(តាកែវ) សុខ ថា អាយុ៦៣ឆ្នាំ រស់នៅភូមិព្រៃលៀប ឃុំព្រៃអំពក ស្រុកគីរីវង់ ខេត្តតាកែវ។ នៅក្នុងសម័យខ្មែរក្រហម ថា មានអាយុ១៨ឆ្នាំ។ ថា គឺជាប្រជាជនចាស់ នៅក្នុងភូមិព្រៃលៀប។ អង្គការបានចាត់តាំង ថា ឲ្យធ្វើការងារភ្ជួរស្រែ និងជីកស្រះ នៅក្នុង កងយុវជនភូមិ។ នៅរដូវធ្វើស្រែ ថា ត្រូវក្រោកតាំងពីម៉ោង៣ភ្លឺ ដើម្បីទៅភ្ជួរស្រែ រហូតដល់ថ្ងៃត្រង់ ហើយពេលយប់ គាត់ត្រូវទៅចូលរួមជីកស្រះ យកទឹកប្រើប្រាស់ រហូតដល់ម៉ោង៩យប់។

ថា បានឲ្យដឹងថា មុនដំបូងគាត់មិនទាន់ចេះភ្ជួរស្រែនៅឡើយទេ ប៉ុន្តែត្រូវបានអង្គការបង្ខំគាត់ឲ្យចាប់កូនក្របីយកមកភ្ជួរ។ នៅពេលដែលភ្ជួរស្រែដំបូង ថា បានធ្វើឲ្យបាត់ផាលនៅក្នុងដី ហើយគាត់ត្រូវបានអង្គការស្ដីបន្ទោស និងមានបំណងយកទៅសម្លាប់ ប៉ុន្តែសំណាងល្អបានរកឃើញវិញ។

ថា បានបន្តថា គាត់ស្ទើរតែបាត់បង់ជីវិតនៅក្នុងរបបខ្មែរក្រហម ដោយសារតែការធ្វើការងារហួសកម្លាំង និងហូបមិនបានគ្រប់គ្រាន់។ តាមសម្ដីរបស់ ថា ក្នុងមួយថ្ងៃអង្គការឲ្យហូបបបរពីរពេល គឺពេលថ្ងៃត្រង់ និងពេលល្ងាច។ ថា ធ្លាប់ត្រូវបានកម្មាភិបាលខ្មែរក្រហមស្ដីបន្ទោស ដោយសារតែគាត់ដួសបបរពីឆ្នាំងហូបបន្ថែមទៀត។ ដោយសារតែការស្រេកឃ្លានខ្លាំងពេក ថា បានទៅរើសក្បាលដំឡូងមីយកមកហូបបន្ថែម។

នៅពេលដែល ថា ហូបក្បាលដំឡូងមីរួច គាត់កើតមានជាអាការវិលមុខ និងសន្លប់នៅកន្លែងបន្ទោរបង់។ បន្ទាប់មកទៀត ដើម្បីកាត់បន្ថយការស្រេកឃ្លាន ថា បានយកកន្ទក់មកហូបបន្ថែមទៀត។ ថា បាននិយាយថា កន្ទក់មានរសជាតិផ្អែមដូចស្ករនៅពេលនោះ។

ថា បាននិយាយថា នៅក្នុងរបប ប៉ុល ពត ក្នុងមួយឆ្នាំ គាត់បានទទួលខោអាវសាច់បាឌឹប ពីរសម្រាប់ និងកន្សែង(ក្រមា)ធ្វើពីកប្បាសមួយ ពីអង្គការ ។ សម្លៀកបំពាក់ដែល ថា ទទួលបានមិនគ្រប់គ្រាន់ក្នុងការប្រើប្រាស់ប្រចាំថ្ងៃនោះទេ ហេតុនេះ ហើយបានជាគាត់ត្រូវស្លៀកពាក់ខោអាវដដែលរាល់ថ្ងៃ។

ថា បានបន្តទៀតថា សម្លៀកបំពាក់ដែលស្លៀកពាក់រាល់ថ្ងៃ ធ្វើឲ្យកើតមានសត្វចៃជាច្រើននៅលើថ្នេរខោអាវ។ លើសពីនេះទៅទៀត សត្វចៃទាំងអស់នោះបានខាំចូលក្នុងសាច់របស់គាត់ជាច្រើន ដោយសារតែមិនមានទឹកងូតសម្អាតកាយឲ្យបានត្រឹមត្រូវ។ បើតាមសម្ដីរបស់ ថា នៅពេលដែលយកដៃអេះលើស្បែក គាត់បានឃើញសត្វចៃជាច្រើនផុសឡើង ដែលមើលទៅគួរឲ្យព្រឺខ្លួន។

ក្រោយមក នៅពេលដែលមានយោធាវៀតណាមចូលមកនៅឆ្នាំ១៩៧៩ ថា បានរត់ភៀសខ្លួនទៅស្រុក១០៥។ នៅពេលធ្វើដំណើរដល់ស្រុក ១០៥ ថាបានឃើញកម្មាភិបាលខ្មែរក្រហមចាស់ម្នាក់ នៅភូមិព្រៃឃ្នា យកពូថៅកាប់យុវជនម្នាក់ដែលរត់ចេញពីស្រុក១០៩ស្លាប់ភ្លាមៗ។ កម្មាភិបាលខ្មែរក្រហម បានចោទប្រកាន់យុវជនម្នាក់នោះថាលួចដំណាំ ប៉ុន្តែ ថា មិនបានឃើញយុវជននោះលួចអ្វីនោះទេ។

បន្ទាប់មកទៀត ថា បានត្រលប់មករស់នៅក្នុងភូមិព្រៃលៀបវិញ។ ចំពោះតុលាការកាត់ទោសមេដឹកនាំខ្មែរហម ថា យល់ឃើញថា ការកាត់ទោសមេដឹកនាំខ្មែរក្រហមគឺត្រឹមត្រូវណាស់ ព្រោះ មេដឹកនាំខ្មែរក្រហមនេះហើយ ជាអ្នក​រុញច្រានប្រជាជនឲ្យជួបទុក្ខវេទនា។ ថា មានជំងឺគេងមិនលក់ និងឧស្សាវិលមុខ។ ថាមិនដែលបានទៅពិនិត្យសុខភាពនោះទេ។ អាការជំងឺរបស់ថា បណ្ដាលមកពីអាយុកាន់តែច្រើន។

សម្ភាសដោយ៖ ទុយ ដារ៉ា ថ្ងៃទី១៣ សីហា ២០២១

អត្ថបទដោយ៖ ភា រស្មី ថ្ងៃទី៣០ មករា ២០២៥