ប្រជាជនភូមិបាក់នឹមចង់ឃើញសន្តិភាពរវាងកម្ពុជា និងថៃ ដោយមិនចង់ឲ្យសង្រ្គាមផ្ទុះឡើងវិញទៀតនោះទេ។ ក្នុងរយៈពេលការប៉ះទង្គិចដោយអាវុធរវាងភាគីកម្ពុជា និងថៃ ចាប់ពីថ្ងៃទី២៤ដល់២៨ ខែកក្កដា ឆ្នាំ២០២៥ នេះ បានបណ្តាលឲ្យបាត់បង់ជីវិតទាហាន និងជនស៊ីវិលអស់ជាច្រើននាក់ ព្រមទាំងបន្សល់ទុកនូវជនពិការ កុមារកំព្រា ស្រ្តីមេម៉ាយ ជនភៀសសឹកគេចខ្លួនពីសង្រ្គាមរាប់សែនគ្រួសារ។

ជាពិសេសការទម្លាក់គ្រាប់បែកដោយយន្តហោះចម្បាំង និងការទម្លាក់គ្រាប់បែកចង្កោម គ្រាប់រ៉ុកកែត ពីយន្តហោះចម្បាំងរបស់កងទ័ពថៃ បានបំផ្លិចបំផ្លាញយ៉ាងធ្ងន់ធ្ងរទៅលើប្រាសាទ វត្តអារាម មណ្ឌលសុខភាព សាលារៀន ផ្លូវថ្នល់ និងលំនៅឋានប្រជាជនរាប់មិនអស់។ ការប៉ះទង្គិចនៅតាមបណ្តោយព្រំដែនកម្ពុជា និងថៃ លើកនេះ បានផ្តល់ផលប៉ះពាល់យ៉ាងខ្លាំងទៅលើសេដ្ឋកិច្ច ដោយសារការបិទច្រកព្រំដែន ប្រជាជនរត់ភៀសខ្លួនមិនអាចប្រកបរបរចិញ្ចឹមជីវិតបាន នៅមានប្រជាជនកម្ពុជារាប់សែននាក់ បានបោះបង់ចោលការងារនៅប្រទេសថៃ វិលត្រឡប់មកប្រទេសកម្ពុជាវិញ ដែលប្រឈមមុខនឹងការគ្មានការងារធ្វើ។ង៉ែត យ៉ន់ អាយុ ៨៥ ឆ្នាំ គឺជាប្រជាជនម្នាក់រស់នៅភូមិបាក់នឹម បានរៀបរាប់ថា ទោះបីជា​គាត់មិនទទួលរងប៉ះពាល់ផ្ទាល់ដោយសារសង្រ្គាមព្រំដែនកម្ពុជា និងថៃ ក៏ដោយ ក៏គាត់យល់ឃើញពីភាពលំបាកដែលកងទ័ព និងប្រជាជនត្រូវទទួលរងគ្រោះ។ សង្គ្រាមនាំមកនូវការបាត់បង់ និងភាពអនាធិបតេយ្យក្នុងជីវិតប្រចាំថ្ងៃ។ យ៉ន់ បាននិយាយថា “យើងចង់ឃើញសន្តិភាព។ សង្គ្រាមបានធ្វើឲ្យប្រជាជនខ្វះខាត និងរងទុក្ខលំបាកជាបន្តបន្ទាប់”។

ចាន់ ថី អាយុ ៧៨ ឆ្នាំ គឺជាកសិករ និងមានស្រុកកំណើតនៅភូមិទុល ឃុំមានជ័យ ស្រុកឈូក ខេត្តកំពត បានរៀបរាប់ថា សង្រ្គាមតែងតែបង្កផលប៉ះពាល់ផ្ទាល់ទៅលើជីវភាពគ្រួសារ និងសេដ្ឋកិច្ច។ ថី មានកូនចំនួន ២នាក់ ដែលធ្វើការងារនៅប្រទេសថៃ បន្ទាប់ពីមានការប៉ះទង្គិចតាមបណ្តោយព្រំដែនរវាងកម្ពុជា និងថៃ កូនៗរបស់គាត់បានត្រឡប់មកប្រទេសកម្ពុជាវិញ ដោយសារភ័យខ្លាចការគំរាមកំហែងពីជនជាតិថៃ និងគ្រោះថ្នាក់ផ្សេងៗ។

