(តាកែវ) អ៊ី តូច អាយុ៦៦ឆ្នាំ មានស្រុកកំណើតនៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ តូច រៀបការនៅក្នុងសម័យខ្មែរក្រហម។ តូច បានរៀបរាប់ថា ការរៀបការរបស់គាត់មានចាស់ទុំចូលទៅនិយាយជើងការត្រឹមត្រូវមុនពេលរៀបការ និងមិនមានការបង្ខិតបង្ខំនោះទេ។ លើសពីនេះទៅទៀត ការរៀបការរបស់ តូច គឺមានសែន មាន់ ទា ប៉ុន្តែមិនបានធ្វើធំដុំអ្វីនោះទេ។

បន្ទាប់ពីរៀបការរួច តូច បានចេញទៅរស់នៅជាមួយប្ដី នៅភូមិរំលក ឃុំបាស្រែ ស្រុកអង្គរបូរី ខេត្តតាកែវ។ ការរស់នៅរបស់ តូច នៅក្នុងសហករណ៍រំលក គឺល្អប្រសើរ ព្រោះមានអាហារហូបគ្រប់គ្រាន់។ តូច បានបន្ថែមថា ជារៀងរាល់ថ្ងៃអង្គការកំណត់ឲ្យហូបបាយ ឬក៏បបរគោកពីរពេល ជាមួយសម្លឆា ឬក៏សម្លម្ជូរគ្រឿងសាច់គោ។ មុនពេលប្រជាជនទៅហូបអាហារ គឺមានការវាយជួងអញ្ចើញទៅត្រឹមត្រូវ។ តូច បានឲ្យដឹងថា ការហូបអាហារនៅក្នុងសហករណ៍មានសភាព គ្រប់គ្រាន់ ខុសពីការហូបអាហារនៅកន្លែងការដ្ឋានការងារ។

នៅក្នុងសម័យខ្មែរក្រហម តូច ធ្វើស្រែ ស្ទូង និងដកសំណាប។ តូច បាននិយាយថា ការស្ទូងស្រូវនៅវាលស្រែលើ គឺត្រូវជ្រលក់សំណាបជាមួយលាមកសិន ប៉ុន្តែបើស្រែក្នុងបឹងគឺមិនបាច់នោះទេ។ គ្រួសាររបស់ តូច មិនបានធ្វើការងារ និងរស់នៅជុំគ្នានោះទេ ដោយសារតែប្ដីរបស់គាត់ត្រូវទៅធ្វើការងារក្នុងឡូ នៅជ្រោយស្នោ។ ចំណែកម្ដាយក្មេករបស់ តូច នៅមើលក្មេងៗនៅក្នុងមណ្ឌល និងដាក់បាយជ្រូក។ ចំពោះឪពុកក្មេករបស់ តូច គាត់បានស្លាប់ នៅមន្ទីរពេទ្យក្អែកទំ ដោយសារជំងឺទាចទឹក។

តូច ចាប់ផ្ដើមមានកូនបន្ទាប់ពីខ្មែរក្រហមដួលលំ។ នៅពេលផ្ដល់បទសម្ភាសទៅកាន់អ្នកស្ម័គ្រចិត្ត តូច រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។

សម្ភាសដោយ៖ ថៃ ស៊ីណា ថ្ងៃទី២០ សីហា ២០២១

អត្ថបទដោយ៖ ភា រស្មី ថ្ងៃទី២១ កុម្ភៈ ២០២៥