នី សាម៉ន៖ ហូបដំឡូងជំនួសបបរ
(តាកែវ) នី សាម៉ន អាយុ៨៤ឆ្នាំ រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ នៅក្នុងសម័យខ្មែរក្រហម សាម៉ន មានកូន៧នាក់។ កូនៗរបស់ សាម៉ន មួយចំនួនត្រូវចូលទៅរស់នៅ និងធ្វើការងារនៅក្នុងកងកុមារ។ ការងាររបស់កូន សាម៉ន និងកុមារផ្សេងទៀតគឺ បោសសំរាម និងធ្វើជី។
សាម៉ន បានឲ្យដឹងទៀតថា ក្មេងៗដែលមានអាយុចាប់ពី៣ខែ ត្រូវយកទៅដាក់ក្នុងមណ្ឌលឲ្យ យាយចាស់ៗមើលថែ ដើម្បីឲ្យម្ដាយឪពុកចេញទៅធ្វើការងារ។ ការងាររបស់ប្រពន្ធ សាម៉ន គឺធ្វើអង្ករនៅក្នុងសហករណ៍។ ចំណែក សាម៉ន ត្រូវអង្គការប្រើឲ្យគាស់កាយផ្លូវ, ដាំដំណាំ, ធ្វើផ្លូវ និងកាប់ឧស។
សាម៉ន បានឲ្យដឹងថា មុនដំបូង គាត់ទទួលបានហូបគ្រប់គ្រាន់ ប៉ុន្តែក្រោយមកមានភាពខ្វះខាត។ អាហារដែលប្រជាជនទទួលបានគឺបបររាវៗ ដោយបបរមួយខ្ទះ មានអង្ករត្រឹមតែពីរ ទៅបីកំប៉ុង។ នៅពេលដែលខ្វះស្បៀង អង្គការចែកដំឡូងឲ្យប្រជាជនម្នាក់១ ទៅ២ មើមក្នុងមួយពេល។ សាម៉ន បានបន្តថាការហូបអាហារនៅក្នុងសហករណ៍ មានពីរដងក្នុងមួយថ្ងៃ។ ប្រជាជនអាចទៅហូបអាហារបានលុះត្រាតែឮសំឡេងវាយជួង។ នៅពេលដែលមានជំងឺឈឺថ្កាត់ ប្រជាជនអាចសុំថ្នាំរាងដូចអាចម៍ទន្សាយពីគ្រូពេទ្យដែលដើរតាមភូមិ ប៉ុន្តែប្រជាជនលេបថ្នាំនេះមិនសូវត្រូវនោះទេ។ ប្រសិនបើអ្នកជំងឺឈឺធ្ងន់ គឺត្រូវបញ្ជូនទៅពេទ្យឃុំ។
នៅក្នុងសម័យខ្មែរក្រហម សាម៉ន បាត់ដំណឹងប្អូនរបស់គាត់ម្នាក់ដែលធ្វើជាទាហាន លន់ នល់។ ប្អូនរបស់សាម៉ន បាត់ខ្លួនតាំងពីឆ្នាំ១៩៧៥ បន្ទាប់ពីគាត់ចេញពីទីក្រុងភ្នំពេញ។
នៅពេលដែលអ្នកស្ម័គ្រចិត្តចុះទៅសម្ភាស សាម៉ន បាននិយាយថាគាត់មានជំងឺ រលាកទងសួត និងរលាកប្រមាត់ ដែលបណ្ដាលមកពីអាយុរបស់កាន់កាន់តែច្រើន។ អាការជំងឺរបស់ សាម៉ន មានក្អួតចេញឈាម និងឡើងជាតិស្ករ។ សាម៉ន ចាប់ផ្ដើមឈឺធ្ងន់តាំងពីគាត់អាយុ៧០ ហើយគាត់ធ្វើការងារមិនបាន ដូចមុនទៀតទេ។ សាម៉ន ទទួលការព្យាបាលជំងឺពីពេទ្យនៅក្នុងភូមិ និងពេទ្យនៅផ្សារ។ ប៉ុន្តែគាត់មិនសូវជឿជាក់ទៅលើពេទ្យដែលចូលទៅឃោសនាលក់ថ្នាំនៅក្នុងភូមិយូរៗម្ដងនោះទេ ព្រោះគាត់គិតថាជារឿងបោកប្រាស់ប្រជាជន។
សម្ភាសដោយ៖ ថៃ ស៊ីណា ថ្ងៃទី២៤ សីហា ២០២១
អត្ថបទដោយ៖ ភា រស្មី ថ្ងៃទី២៧ កុម្ភៈ ២០២៥