ជួន ធឿន អាយុ៦១ឆ្នាំ កើតនៅឆ្នាំ ១៩៦៣ មានទីកន្លែងកំណើតស្ថិតនៅ ភូមិធ្មា ឃុំច្រេស ស្រុកជុំគិរី ខេត្តកំពត។ បច្ចុប្បន្នរស់នៅក្នុង ភូមិបាក់នឹម ឃុំចេ្រស ស្រុកជុំគិរី ខេត្តកំពត បានរៀបរាប់ថា សង្រ្គាមតាមព្រំដែនរវាងកម្ពុជា និងថៃ បានផ្តល់នូវផលប៉ះពាល់យ៉ាងធ្ងន់ធ្ងរធ្វើឲ្យមានការបាត់បង់ជីវិតទាំងកងទ័ព និងប្រជាជនស៊ីវិល ប្រទេសជាតិទាំងមូលប្រឈមមុខនឹងវិបត្តិសេដ្ឋកិច្ច ខណៈជីវភាពប្រជាជនតាមតំបន់ព្រំដែនរងផលប៉ះពាល់ ពីព្រោះមិនអាចបន្តប្រកបរបររកស៊ីចិញ្ចឹមជីវិតដូចប្រក្រតីបាន។ ការវាយប្រហារពីសំណាក់ទ័ពថៃបានបំផ្លាញវត្តអារាម, មណ្ឌលសុខភាព, សាលារៀន, ផ្លូវថ្នល់ និងលំនៅឋានប្រជាជន។

ជាចុងក្រោយ ប្រជាជនរស់នៅភូមិបាក់នឹមសូមថ្លែងអំណរគុណចំពោះរដ្ឋាភិបាលកម្ពុជា ដែលបានព្យាយាមបញ្ចប់ការប៉ះទង្គិចដោយអាវុធនៅតាមព្រំដែនកម្ពុជា និងថៃ។ ប្រជាជនទាំងអស់សូមគោរពដឹងគុណយ៉ាងជ្រាវជ្រៅចំពោះ លោក ដូណាល់ ត្រាំ ដែលបានជួយអន្តរាគមន៍ឲ្យមានបទឈប់បាញ់ជាបន្ទាន់។ ការបញ្ចប់ការប៉ះទង្គិចនេះបានសង្គ្រោះជីវិតកងទ័ព និងជនស៊ីវិលរាប់ពាន់នាក់។ យើងខ្ញុំជាប្រជាជនមិនចង់ឲ្យកើតមានសង្រ្គាមនៅលើទឹកដីកម្ពុជាទេ ព្រោះប្រជាជនកម្ពុជាបានទទួលរងទុក្ខវេទនាពីសង្រ្គាមជាច្រើនទសវត្សរ៍ ហើយការរស់នៅក្នុងសន្តិភាពគឺមានតម្លៃខ្ពស់សម្រាប់ប្រជាជនកម្ពុជា។[1]

អត្ថបទដោយ ផាត ពន្លក

---

[1] ង៉ែត យ៉ន់, ចាន់ ថី, ជួន ធឿន៖ សម្ភាសន៍ផ្ទាល់មាត់, សម្ភាសន៍ដោយ ៖ ផាត ពន្លក នៅខែសីហា ឆ្នាំ២០២៥,មជ្ឈមណ្ឌលសះស្បើយសហគមន៍បាក់នឹម មជ្ឈមណ្ឌលឯកសារកម្ពុជា សាខាខេត្តកំពត