(តាកែវ) ធ្លក ខេង មានអាយុ៧៤ឆ្នាំ រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ នៅក្នុងសម័យខ្មែរក្រហម ខេន មានកូន៣នាក់។ កូនច្បងរបស់ ខេន អាយុ១២ឆ្នាំ បានចូលទៅរស់នៅក្នុងកងកុមារនៅភូមិក្របីកូន និងធ្វើការងារនៅភ្នំបូរី។ ចំណែកកូន២នាក់ផ្សេងទៀត ក្នុងនោះមានម្នាក់ដែលកើតនៅក្នុងសម័យខ្មែឬក្រហម ត្រូវយកទៅដាក់ក្នុងមណ្ឌលកុមារឲ្យឈ្មោះ ធី មើលថែ។
នៅក្នុងសម័យខ្មែរក្រហម ខេង សម្រាលបានកូនម្នាក់។ បន្ទាប់ពីសម្រាលកូនរួច អង្គការឲ្យ ខេង និងម៉ន ដែលទើបតែសម្រាលកូនហើយដូចគ្នា នៅមើលកុមារ និងបំបៅដោះទារកនៅក្នុងសហករណ៍។ ខេង នៅមើលក្មេងក្នុងសហករណ៍ បានបីខែ ទើបចេញទៅធ្វើការងារក្រៅសហករណ៍ និងទុកឲ្យយាយនៅក្នុងភូមិមើលកូនរបស់គាត់។
ខេង បានឲ្យដឹងថា នៅពេលដែលគាត់ចេញទៅធ្វើការងារនៅតាមវាលស្រែ គាត់ត្រូវត្រលប់មកបំបៅដោះកូននៅពេលថ្ងៃត្រង់ជារៀងរាល់ថ្ងៃ បើទោះបីជាគាត់ទៅធ្វើការងារឆ្ងាយពីសហករណ៍ក៏ដោយ។ នៅពេលបំបៅកូនរួច ខេង ត្រូវរូតរះ ត្រលប់ទៅកន្លែងធ្វើការងារឲ្យទាន់ពេល។ ការងារដែល ខេង ធ្វើបន្ទាប់ពីសម្រាលរួច មានដូចជា ច្រូតស្រូវ និងជីកប្រឡាយ ជីកស្រះ នៅវត្តកោះ។
ក្រៅពីការងារខាងលើ ខេង ត្រូវធ្វើការងារដូចជាស្ទូងសំណាប, ធាក់រហាត់បញ្ចូលទឹកក្នុងស្រែ, លើកភ្លឺស្រែ, ជីកទំនប់ និងលើកប្រឡាយ។ ខេង ធ្វើការងារហត់នឿយ និងត្រូវបំបៅដោះកូនបន្ថែមទៀត ប៉ុន្តែរបបអាហារដែលគាត់ទទួលបានភាគច្រើនគឺបបររាវៗ ជាមួយសម្លបន្លែដើមចេក។

ខេង បានឲ្យដឹងថា នៅរដូវប្រមូលផល អង្គការដាំបាយ ឬបបរខាប់ៗឲ្យប្រជាជនហូបជាមួយសម្ល ប៉ុន្តែនៅពេលដែលដាច់ស្បៀងខ្លាំង ប្រជាជន ត្រូវហូបដំឡូងប្រវែងប៉ុនចង្អុលដៃ ចំនួនពីរមើមជំនួសបបរ និងពេលខ្លះបានហូបតែសម្លដើមចេក។ ខេង បានបន្តថា នៅថ្ងៃទី៣០ រាល់ខែ អង្គការធ្វើនំអន្សមចែកឲ្យប្រជាជនហូបម្នាក់មួយ និងទឹកត្នោតម្នាក់មួយកែវ។
ចំណែកឯប្ដីរបស់ ខេង ត្រូវអង្គការបញ្ជូនទៅកាប់ព្រៃនៅព្រៃលើ, ព្រៃក្មេង, និងជាំស្រកែ។ ក្នុងរយៈពេល ១ទៅ២ខែម្ដង ប្ដីរបស់ខេង ត្រលប់មកលេងគ្រួសារ។ នៅចុងឆ្នាំ១៩៧៨ អង្គការបានចាត់តាំង ប្ដីរបសខេង ឲ្យធ្វើជាគណៈកង បន្ទាប់ពីគាត់ត្រលប់មកពីកាប់ព្រៃវិញ។
ប្ដីរបស់ ខេង ធ្វើការងារជាគណៈកងបាន ប្រមាណ ៣ខែ ទើបខ្មែរក្រហម ដួលរលំនៅឆ្នាំ១៩៧៩។ បន្ទាប់ពីខ្មែរក្រហមដួលរលំ ខេង បាត់បង់ឪពុកមាម្នាក់ ដែលធ្វើជាគ្រូបង្រៀនកាលពីសង្គមចាស់។ ឪពុកមារបស់ខេង ត្រូវបានអង្គការចាប់យកទៅសម្លាប់ បន្ទាប់ពីគាត់ត្រលប់មកផ្ទះវិញនៅឆ្នាំ១៩៧៥។

សម្ភាសដោយ៖ថៃ ស៊ីណា ថ្ងៃទី៣០ សីហា ២០២១

អត្ថបទដោយ៖ ភា រស្មី ថ្ងៃទី១០ មីនា ២០២៥