ហេង លី៖ ធ្វើការងារនៅក្នុងកងកុមារពិសេស

(តាកែវ) ហេង លី អាយុ៥៥ឆ្នាំ មានមុខរបរធ្វើស្រែ។ លី រស់នៅភូមិស្វាយខាងត្បូង ឃុំបាស្រែ ស្រុកអង្គរបូរី ខេត្តតាកែវ។ ឪពុករបស់ លី ឈ្មោះ គង់ គួយ និងម្ដាយឈ្មោះ យ៉ា។ លី មានបងប្អូនចំនួន ៣នាក់ ក្នុងនោះមានស្រីម្នាក់។
នៅក្នុងសម័យខ្មែរក្រហម សមាជិកគ្រួសាររបស់ លី ត្រូវធ្វើទាំងអស់គ្នា។ ឪពុករបស់ លី ធ្វើការនៅក្នុងកងតាៗ ឯម្ដាយរបស់គាត់មើលក្មេងៗនៅក្នុងសហករណ៍។ ក្នុងចំណោមបងប្អូនទាំង៣នាក់របស់ លី បងច្បងចូលទៅធ្វើជាយោធា ហើយលី និងប្អូនចូលទៅរស់នៅ និងធ្វើការងារនៅក្នុងកងកុមារ។
នៅពេលដែល លី ចូលទៅរស់នៅក្នុងកងកុមារ គាត់មានអាយុ១២ឆ្នាំ។ មុនដំបូងអង្គការបញ្ជូន លី ឲ្យទៅរស់នៅក្នុងកងកុមារឃុំ។ បន្ទាប់មកទៀត អង្គការបញ្ជូន លី ឲ្យទៅធ្វើជាកងកុមារពិសេសនៅភូមិរកា។ នៅក្នុងកងកុមារពិសេស លី មិនបានរៀនសូត្រនោះទេ គាត់ត្រូវ ប្រមូលអាចម៍គោ, ធ្វើជី និងកាប់ដើមទន្ទ្រានខែត្រយកមកទម្លាក់ក្នុងរណ្ដៅ។ នៅក្នុងសហករណ៍ភូមិរកា លី ធ្លាប់ ទៅមើលពិធីរៀបការ ដែលខ្មែរក្រហមរៀបចំដែរ។
លី បានឲ្យដឹងថា អង្គការរៀបចំពិធីរៀបការម្ដងសម្រាប់ ៣ ទៅ៥គូ ទៅតាមការស្នើរបស់យុវជន និងដោយចាប់បង្ខំ។ អង្គការ បានឲ្យយុវជន-យុវនារី ឡើងប្តេជ្ញាម្ដងម្នាក់ នៅពេលដែលរៀបការ។ បន្ទាប់ពីរៀបការរួច អង្គការបានចែកដំឡូងស្ងោរឲ្យ លី និងអ្នកដទៃទៀតហូប។
ចំពោះរបបអាហារវិញ លី បានឲ្យដឹងថា ជាទូទៅគាត់ទទួលបាន បបរហូបជាមួយសម្លគល់ល្ហុង គល់ដំឡូង និងព្រលឹត។ នៅរដូវប្រមូលផល អង្គការដាំបាយចែកឲ្យប្រជាជនហូបត្រឹមតែរយៈពេលខ្លីប៉ុណ្ណោះ។ ជារៀងរាល់ថ្ងៃ លី ទទួលបានអាហារពីរពេលគឺ ពេលថ្ងៃ និងពេលល្ងាច។ នៅពេលហូបអាហារ ក្មេងៗត្រូវឈរជាជួរ រង់ចាំការហៅរបស់កម្មាភិបាលខ្មែរក្រហម ឲ្យចូលទៅអង្គុយនៅតុអាហារ ទៅតាមការហៅរបស់កម្មាភិបាលខ្មែរក្រហម។
មុនពេលខ្មែរក្រហមដួលរលំ អង្គការបានបញ្ចូលកុមាររួមគ្នាវិញ និងបញ្ជូនឲ្យទៅរស់នៅផ្សារជ្រែ។ បន្ទាប់ពីបែកសម័យខ្មែរក្រហម លី បានត្រលប់មកផ្ទះជួបជុំគ្រួសារវិញ។ លី បានឲ្យដឹងថា នៅក្នុងសម័យខ្មែរក្រហម បងរបស់គាត់ម្នាក់ ស្លាប់ដោយសារជំងឺ។

សម្ភាសដោយ៖ថៃ ស៊ីណា ថ្ងៃទី៣១ សីហា ២០២១

អត្ថបទដោយ៖ ភា រស្មី ថ្ងៃទី១១ មីនា ២០២៥

ចែករម្លែកទៅបណ្តាញទំនាក់ទំនងសង្គម

Solverwp- WordPress Theme and Plugin