេលខ្មែរក្រហមគ្រប់គ្រងប្រទេស ស៊ីម ធ្លាប់ពរពោះ និងឆ្លងទន្លេកូនម្នាក់។ អង្កការបានបញ្ជូនពេទ្យម្នាក់ឲ្យមកជួយស៊ីមសម្រាលកូន ប៉ុន្តែមិនមានថ្នាំអ្វីហូបនោះទេ។ បន្ទាប់ពីឆ្លងទន្លេរួច ស៊ីម កើតមានអាការហើមជើង ហើយពេទ្យ បានឲ្យគាត់យកផ្លែននោងមកស្ងោរហូបជាមួយស្ករក្រហមបន្តិចបន្តួច ប៉ុន្តែ ស៊ីម បដិសេដ។

នៅសម័យខ្មែរក្រហម ស៊ីម គឺជាប្រជាជនមូលដ្ឋាន។ ការងាររបស់ ស៊ីម មានស្ទូងស្រូវ និងជាន់រហាត់ទឹក។ ក្នុងមួយថ្ងៃអង្គការប្រើឲ្យ ស៊ីម ស្ទូងសំណាបឲ្យបាន ១ស្លឹក ៥ផ្លូន។ ក្រោយមក ឈ្មោះ សើរ និងហួត បានប្ដូរ ស៊ីម ឲ្យមកធ្វើការបុកស្រូវវិញជាមួយឈ្មោះ យន់ បន្ទាប់ពីកូនរបស់គាត់ស្លាប់។ តាមសម្ដីរបស់ ស៊ីម កូនរបស់គាត់ឈ្មោះ សែ បានស្លាប់ដោយសារតែជំងឺ។

នៅពេលដែល សែ ឈឺ ស៊ីម មិនបាននៅមើលថែកូននោះទេ បើទោះបីជាម្ដាយរបស់គាត់ប្រាប់ថាកូនឈឺខ្លាំងក៏ដោយ។ ស៊ីម បានក្រោកតាំងពីម៉ោង ៣ភ្លឺ ដើម្បីទៅធ្វើការងារ ព្រោះគាត់មិនចង់ធ្លាក់ណែងពីគណៈកង ហើយធ្វើឲ្យអត់មានសិរីសួស្ដី។ ចំណែកឯ សែ ត្រូវបានឈ្មោះ ឡេន យកទៅព្យាបាលនៅពេទ្យវាន់ឡូ (អកយំ) ពីរយប់ទើបស្លាប់។

បន្ទាប់ពីកូនស្លាប់ ស៊ីម មានអារម្មណ៍សោកសៅយ៉ាងខ្លាំង ហេតុនេះហើយបានជាអង្គការប្ដូរគាត់ឲ្យទៅបុកស្រូវ។ មុនដំបូងអង្គការកំណត់ឲ្យក្រុមរបស់ ស៊ីម ដែលមានសមាជិក១០នាក់ រៀបចំបុកស្រូវឲ្យបាន អង្ករ ៣តៅ ក្នុងមួយថ្ងៃ ប៉ុន្តែនៅពេលគ្រប់ផែនការ ការងារ​របស់​ស៊ីម ត្រូវកើនឡើងទៅដល់ ៥តៅ រួចបន្តទៅដល់ ៧តៅ និងចុងក្រោយ ១០តៅក្នុងមួយថ្ងៃ។

ជារៀងរាល់ថ្ងៃ ស៊ីមត្រូវជួយហាលស្រូវជាមុនសិនទើបយកទៅបុក ប៉ុន្តែបើមេឃគ្មានថ្ងៃ ការហាលមិនអាចធ្វើបាន គាត់ត្រូវលីងស្រូវ។ ស៊ីម បានបន្តទៀតថា គាត់បានលួច ហូបស្រូវលីងនោះ ព្រោះតែគាត់ឃ្លានពេក។ លើសពីនេះទៅទៀត ស៊ីម បានលួចស្រូវដែលបុករួចមានក្បាលអង្កាមលាយជាមួយអង្ករ យកមកវិញដូចនំអន្សមទុកហូបនៅពេលក្រោយ។ ស៊ីម លើកឡើងថា ប្រសិនបើអង្គការចាប់បានថាលួចអង្ករ នឹងត្រូវយកទៅសម្លាប់ចោល។

ថ្ងៃមួយ ស៊ីម បានឮកម្មាភិបាលខ្មែរក្រហមនិយាយថាយកឈ្មោះស៊ីម ឡើងទៅលើ។ នៅពេលឮដូចច្នេះ ស៊ីម មានការព្រួយបារម្ភយ៉ាងខ្លាំង ប៉ុន្តែសំណាងល្អអង្គការចាប់អ្នកផ្សេងឈ្មោះ ស៊ីម ដូចគ្នា។ ស៊ីម បានឲ្យដឹងទៀតថា អ្នកដែលស្លាប់នៅក្នុងភូមិមិនមានធ្វើបុណ្យនោះទេ គឺទុកឲ្យបងប្អូនសែងសាកសពយកកប់នៅទួលមួយក្បែរភូមិ។

បច្ចុប្បន្ន ស៊ីម រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ ស៊ីម មិនមានជំងឺប្រចាំកាយនោះទេ ប៉ុន្តែគាត់មានជំងឺឈឺក្បាលវិលមុខបន្តិចបន្តួច។ ជំងឺរបស់ ស៊ីម បណ្ដាលមកពីចាស់ជរា និងមិនសូវមានអាហារហូបគ្រប់គ្រាន់។ គាត់​ព្យាបាលជំងឺតាមរយៈការទិញថ្នាំលេបពីពេទ្យឯកជន។ ស៊ីម នៅតែមានការឈឺចាប់ និងខឹង នៅពេលដែលនឹកឃើញរឿងរ៉ាវក្នុងរបបខ្មែរក្រហម។

សម្ភាសន៍ដោយ៖ ថៃ ស៊ីណា ថ្ងៃទី០៦ សីហា ២០២១

អត្ថបទដោយ៖ ភា រស្មី ថ្ងៃទី៣១ មករា ឆ្នាំ២០២៥